《趁iau2日時》

 | | | 轉寄

西羅亞＝奉差遣

作者 林俊育 2008.06.15

西羅亞詩班ê成立
雙連教會tī 1988年底成立全台

市盲朋友聯誼會，tī幾位kah意唱歌ê會員發起之下，tī 1989年2月5日正式成立詩班。為tio̍h beh以詩歌來見證上帝ê愛，為主做工，團員不辭辛勞，tī職業按摩ê工作之餘，每週一kap週五ê上午十點到十二點，tī李鳳珠老師ê耐心指導下，努力無放輕鬆地定期練唱。除了tī教會內主日崇拜中獻詩o-ló上帝外，mā kuí-nā pái接受外界邀請去獻唱。M̄-nā發揮所長來服事上帝，並鼓舞koh-khah tsē人參與事奉，堅定in服事ê心志。

因為詩班漸漸茁壯，對外演出mā日漸增多，大家便開始腦力激蕩來為tsit-ê詩班命名。最後由卓忠輝牧師tī 1989年9月10日ê主日講道中，以新約聖經約翰福音第九章「耶穌治好生落來就瞎眼ê人」ê故事，來闡明瞎眼kap伊家己或伊父母ê罪lóng無關係，而是beh tī「瞎而不殘」ê人身上彰顯神ê能力。耶穌講：「我是世上ê光」，便用唾沫kap tio̍h泥巴抹tī tsheⁿ-mê ê目睭上，叫伊去「西羅亞」池子洗目睭，﹝「西羅亞」ê意思是「奉差遣」)，結果醫好了伊ê瞎眼。Tsit段經節siōng ē-tàng鼓舞瞎眼ê人瞭解神ê旨意而koh-khah樂觀地koh再khiā起來，in ê肉眼雖然看bē-tio̍h，心眼卻是明亮ê，所以願被神差遣，以優美ê詩歌來事奉神。詩班團員聽了卓牧師ê信息後深受感動kap激勵，並正式將詩班取名為「西羅亞詩班」，對教會外則稱「西羅亞合唱團」。

詩班成立到taⁿ，團員m̄-nā看見教會內服事ê重要，mā看見自立kap造福人群ê意義重大，願為社會上各種慈善事工而一唱koh再唱，唱出自信，唱出愛心，koh-khah願藉此行入社會，成做有貢獻ê一陣，並譜下璀璨ê人生，來榮神益人。


行出教會ê事奉
西羅亞詩班tī 1990年3月25日應邀到台北市ê大稻埕教會主日崇拜中獻詩，會後一位陳德容兄弟來kā我講伊真受感動，並講伊bueh建議李登輝總統就職典禮時邀請西羅亞合唱團去獻詩。過無幾工，我收tio̍h陳兄弟寫hō͘李總統ê英文信影本,大意是講:「由衷地恭喜您當選中華民國第八任總統。Tsit-ê禮拜日，我到長老教會禮拜，有機會欣賞由二十位男女瞎眼人組成ê西羅亞詩班獻詩，那美妙ê歌聲叫我感動得忍bē-tiâu目屎流，感謝神猶原照顧hiah-ê比咱iáu不幸ê人。因此，我大膽地建議您考慮邀請in tī您五月ê就職典禮中獻詩，我想hit工觀禮ê hiah-ê人一定會感激您對hiah-ê『至微小ê人』ê仁慈，耶穌mā是án-ne教示使徒們去愛hiah-ê『至微小ê人』。」雖然西羅亞詩班無受邀去總統就職典禮獻唱，陳兄弟對西羅亞詩班ê認同kap愛ê行動，真叫阮佩服。

1990年中，西羅亞詩班iáu到台北市ê第一教會kap義光教會獻詩，tuì會友當場為西羅亞詩班事工ê奉獻金額，thang看出會友受感動ê程度，iáu有值得一提ê是，12月24日應台北市政府慶祝行憲紀念日之邀請，前往國父紀念館演唱，唱台灣名謠koh唱聖詩，最後黃大洲市長上台請全体觀眾起立合唱「平安夜」，場面非常動人。為主做好見證.了後，有國中ê校長khà電話來講，伊tī國父紀念館聽西羅亞合唱團演唱，感覺in ê演唱kap見證一定ē-tàng喚起墮落ê國中生向上重生。雙連教會為tio̍h這事工而填購一套新台幣三十六萬元ê舞台音響，tī從事特殊教育ê黃瑞珍會友ê安排下，今年五月十日西羅亞合唱團tī新興國中對全体學生作詩歌見證，tsit項對國中生ê心靈拯救是西羅亞詩班今後bueh繼續做ê事工。


