《巴克禮普世版聖經（試讀本）》

 | | | 轉寄

巴克禮普世版（試讀本） 哥林多後書第三章

作者 巴克禮普世版小組 2015.05.10

Sin Bîng-Iok ê Lô͘-po̍k
1 Guán kám sī koh teh tsū-khua? Guán kám tio̍h kah tsi̍t-kuá lâng kāng-khuán su-iàu siá tshui-tsiàn-phue hō͘ lín, á-sī su-iàu lín thè guán siá tshui-tsiàn-phue hō͘ pa̍t-lâng? 2 Lín pún-sin tsiū-sī guán ê tshui-tsiàn-phue, siá tī guán ê sim-lāi, beh hō͘ tsìng-lâng tsai, hō͘ ta̍k-lâng tha̍k. 3 Lín bîng-bîng sī Ki-tok só͘ siá thong-kuè guán lâi sàng ê phue. Tsit-tiuⁿ phue m̄-sī īng ba̍k-tsuí siá tī tsio̍h-pán ê, sī īng íng-uán ê ua̍h-miā Siōng-Tsú ê Sìng-Sîn siá tī lâng ê sim-lāi. 4 Guán thong-kuè Ki-tok tuì Siōng-Tsú ū tsit-khuán ê khak-sìn tsiah án-ne kóng. 5 Tse m̄-sī kóng guán ka-kī ū tsâi-tiāu tsò tsit-khuán tāi-tsì, guán ê tsâi-tiāu sī tuì Siōng-Tsú lâi-.ê. 6 Siōng-Tsú hō͘ guán ū tsâi-tiāu tsò sin ê bîng-iok ê lô͘-po̍k. M̄-sī īng bûn-jī siá ê, sī Sìng-Sîn ê iok. Īng bûn-jī siá ê lu̍t-huat ē tuà-lâi sí-bông, m̄-koh Sìng-Sîn ē siúⁿ-sù ua̍h-miā. 7 Īng bûn-jī khik tī tsio̍h-pán ê lu̍t-huat pan-pò͘ ê sî, Siōng-Tsú ê îng-kng ū hián-hiān. Tuì Mô͘-se ê bīn huán-tsiò tshut-lâi ê kng sui-jiân tsiām-tsiām siau-sit, in-uī hit-ê kng hui-siông kiông, tì-sú Í-sik-lia̍t-lâng bē-tàng tsù-ba̍k khuàⁿ Mô͘-se ê bīn. Liân tuà hō͘ lâng sí-bông ê lu̍t-huat to ū tsit-khuán ê îng-kng, 8 án-ne Sìng-Sîn só͘ huat-tshut ê kám bē koh-khah ū îng-kng? 9 Hit-ê kā lâng tīng-tsuē ê kong-lîng nā ū hit-khuán ê îng-kng, kā lâng suan-phuàⁿ bô-tsuē ê kong-lîng kám bē koh-khah tshiong-muá îng-kng? 10 Án-ne kóng khí-lâi, in-uī tsit-má ê îng-kng pí í-tsîng koh-khah tuā, kuè-khì hiah-ni̍h tuā ê îng-kng suah siau-sit khì. 11 Hit-ê tsi̍t-sî-á-kú ê nā ū îng-kng, án-ne hit-ê kú-tn̂g tsûn-tsāi ê tsiū ū koh-khah tuā ê îng-kng. 12 Guán ū tsit-khuán ê ǹg-bāng tsiah káⁿ hó-táⁿ lâi kóng. 13 Guán bô tshin-tshiūⁿ Mô͘-se tio̍h īng phè tà ka-kī ê bīn, hō͘ Í-sik-lia̍t-lâng bē tit thang tsù-ba̍k khuàⁿ-tio̍h i bīn ê îng-kng tsiām-tsiām siau-sit. 14 M̄-koh Í-sik-lia̍t-lâng ê sim-tì phah bē khui. Kàu kin-á-ji̍t, in tha̍k kū-iok ê sî, in ê sim-lîng iáu hō͘ kāng hit-ê phè tà-teh, in-uī tsí-ū kah Ki-tok kiat-liân, hit-tè phè tsiah ē-tàng the̍h-tiāu. 15 Sīm-tsì kàu kin-á-ji̍t, in ta̍k-pái tha̍k Mô͘-se ê tsheh, hit-tè phè iáu-koh tà tī in ê sim-lîng. 16 M̄-koh kuan-hē Mô͘-se Sìng-king ū kì-tsài kóng, "Tng i kui-hiòng Tsú, i ê phè tsiah ē-tàng the̍h-tiāu." 17 Tī tsia teh kóng ê "Tsú" tsiū-sī Sìng-Sîn. Ū Tsú ê Sìng-Sîn ê só͘-tsāi tsiū-ū tsū-iû. 18 Án-ne lán tāi-ke lóng īng bô tà phè ê bīn teh huán-siā Tsú ê îng-kng. Tsit-ê îng-kng sī tuì Tsú, tsiū-sī tuì Sìng-Sîn huat tshut-lâi ê îng-kng, teh kā lán kái-tsō piàn-tsiâⁿ kah I kāng-khuán ê hîng-siōng, hō͘ lán ū koh-khah tuā ê îng-kng.