《巴克禮普世版聖經（試讀本）》

 | | | 轉寄

巴克禮普世版（試讀本） 馬可福音第十章

作者 巴克禮普世版小組 2013.02.17

Kuan-hē Lî-hun ê Kà-sī(Mt 19:1-12; Lk 16:18)

Iâ-so͘ lī-khui hia lâi-kàu Iû-thài tē-khu, kuè-khì Iok-tàn-hô hit-pîng. Kûn-tsiòng koh tsū-tsi̍p khì Iâ-so͘ hia. I koh tsiàu-siông kà-sī in. 2 Ū tsi̍t-kuá Huat-lī-sài-phài ê lâng beh tshì-thàm Iâ-so͘, uá-lâi mn̄g I kóng, " Lâng kám thang lî i ê bó͘?" 3 Iâ-so͘ ìn kóng, " Mô͘-se ê lu̍t-huat án-tsuáⁿ kui-tīng?" 4 In kóng, " Mô͘-se ín-tsún lâng siá lī-hun-su lâi lî i ê bó͘." 5 Iâ-so͘ kā in kóng, " Mô͘-se in-uī lín ê sim ngē, tsiah tsè-tīng tsit-ê kài-bīng hō͘ lín. 6 M̄-koh guân-khí-thâu, Siōng-Tsú tshòng-tsō lâng ū lâm ū lí.( tsù: CSK 1:27) 7 In-uī án-ne, tsa-po͘-lâng tio̍h lī-khui pē-bú lâi kah i ê bó͘ kiat-liân. 8 Nn̄g-ê tsiâⁿ-tsò tsi̍t-thé.( tsù: CSK 2:24) Án-ne, in m̄-sī nn̄g-ê, sī tsiâⁿ-tsò tsi̍t-thé. 9 Só͘-í Siōng-Tsú só͘ phuè-ha̍p ê, lâng m̄-thang kā i thiah-suàⁿ." 10 Ji̍p-khì tshù-lāi, bûn-tô͘ koh mn̄g Iâ-so͘ tsit-ê tāi-tsì. 11 Iâ-so͘ kā in kóng, "Lâng nā lî i ê bó͘ koh tshuā pa̍t-ê tsa-bó͘-lâng, tsiū-sī huān kan-îm lâi ko͘-hū i ê bó͘. 12 Bó͘ nā khì-sak i ê tiōng-hu lâi kè pa̍t-ê ang, mā sī huān kan-îm."

Iâ-so͘ Kā Gín-á Tsiok-hok (Mt 19:13-15; Lk 18:15-17)

13 Ū-lâng tshuā sè-hàn-gín-á lâi Iâ-so͘ hia, beh hō͘ Iâ-so͘ huāⁿ-tshiú tsiok-hok. Bûn-tô͘ kā in tsik-pī. 14 Iâ-so͘ khuàⁿ-tio̍h tsin bô huaⁿ-hí, kā bûn-tô͘ kóng, " Hō͘ hiah-ê sè-hàn-gín-á lâi Guá tsia, m̄-thang kā in tsó͘-tòng.In-uī tshin-tshiūⁿ tsit-khuán gín-á ê lâng, tsiah ē-tàng tsiâⁿ-tsò Siōng-Tsú Kok-tō͘ ê tsú-bîn. 15 Guá si̍t-tsāi kā lín kóng, " Nā bô tshin-tshiūⁿ gín-á án-ne tsiap-siū Siōng-Tsú Kok-tō͘, tsua̍t-tuì bē-tàng ji̍p-khì." 16 Iâ-so͘ tsiū kā gín-á phō khí-lâi, kā in huāⁿ-tshiú tsiok-hok.

Hó-gia̍h-lâng Lâi Tshuē Iâ-so͘(Mt 19:16-30; Lk 18:18-30)

