《趁iau2日時》

 | | | 轉寄

神hō͘眼盲ē-tàng看見

作者 林俊育 2008.05.25

前言
一九九一年到美國參加盲人事工國際交換計畫考察，tī短短八週間kap以後每年參加ê美國東岸盲人事工研究考察﹝STUDY TOUR﹞，hō͘我体驗tio̍h神hō͘瞎眼ē-tàng看見ê真理kap事實。神使用各種人才kap科技，hō͘視障者透過各種方法也ē-tàng「看」tio̍h神所創造ê美好世界。

約翰福音九章三十九節，耶穌講：「我到tsit世間來ê目的是beh審判，hō͘瞎眼ê ē-tàng看見，ē-tàng看見ê顛倒瞎了眼。」肉眼看bē-tio̍h ê瞎眼人，in心靈ê目睭卻是明亮ê；肉眼ē-tàng看見ê明眼人，in心靈ê目睭被世俗雜務掩蓋teh，顛倒看bē-tio̍h真理之神ê存在。

肉眼瞎ê心眼卻明亮
1988年起，我tī雙連教會輔導盲朋友聯誼會kap西羅亞合唱團，進一步koh參與台灣盲人社會工作，目前擔任慕光盲人重建中心董事kap視障協會顧問。真tsē人kā我講伊非常感動我tī盲人事工上ê付出，其實我tuì盲人事工中所得tio̍h屬靈kap信仰方面ê成長超過我ê付出koh-khah tsē。尤其是in對信仰ê追求，明眼人lóng應該自覺慚愧，tī雙連教會ê各班成人主日學中，盲人查經班ê出席人數永遠是獨佔鰲頭；真tsē盲人去讀神學院，畢業後mā lóng成做真好ê牧師，kap明眼牧師仝款牧養教會，傳揚神ê福音。Iáu有西羅亞合唱團tuì詩班進一步koh成做詩歌佈道團，充分實踐in「西羅亞=奉差遣」ê崇高信仰；對百萬殘障同胞ê福音佈道，到監獄kap國中去詩歌見證。有ê長執誤解我kā in帶得siuⁿ緊，會變成bē-tàng收拾ê局面。其實是我tuè in美好ê信仰腳步行，當我做完二任六年ê服務委員會主委了後，我便轉來傳道委員會，是in開啟了我心靈ê目睭。我常常以tsit-ê tāi-tsì感謝神，並tī神ê面前紀念in，願神賜我koh-khah有能力來服務視障朋友。

一九九三年十月二十六日，「以愛化解礙」百萬殘障同胞巡迴佈道會tī台中地區舉行，西羅亞合唱團由吳月雲團長串場，伊問台下ê聽眾：「目睭是靈魂之窗，對m̄-tio̍h？」大家異口同聲講「tio̍h」。吳團長反問：「阮眼盲e5bueh án怎tsiah好neh？」台下一陣笑聲了後，吳團長續落來講：「阮m̄-nā有窗iáu有門，請聽阮唱「阮若phah開心內ê門窗」」。

凡俗雜務hō͘咱成做「心亡」ê忙人，咱常常講：「事大莫過於心死」，án-ne是指忙人m̄ hō͘神進入伊心內，無法度開啟心靈ê目睭。聖經上有關耶穌醫治眼盲ê記載，lóng是啟示咱ài開啟心靈ê目睭，因為he比肉眼koh-khah重要。Tsiah-ê故事比喻mā lóng成做肉体眼盲ê安慰kap鼓勵，mā是in siōng喜愛ê經節。M̄-koh，in無歡喜人叫in「tsheⁿ-mê-á」，因為台語中加「仔」ê lóng帶輕視ê意味。

新任聖經公會總幹事賴俊明牧師是十六年前為我洗禮ê牧師，mā是我信仰ê啟蒙師，我請教伊為何聖經m̄用「盲人」來取代「瞎子」？伊請教漢學大師後kā我講：「盲」是指眼目死亡了，á「瞎」是指眼目害病而已，「瞎」比「盲」應該koh-khah好。我有所瞭解，但iáu是認為用「盲人」取代「瞎子」會koh-khah好，願聖經bueh出新版本ê時，ē-tàng舉行公聽會，聽盲人ê心聲kap意見，因為in mā是神ê子民，koh-khah是聖經ê忠實讀者。


弱視者殘存寶貴ê視力
領有殘障手冊ê視障朋友中，有一半以上是弱視á iáu有一點視力。台灣政府規定視力經過校正了後tī 0.2以下就是法定盲人﹝siōng好改稱視障人﹞，這kap美國ê標準仝款，北歐ê社會福利國家，有ê規定0.3甚至有ê 0.5以下。Tsiah-ê人加減lóng iáu有視力，先進文明國家lóng真重視tsiah-ê殘餘視力，盡力設法kā伊提升。

美國ê盲人機構kap重建中心lóng設有弱視服務部﹝LOW VISION DEPT.﹞，作低視力檢查並紹介各種輔助器﹝LOW VISION AID﹞，提升其殘存視力，hō͘ in tī生活上、行動上、就學上、就業上koh-khah方便。反觀咱台灣，自誇經濟奇蹟，卻無機構來服務弱視朋友，tshut-tsāi伊處tī困難中度日，mā喪失了真tsē就學、就業kap活動ê機會，國家亦流失了真tsē thang造就ê人才kap就業人口，何等可惜。

