《巴克禮普世版聖經（試讀本）》

 | | | 轉寄

巴克禮普世版（試讀本） 提摩太前書第三章

作者 巴克禮普世版小組 2016.02.21

Kàu-huē ê Líng-tō-tsiá
1 Lâng nā him-bō͘ tsò kàu-huē ê líng-tō-tsiá, i sī ì-ài hó ê kang-tsok, tsit-kù sī tsin-si̍t ê uē. 2 Só͘-í tsò líng-tō-tsiá ing-kai tio̍h bô khuat-tiám, tsí-ū tsi̍t-ê bó͘, m̄-thang hò͘ⁿ-tsiú, tio̍h an-hūn siú-kí, tuan-tsìng, hó khuán-thāi tshut-guā lâng, gâu kà-sī, 3 bô in-uī tsiú-tsuì lâi jiá-sū, bô iá-bân, huán-tńg tio̍h un-jiû, bô sio-tseⁿ, bô tham-tsâi, 4 gâu kuán-lí ka-kī ê ka-tîng, hō͘ kiáⁿ-jî sūn-ho̍k, sū-sū kìng-tiōng. 5 In-uī lâng nā bē-hiáu kuán-lí ka-kī ê ka-tîng, ná ē-hiáu tsiàu-kò͘ Siōng-Tsú ê kàu-huē lè? 6 M̄-thang hō͘ tsho͘-sìn ê lâng tsò kàu-huē ê líng-tō-tsiá, kiaⁿ i ē tsū-khua, suah hām-lo̍h kah Mô͘-kuí só͘ siū kāng-khuán ê sím-phuàⁿ. 7 Kàu-huē líng-tō-tsiá mā tio̍h tī kàu-huē-guā ū hó miâ-siaⁿ, tsiah bián tú-tio̍h lâng ê huí-pòng suah hām-lo̍h Mô͘-kuí ê lô-bāng.

Kàu-huē Líng-tō-tsiá ê Tsō͘-tshiú: Tsip-sū
8 Tsò tsip-sū ê mā kāng-khuán tio̍h tuan-tsong, bô siang-bīn-uē, bô hò͘ⁿ-tsiú, bô tham put-gī ê tsîⁿ, 9 tio̍h īng tshing-khì ê liông-sim lâi tshî-siú ò-biāu ê tō-lí. 10 Tsit-tsióng lâng mā tio̍h sing hō͘ in tsiap-siū khó-giām, nā bô thang hiâm tsiah thang hō͘ in tsò tsip-sū. 11 Tsò tsip-sū-niû ê mā tio̍h tuan-tsong, bô kóng lâng ê pháiⁿ-uē, bô hò͘ⁿ-tsiú, ta̍k-hāng tāi-tsì tiong-si̍t. 12 Tsip-sū tio̍h tsí-ū tsi̍t-ê bó͘, gâu kuán-kà kiáⁿ-jî koh gâu kuán-lí ka-kī ê ka-tîng. 13 In-uī hó-hó tsīn tsip-sū ê tsit-bū, ka-kī ē tit-tio̍h hó miâ-siaⁿ, mā tsiah ē-tàng hó-táⁿ káng-lūn Ki-tok Iâ-so͘ ê tō-lí.

Ko-tshim ê Ò-biāu
14 Guá siá tsiah-ê hō͘ lí, sī ǹg-bāng guá pún-sin liâm-piⁿ ē-tàng khì lí hia. 15 Nā-sī iân-tshiân bān khì, tsit-tiuⁿ phue ē-tàng hō͘ lí thang tsai tī Siōng-Tsú ê ke ing-kai tio̍h án-tsuáⁿ sing-ua̍h. Tsit-ê ke tsiū-sī íng-uán ê ua̍h-miā Siōng-Tsú ê kàu-huē, mā-sī tsin-lí ê thiāu-tsio̍h kah tē-ki. 16 Tāi-ke lóng kong-khai sîng-jīn lán sìn-gióng ê ò-biāu sī juā-ni̍h-á tuā: tsiū-sī Iâ-so͘ hián-hiān tsò lâng, ū Sìng-Sîn lâi tsìng-si̍t, tshut-hiān hō͘ thiⁿ-sài khuàⁿ, tī guā-pang suan-iông, hō͘ sè-kan-lâng siong-sìn, siū tsiap-la̍p khì tī thiⁿ-tíng îng-kng.