17 Iâ-so͘ tshut-khì tī lō͘-ni̍h, ū tsi̍t-ê lâng tsáu lâi kuī tī I ê bīn-tsîng, mn̄g kóng, "Hó ê lāu-su ah, guá tio̍h án-tsuáⁿ tsò tsiah ē-tàng tit-tio̍h íng-uán ê ua̍h-miā?" 18 Iâ-so͘ kā i kóng, " Lí ná-ē tshing-ho͘ Guá sī hó ? Siōng-Tsú í-guā bô tsi̍t-ê sī hó. 19 Tsiah-ê kài-bīng lí í-king lóng tsai: M̄-thang thâi-sí lâng, M̄-thang kan-îm, M̄-thang thau-the̍h, M̄-thang tsò ké ê kiàn-tsìng, M̄-thang khik-khui lâng, Tio̍h hàu-kìng lí ê pē-bú."( tsù: CAK 12:16) 20 Hit-ê lâng ìn kóng, " Lāu-su ah, tsiah-ê guá tuì sè-hàn to̍h lóng ū teh tsun-siú." 21 Iâ-so͘ tsù-ba̍k kā i khuàⁿ, īng thiàⁿ-sim kā i kóng, " Lí iáu khiàm tsi̍t-hāng. Lí tio̍h khì bē só͘-ū ê tsâi-sán lâi hō͘ sàn-tshiah lâng. Áń-ne lí tsiū ū tsik-tsū tsâi-pó tī thiⁿ-tíng. Jiân-āu tsiah lâi tuè guá." 22 Hit-ê lâng thiaⁿ-tio̍h tsit-ê uē, bīn tsiū sit-sik, iu-thâu kat-bīn lī-khui Iâ-so͘, in-uī i ū tsin-tsē tsâi-sán. 23 Iâ-so͘ kā kûn-tsiòng khuàⁿ tsi̍t liàn tsiah tuì bûn-tô͘ kóng, " Hó-gia̍h-lâng beh ji̍p Siōng-Tsú Kok-tō͘ tsin khùn-lân!" 24 Bûn-tô͘ thiaⁿ liáu tsiah-ê uē, kám-kak tsin kî-kuài. Iâ-so͘ koh kóng, " Sè-kiáⁿ ah, uá-khò tsîⁿ-tsâi beh ji̍p Siōng-Tsú Kok-tō͘ tsin-tsiàⁿ khùn-lân! 25 Lo̍k-tô tshng-kuè tsiam-phīⁿ, pí hó-gia̍h-lâng ji̍p Siōng-Tsú Kok-tō͘ iáu khah kán-tan." 26 Bûn-tô͘ koh-khah tio̍h-kiaⁿ koh kî-kuài khí gî-būn kóng, " Án-ne siáⁿ-lâng tsiah ē-tàng tit-kiù?" 27 Iâ-so͘ tsù-ba̍k kā in khuàⁿ, kóng, " Tsit hāng tāi-tsì lâng tsò bē kàu, tuì Siōng-Tsú lâi kóng m̄-sī án-ne, in-uī Siōng-Tsú ta̍k-hāng lóng ē." 28 Pí-tik tsiū tuì Iâ-so͘ kóng, " Guán í-king pàng-sak it-tshè lâi tuè Lí." 29 Iâ-so͘ ìn kóng, " Guá si̍t-tsāi kā lín kóng, " Lâng nā uī-tio̍h guá kah Hok-im ê iân-kò͘ pàng-sak tshù-the̍h, hiaⁿ-tī, tsí-muē, lāu-bú, lāu-pē, kiáⁿ-jî, tshân-hn̂g, 30 tī kim-sè ē tit-tio̍h pah puē ê tshù-the̍h, hiaⁿ-tī, tsí-muē, lāu-bú, kiáⁿ-jî, tshân-hn̂g, tông-sî mā ē siū pik-hāi, m̄-koh tī lâi-sè ē tit-tio̍h íng-uán ê ua̍h-miā. 31 M̄-koh tsin-tsē tsò thâu-tsîng ê lâng ē piàn-tsò lō͘-bué, lō͘-bué ê lâng mā ē piàn-tsò thâu-tsîng."

Iâ-so͘ Tē-saⁿ Pái Ī-giân Ka-kī ê Sí-bông kah Koh-ua̍h(Mt 20:17-19; Lk 18:31-34)

32 Iâ-so͘ kah bûn-tô͘ tsiūⁿ Iâ-lō͘-sat-líng, tī lō͘-ni̍h Iâ-so͘ kiâⁿ tī thâu-tsîng, bûn-tô͘ tio̍h-kiaⁿ koh kî-kuài, tuè ê lâng tsin kiaⁿ-hiâⁿ. Iâ-so͘ koh tshuā tsa̍p-jī sù-tô͘ khì piⁿ-á, tsiong I teh-beh tú-tio̍h ê tāi-tsì kā in kóng, 33 " Tsit-má lán beh tsiūⁿ Iâ-lō͘-sat-líng, Jîn-tsú ē hông tshut-bē khì kau hō͘ tsiah-ê tsè-si-tiúⁿ kah king-ha̍k kàu-su. In ē kā I tīng sí-tsuē, koh kā I kau hō͘ Guā-pang-lâng. 34 In ē kā I hì-lāng, phuì-nuā, piⁿ-phah, hāi-sí. Saⁿ ji̍t āu I ē koh-ua̍h."

