《巴克禮普世版聖經（試讀本）》

 | | | 轉寄

巴克禮普世版（試讀本） 使徒行傳第六章

作者 巴克禮普世版小組 2014.04.06

Suán Tshit-ê Tsip-sū
1 Hit sî, bûn-tô͘ ke-thiⁿ tsin-tsē, ū kóng Hi-lia̍p-uē ê Iû-thài-lâng, tuì Hi-pik-lâi-lâng tshut uàn-giân, in-uī tī ji̍t-siông sing-ua̍h ê phuè-kip bô kò͘-tio̍h in ê kuáⁿ-hū. 2 Tsa̍p-jī sù-tô͘ tiàu-tsi̍p tsìng bûn-tô͘ lâi tuì in kóng, "Guán tsiong Siōng-Tsú ê tō-lí pàng-hē teh, lâi pān-lí ji̍t-siông sing-ua̍h ê phuè-kip bô sik-ha̍p. 3 Só͘-í hiaⁿ-tī ah, tio̍h tuì lín tiong-kan kíng-suán tshit lâng ū hó miâ-siaⁿ, siū Sìng-Sîn tshiong-muá koh ū tì-huī ê, guán thang siat-li̍p in lâi kuán-lí tsit-ê tāi-tsì. 4 Guán beh tsuan-sim tī kî-tó kah thuân hok-im ê kang-tsok." 5 Tsìng-lâng huaⁿ-hí sù-tô͘ ê thê-gī, tsiū kíng-suán Su-thê-huán, i sī tshiong-muá sìn-sim kah Sìng-Sîn ê lâng; koh kíng-suán Hui-li̍k, Pik-lô-ko-lô, Nî-ka-ná, Thê-bûn, Pa-bí-ná, kah bat ji̍p Iû-thài-kàu ê An-thê-o-lâng Nî-ko-lah. 6 In hō͘ tsit tshit-ê lâng khiā tī sù-tô͘ ê bīn-tsîng, sù-tô͘ tsiū uī-tio̍h in kî-tó, kā in huāⁿ-tshiú lâi siat-li̍p in tsò tsip-sū. 7 Siōng-Tsú ê tō-lí ná lâi ná hing-ōng, tī Iâ-lō͘-sat-líng bûn-tô͘ ê jîn-sò͘ ke-thiⁿ tsin-tsē, koh ū tsin-tsē tsè-si lâi sìn hok-im ê tō-lí.

Su-thê-huán Siū Lia̍h
8 Su-thê-huán tshiong-muá un-tián kah tsâi-lîng, tī jîn-bîn ê tiong-kan kiâⁿ tuā ê kî-sū kah sîn-jiah. 9 M̄-koh ū tsi̍t-kuá lâng khí-lâi kah Su-thê-huán piān-lūn, in sī tuì Kó͘-lī-nāi kah A-li̍k-san-tāi lâi-.ê, sio̍k "Tsū-iû-lâng" huē-tn̂g ê huē-uân, í-ki̍p tuì Ki-lī-ka kah A-se-a-síng lâi ê lâng. 10 Sìng-Sîn sù Su-thê-huán tì-huī lâi kóng-uē, hō͘ in bô huat-tō͘ piān-pok. 11 In tsiū sái-lōng lâng tshut-lâi kóng, "Guán bat thiaⁿ-tio̍h i kóng huí-pòng Mô͘-se kah siat-to̍k Siōng-Tsú ê uē." 12 In koh siàn-tōng jîn-bîn, tiúⁿ-ló, kah king-ha̍k kàu-su, tshiong-khì lia̍h Su-thê-huán, kā i kau hō͘ gī-huē. 13 In kiò tsi̍t-kuá ké tsìng-jîn lâi, kóng, "Tsit-ê lâng kóng-uē put-sî teh kong-kik tsit-ê sìng-tiān kah Mô͘-se ê lu̍t-huat. 14 In-uī guán bat thiaⁿ-tio̍h i kóng, "Tsit-ê Ná-sat-li̍k-lâng Iâ-so͘ beh huí-huāi tsit-ê sìng-tiān, koh beh kái-piàn Mô͘-se thuân hō͘ lán ê kui-lē." 15 Hit sî, tsē tī gī-huē tiong ê lâng lóng lia̍h Su-thê-huán kim-kim khuàⁿ, khuàⁿ-tio̍h i ê bīn ná tshin-tshiūⁿ thiⁿ-sài ê bīn.