《趁iau2日時》

 | | | 轉寄

國際視障音樂概況

作者 林俊育 2008.08.10

舊年韓義明來台參加關懷視障慈善音樂會時，伊送我一本「國際視障音樂教育研討會論文選集」，內容豐富而且值得咱參考借鏡ê所在真tsē，tuì án-ne抽空翻譯成中文，以饗國內關心視障音樂教育ê讀者。雖然已翻譯完成，mā經國內音樂界siōng熱心音樂推展mā是本基金會ê莊副董事長秀欣ê用心校對，但距離出版iáu有一段時間，所以先將其中重點摘要如下，供大家參考。

Tsit-ê研討會是由捷克視障者協會和布拉格ê簡德意音樂學院kap鋼琴調音師學校合辦，tī １９９４年２月２５、２６日tī布拉格舉行，有比利時二人、丹麥一人、捷克十八人、法國二人、德國一人、英國一人、義大利一人、葡萄牙二人kap斯洛伐克二人ê代表參加，而西班牙有一人提出論文報告。

地主國捷克提出ê論文有：一）視障音樂教育ê特殊狀況，二）簡德意音樂學院kap鋼琴調音師學校，三）捷克教育制度ê音樂教學，四）視障音樂ê草創時期、五）音樂對視障者生活ê意義，六）「藍色音樂節」ê意義kap使命，七）tī簡德意音樂學院三十年ê實際經驗，八）音樂記憶力ê要點，九）以歌唱方法論談視障音樂教育ê心理現象，十）簡德意音樂學院畢業生對藝術基礎學校ê影響，十一）簡德意音樂學院kap調音師學校ê畢業生，十二）視障音樂教師ê教育問題kap主張，十三）視障音樂教師ê社會動態，十四）各類學校ê視障教師，十五）視障者tī社會地位ê認同，十六）視障者生活中ê音樂。可見捷克對視障音樂教育ê重視，其簡德意音樂學院kap調音師學校專收視障學生，畢業生至少thang被安排到小學教音樂，tsit種視障音樂ê大環境是全世界siōng完善ê，tī tse重視音樂傳統ê國家，深深瞭解音樂對視障者來講是siōng無障礙ê，tsit-ê學校為視障者開創了有保障ê就業空間。

Tī丹麥ê視障者iáu有真tsē管風琴師，mā有一kuá音樂老師kap業餘音樂家。設tī哥本哈根ê視障圖書館，是歐洲siōng重要ê點字樂譜製作機構之一。法國tī １９９３年所做ê調查，有229個視障者從事音樂相關ê職業而有真好ê收入。英國皇家盲人協會最近mā大力推動視障音樂教育，並將視障音樂家建立電腦資料庫，提供特殊音樂教育、生活kap社交技能訓練kap居家關懷。德國ê視障音樂家有六種型態ê職業，to̍h是教會音樂家、學校音樂老師、私人音樂教師、音樂會ê獨奏者、交響樂團樂器演奏家kap流行音樂家，ē-sái講是相當廣泛。

西班牙政府規定全國樂透獎券ê收入完全當做視障者福利，ē-sái講是世界上視障福利siōng好ê國家。一直認為西羅亞合唱團是世界上唯一ê盲人合唱團，我將西羅亞ê CD寄hō͘西班牙ê視障協會，無久mā收tio̍h in合唱團ê CD，m̄-nā水準真高，團員人數mā比西羅亞ê二十一人加出十三人。Tī協會ê推動下，視障音樂tī社會ê kap文化ê活動相當活躍，mā創造真tsē視障音樂就業機會。

義大利ê論文是「視障者用電腦製作墨印樂譜」，in開發ê SCORE(TM) 套裝軟體，深受視障使用者ê喜愛，tsit-ê軟體tio̍h kap GRAPHFLT 程式加上點字視窗或合成語音系統，視障者就ē-tàng使用自如。其他如美國ê SCORE 程式，透過 MIDI 介面卡將樂器鍵盤連接tio̍h電腦上，盲人就thang將樂譜直接鍵入，但 MIDI 介面卡只提供音樂之聲音ê相關資料，並無ē-tàng顯示樂譜ê圖形。另有兩種叫做 JUST kap PAGE ê程式，ē-tàng將樂譜記號tī五線譜上重新配置，也ē-tàng tī列印tsìn前自動格式化，如果加上 SPRINT 程式，koh-khah ē-tàng驅動一般ê圖形列印機kap雷射列印機。我已收集tsiah-ê資料，希望無久ē-tàng帶tńg來國內研究，中國字是使用圖形ê電腦環境，一定有一kuá電腦專家thang突破目前點字譜電腦自動轉換ê瓶頸。

希望基金會tī下屆ê國際研討會mā ē-tàng派員參加，國內ê視障音樂教師或專家學者們，必須現在就開始準備論文。有興趣ê人，thang向基金會影印tsit部國際研討會論文集ê影印本做參考，希望咱ê視障音樂ē-tàng早日國際化，分享到外國ê經驗成果，創造koh-khah完善ê視障音樂大環境，hō͘視障者有教育、就業kap生活ê公平環境，tse mā就是本基金會所beh努力ê大目標，願大家同齊來努力，以期早日達成。