Ngá-kok kah Iok-hān ê Iau-kiû(Mt 20:20-28)

35 Jiân-āu Se-pí-thài ê kiáⁿ Ngá-kok kah Iok-hān, uá-lâi kā Iâ-so͘ kóng, " Lāu-su ah, kiû Lí tap-ìng guán tuì Lí só͘ kiû ê tāi-tsì." 36 Iâ-so͘ mn̄g kóng, " Lín ài Guá uī lín tsò siáⁿ-mi̍h?" 37 In kóng, " Tī Lí tit-tio̍h îng-kng ê sî, kiû Lí hō͘ guán tsi̍t-ê tsē Lí ê tsiàⁿ-pîng, tsi̍t-ê tsē Lí ê tò-pîng." 38 Iâ-so͘ kā in kóng, " Lín m̄-tsai ka-kī teh kiû siáⁿ-mi̍h. Guá só͘ lim ê pue , lín kám ē-tàng lim? Guá siū ê sé-lé, lín kám ē-tàng siū?" 39 In kóng, " Guán ē." Iâ-so͘ kā in kóng, " Guá só͘ lim ê pue, lín beh lim, Guá só͘ siū ê sé-lé, lín beh siū. 40 M̄-koh tsē Guá ê tsiàⁿ-pîng á-sī tò-pîng, m̄-sī Guá ē-tàng tsò-tsú. Siōng-Tsú uī-tio̍h siáⁿ-lâng tsún-pī, tsiū ē hō͘ hit-ê lâng." 41 Kî-tha tsa̍p-ê bûn-tô͘ thiaⁿ-tio̍h, tsiū tuì Ngá-kok kah Iok-hān siū-khì. 42 Iâ-so͘ kiò in lâi, kā in kóng, " Lín tsai, sè-kan-lâng ê tiong-kan hō͘ lâng tsun-tsò thóng-tī-tsiá ê lâng, ū kuâng lâi kā in tī-lí, in ê kuaⁿ-uân ē kā in kuán-hat. 43 M̄-koh lín tiong-kan bô ing-kai án-ne. Lín tiong-kan ài beh tsò tuā ê lâng, tio̍h tsò tsìng-lâng ê tshe-īng. 44 Lín tiong-kan ài beh tsò thâu ê lâng, tio̍h tsò tsìng-lâng ê lô͘-po̍k. 45 In-uī Jîn-tsú lâi tsit-ê sè-kan, m̄-sī beh hō͘ lâng ho̍k-sāi. Huán-tńg sī beh lâi ho̍k-sāi lâng. Sīm-tsì hi-sing ka-kī ê sèⁿ-miā lâi sio̍k-huê tsin-tsē lâng."

Iâ-so͘ I-hó Tsheⁿ-mê ê lâng Pa-tí-mái (Mt 20:29-34; Lk 18:35-43)

46 Iâ-so͘ kah bûn-tô͘ lâi-kàu Iâ-lī-ko-siâⁿ. In kah tsi̍t tuā-tīn lâng tshut Iâ-lī-ko-siâⁿ ê sî, ū tsi̍t-ê tsheⁿ-mê-ê khit-tsia̍h, Tí-mái ê kiáⁿ Pa-tí-mái, tsē tī lō͘-piⁿ. 47 Hit-ê tsheⁿ-mê-ê khit-tsia̍h thiaⁿ-tio̍h Ná-sat-li̍k-lâng Iâ-so͘ tuì hia king-kuè, tsiū tuā-siaⁿ huah kóng, " Tāi-pi̍t ê kiáⁿ-sun, Iâ-so͘, khó-liân guá!" 48 Tsin-tsē lâng kā i tsik-pī, kiò i tsīng-tsīng, m̄-koh i koh-khah tuā-siaⁿ huah kóng," Tāi-pi̍t ê kiáⁿ-sun ah, khó-liân guá!" 49 Iâ-so͘ thîng lo̍h-lâi kóng, " Kiò i lâi." In tsiū kiò tsheⁿ-mê-ê lâi, kā i kóng, " An lí ê sim, khí-lâi! I teh kiò lí." 50 Tsheⁿ-mê ê lâng tsiū pàng-lo̍h i ê saⁿ, thiàu-khí-lâi khì kàu Iâ-so͘ hia. 51 Iâ-so͘ kā i kóng, " Lí ài guá kā lí tsò siáⁿ-mi̍h?" Tsheⁿ-mê ê lâng kā I kóng, " Lāu-su, kiû Lí hō͘ guá ē koh khuàⁿ-kìⁿ." 52 Iâ-so͘ kā i kóng, " Lí tńg-khì, lí ê sìn-sim hō͘ lí tit-tio̍h i-hó." Tsheⁿ-mê ê lâng suî-sî koh ē khuàⁿ-kìⁿ, tsiū tuè Iâ-so͘ khì.