詩歌佈道團ê成立
1991年5月12日，基隆正濱教會慶祝母親節並舉辦漁村社區佈道會，邀請西羅亞詩班全場詩歌見證佈道，這是第一pái ê全場演出，大家戰戰兢兢地排練，尤其是被老師指定ê二位個人信仰見證koh-khah勤練。正式演出時，個個有板有眼，那優美扣人心弦ê詩歌，敲開了每一個人ê心門，個人見證雖然手持麥克風一再無停地pi̍h-pi̍h-tshuah，但那句句由衷ê信仰心路歷程，phah動了每一個人ê心頭。最後由詩班帶頭唱「主tī叫我」(由台灣民謠「黃昏ê故鄉」改編歌詞)第一節，然後全体起立合唱第二節時，周圍受感動而目屎流落ê泣聲，叫我mā忍bē-tiâu潸然目屎流落。最後ê掌聲不絕tī耳，正濱教會楊清吉牧師kap長執會友ê o-ló聲，催迫我禁不住對團員講：「咱ē-tàng成做佈道團了！」團員齊聲回應講：「是ah！」感謝主！西羅亞詩歌佈道團就án-ne踏上koh-khah進一步「奉差遣」ê路程。

了後，西羅亞詩歌佈道團陸續應邀到淡水教會、基隆教會、中坡教會、台北城東教會、屏東民kap教會、艋舺教會、台北古亭教會、台北中山教會、新竹教會、土城教會、台南後甲教會、台北城光教會、台中磐頂教會、馬偕病院員工禮拜、淡江中學tuà校生聚會、史懷哲之友會、國際基督教tuì業人員協會亞太區年、星中婦女會四周年慶kap「2000年福音運動之星中北中聯合佈道會」去作詩歌見證，深受主辦單位kap聽眾ê歡迎。

1991年12月8、9日，西羅亞合唱團配合韓國巴底買盲人宣教團赴台南二所監獄對受刑人詩歌見證，其中台南監獄ê受刑人李世一先生tī伊發表tī中國時報ê「重生」文章中講：「會記得有次是雙連教會盲人合唱團ê演唱，見in手牽手，和悅ê行向舞台，hit種殘而不廢ê堅定意念，到taⁿ感佩猶深，尤其是in透過哀怨婉轉ê歌聲，m̄-nā細訴坎坷歲月，kah-ná mā唱出我內心痛楚ê滄桑，當場忍bē-tiâu燒熱ê目屎涔涔流落。真正ê歌聲誠如真理ê福音，雖然已經是板盡時，到taⁿ iáu tī我心深處繚繞。」當我kā tsit篇文章唸hō͘西羅亞合唱團員聽了，in就決定ài kā監獄作為福音佈道ê對象。了後，去過明德外役監獄，聽眾熱烈ê掌聲證明了盲人ê詩歌kap見證，深深地phah動受刑人ê心。


「以愛化解礙」巡迴佈道會
西羅亞詩班基於「壓傷ê蘆葦，伊不折斷。將殘ê燈火，伊不熄滅。」今年起kap伊甸殘障福音中心合辦á以台灣百萬殘障同胞為對象ê福音佈道會，主題是「以愛化解礙」，邀請各地區ê教會來協辦，希望ē-tàng達到三個目標：
1)盼教會：ē-tàng有殘障福音ê異象，支持殘障福音kap關懷ê事工。
2)盼社會：ē-tàng以愛化解礙，有道是：落地成兄弟，何必骨肉親，一粒溫暖ê心，ē-tàng化解人間真tsē不幸。
3)盼殘友：ē-tàng跨出生命ê樊籠，tam-tio̍h主恩ê滋味，進一步koh肯定自我，積極向上， 活出有意義而有價值ê人生。

第一場佈道會已tī今年三月六、七日tī宜蘭地區舉辦，參與ê教會有宜蘭、羅東、蘭陽、蘇澳kap南方澳等長老教會和信義會宜蘭聖道堂由西羅亞詩班(視障)、喜樂四重唱(視障)、烏門搖滾樂團(視障)kap 讚美三重唱(肢障)共同演出，觀眾有一千三百人次，效果真好。宜蘭教會ê張俊雄牧師ê「明年koh來」hō͘阮真大ê鼓勵，感謝主。

﹝台灣教會公報 2161 期1993.8.1﹞