一九九一年ê參觀考察，到一間設tī紐約長島ê弱視目鏡ê專業工廠── "DESIGNS FOR VISION, INC.﹝DVI﹞"，聽完董事長 RICHARD E. FEINBLOOM ê簡介kap參觀電腦化一貫作業ê生產線了後，我就認為應該kā tsit種目鏡引進入來台灣，帶tńg來所有ê目錄資料，請教眼科醫師陳五福博士，伊講beh配tsit種弱視目鏡，費時koh bē thàn錢，國內無眼科醫師願意做，實在hō͘人惋惜。

一九九二年我koh到hit間工廠參觀ê時，董事長koh再次強調in ê產品主要暢銷美、加之外，其他國外mā真tsē來採購，但台灣lóng無人來接洽過。同行有一位瑞士來ê小姐，舊年國際交換計畫伊kap我同期，今年伊是專工為tio̍h研究弱視目鏡而來，hō͘我koh-khah有使命感為台灣ê弱視朋友設法。回台後隨時請友人tshuē馬偕病院ê眼科醫師，答案lóng是無興趣。


引進弱視輔助器
一九九三年我邀請tī慕光盲人重建中心服務三十四年ê盧明松先生、tī淡江大學啟明社服務盲生十七年ê洪錫敏教官kap雙連教會負責盲人事工ê陳文欽牧師同齊參加盲人事工研究考察，in lóng認為應該趕緊引進tsit種弱視目鏡。尤其洪教官強調弱視ê學生配戴tsit種目鏡，上課ê時就thang看tio̍h烏板上ê字，這是台灣弱視者ê一大福音。我下定決心馬上行動，因為前無久我tī波士頓認識榮總派去哈佛醫學院眼科深造ê劉瑞玲醫師，伊是台北市南門教會ê會友，我kap伊提起弱視目鏡需要眼科醫師ê驗光處方，伊一嘴答應幫忙，並購好機票準備同齊去參觀hit間工廠，可惜出發前一工伊破病suah取消同行，但伊ài我帶一kuá樣品tńg來試看看。

Tsit-pái我鼓足勇氣向廠方要求引進in ê弱視輔助器到台灣；董事長看我來了三pái，tsit-pái台灣koh浩浩蕩蕩來了六個人。伊應我ê要求，to̍h即刻指示外銷部負責人為我準備一kuá樣品，並叫一個人教我使用樣品kap寫處方kap訂單ê方法，我有淡薄á成就感來一一學習，希望ē-tàng趕緊幫助台灣ê弱視者，hō͘ in提升視力進一步koh擴展生活空間。

最近到美國波士頓，tú好tú-tio̍h「美國驗光學會」﹝AMERICAN ACADEMY OF OPTOMETRY﹞舉辦ê一九九三年度ê展覽會，我當然無錯過tsit-ê千載難逢ê機會，兩工ê參觀hō͘我對弱視輔助器有koh-khah深入ê瞭解。Siōng大ê收成是koh發現另一間公司叫「OCUTECH, INC.」，由負責人 DR. HENRY GREENE開發成功ê「視力加強系統」﹝VISION ENHANCING SYSTEM, VES﹞，其siōng大ê特點是免視力校正，to̍h是系統內自動校正，thang免去驗光開處方ê手續。其目鏡架框kap "DVI" ê無仝，同時引進二種，thang hō͘弱視朋友選擇適合ê來配戴。Tsit時，「神hō͘眼盲ē-tàng看見」一直tī我ê腦海裏跳躍，kap神同工hō͘我無限ê喜樂，真pháiⁿ用言語形容。


「我ē-tàng看tio̍h！」何等喜樂
樣品帶tńg來台灣，我隨時tshuē二位弱視好友到榮總請劉瑞玲醫師驗光診察，當in tshuē-tio̍h適合ê弱視輔助器，透過he 縮kah 極小ê精密望遠鏡， ē-tàng看tio̍h五十公尺外ê水塔，無戴tsit種輔助器則一片白茫茫。In禁bē-tiâu叫出來：「感謝神，我ē-tàng看tio̍h。」我講：「Lín根本to̍h無盲ah！」

一個週末下晡，我因tú回國厭倦加上時差，tú beh倒落去膨椅作一個小憩，電話鈴響講beh來看弱視輔助器，我瞭解he「我ē-tàng看見」ê迫切心理，不管ài睏神guā厚iáu是叫伊緊來，結果來了三位。In戴上輔助器，望tio̍h窗外對面約二十公尺外ê牆壁講：「一塊塊ê磚塊lóng看kah真清楚，我一生從來無看過tsiah-ni̍h清楚，toh位thang配tio̍h tsit種目鏡？」我講tī美國真tsē，伊一屑á to無遲疑講：「我買機票，你tshuā我去配好mah？」我kā伊講m̄免去美國了，慕光盲人重建中心已經著手籌辦「低視力檢查kap光學輔助中心」，該中心成立了後就thang服務國內弱視朋友。

為tio̍h瞭解tsit種「輔助低視力目鏡」適合台灣弱視者ê程度，我親自帶樣品到雙連教會盲人查經班kap淡江大學盲生資源中心，請弱視者試戴並聽取in ê意見。雙連教會盲朋友聯誼會mā舉辦一場說明會，五十guā位弱視朋友參加，lóng期待趕緊ē-tàng配tio̍h tsit種輔助目鏡，以改善in ê視力，進一步koh來改善生活。願神ê大能hō͘所有低視力ê弱視朋友lóng ē-tàng重見光明，o-ló神。
1993.12.9