《巴克禮普世版聖經（試讀本）》

 | | | 轉寄

巴克禮普世版（試讀本） 啟示錄第二十章

作者 巴克禮普世版小組 2017.05.22

Tsi̍t-tshing-nî ê Ông-kok
1 Jiân-āu guá koh khuàⁿ-tio̍h tsi̍t-ê thiⁿ-sài tuì thiⁿ-tíng lo̍h-lâi, tshiú the̍h bô-té tshim-kheⁿ ê só-sî kah tsi̍t-tiâu tuā-tiâu thih-liān. 2 I lia̍h hit-tsiah liông, tsiū-sī hit-bué lāu-tsuâ, mā sī kiò-tsò Mô͘-kuí á-sī Sat-tàn, īng thih-liān kā i pa̍k tsi̍t-tshing-nî kú. 3 Thiⁿ-sài kā i hiat lo̍h-khì bô-té tshim-kheⁿ kuaiⁿ khí-lâi, koh īng hong-ìn hong khí-lâi, hō͘ i bô thang koh bê-hi̍k lia̍t-kok, ti̍t-kàu tsi̍t-tshing-nî muá. Tsit-ê kî-hān liáu-āu, i it-tīng ē tsiām-sî siū tháu-pàng. 4 Guá koh khuàⁿ-tio̍h kuí-nā-ê pó-tsō, tsē tī hit tíng-bīn ê ū tit-tio̍h sím-phuàⁿ ê kuân-pìng. Guá mā ū khuàⁿ-tio̍h hiah-ê uī Iâ-so͘ tsò kiàn-tsìng kah uī-tio̍h Siōng-Tsú ê tō hō͘ lâng tsām-thâu ê lâng ê lîng-hûn. Tsiah-ê lâng m̄-bat pài hit-tsiah bíng-siù kah bíng-siù ê tsō-siōng, thâu-hia̍h á-sī tī tshiú-ni̍h mā bô siū i khap-ìn tsò kì-hō. In lóng koh-ua̍h, kah Ki-tok tsò-hué thóng-tī tsi̍t tshing nî. 5 Tse sī thâu-tsi̍t-pái ê koh-ua̍h. Kî-tha ê sí-lâng tio̍h kàu hit-ê tsi̍t-tshing-nî kî-muá tsiah ē koh-ua̍h. 6 Ū hūn tī thâu-tsi̍t-pái koh-ua̍h ê lâng tsin ū hok-khì, in sī sìng-kiat ê lâng. Tē-jī-pái ê sí-bông bô kuân kā in kuán-hat, in ē tsò Siōng-Tsú kah Ki-tok ê tsè-si, mā ē kah Ki-tok tsò-hué thóng-tī tsi̍t-tshing nî.

Sat-tàn Tsiàn-pāi
7 Hit-ê tsi̍t-tshing nî kî-muá, Sat-tàn ē siū tháu-pàng tshut-lâi. 8 I ē tshut-khì bê-hi̍k tē-tsiūⁿ sì-hng ê lia̍t-kok, tsiū-sī Kok kah Má-kok, kā in tiàu-tsi̍p uá-lâi kau-tsiàn, in ê lâng-sò͘ tsē kah ná hái-sua. 9 In tsiū khí-lâi tī tē-tsiūⁿ muá-sì-kè khì uî-khùn sìn-tô͘ ê iâⁿ kah Siōng-Tsú só͘ thiàⁿ ê siâⁿ, m̄-koh ū hué tuì thiⁿ kàng lo̍h-lâi kā in siau-bia̍t. 10 Hiah-ê kā in bê-hi̍k ê Mô͘-kuí siū hiat lo̍h-khì hué kah liû-hông ê ô͘, hit-tsiah bíng-siù kah ké-sian-ti í-king tī hia. In ē mê-ji̍t siū khó͘-tshó͘, íng-uán bô suah.

Tsuè-āu ê Sím-phuàⁿ
11 Suà lo̍h-lâi guá koh khuàⁿ-tio̍h tsi̍t-ê pe̍h-sik ê tuā pó-tsō kah tsē tī hit tíng-bīn Hit-uī, tē kah thiⁿ tuì I ê bīn-tsîng tô-tsáu, tsáu kah bô khuàⁿ in ê iáⁿ-tsiah. 12 Guá koh khuàⁿ-tio̍h sí-khì ê lâng, bô-lūn tuā-sè lóng khiā tī pó-tsō tsîng. Kì-lo̍k ê tsheh lóng hian-khui, līng-guā tsi̍t-pún ua̍h-miā tsheh mā hian-khui. Sí-khì ê lâng tsiàu in ê hîng-uî, kin-kì tsiah-ê tsheh só͘ kì-tsài ê lâi siū sím-phuàⁿ. 13 Hái tsiong lāi-bīn ê sí-lâng kau tshut-lâi, sí-bông kah im-hú mā tsiong lāi-bīn ê sí-lâng kau tshut-lâi. Ta̍k-lâng tsiàu in ê hîng-uî siū sím-phuàⁿ. 14 Jiân-āu sí-bông kah im-hú mā siū hiat lo̍h-khì hué-ô͘. Tsit-ê hué-ô͘ tsiū-sī tē-jī pái ê sí. 15 Miâ bô kì-tsài tī ua̍h-miā tsheh ê lâng mā lóng siū hiat lo̍h-khì hué-ô͘.