《巴克禮普世版聖經（試讀本）》

 | | | 轉寄

巴克禮普世版（試讀本） 馬可福音第十一章

作者 巴克禮普世版小組 2013.02.24

Iâ-so͘ Kong-îng Tsìn-ji̍p Iâ-lō͘-sat-líng (Mt 21:1-11; Lk 19:28-40; Ih 12:12-19)
Iâ-so͘ kah bûn-tô͘ uá-kīn Iâ-lō͘-sat-líng, lâi-kàu Kan-ná-suaⁿ piⁿ ê Pik-huat-kî kah Pik-tāi-nî ê sî, 2 Iâ-so͘ tshe nn̄g-ê bûn-tô͘, kā in kóng, " Lín khì tuì-bīn ê tsng-siā, lín ji̍p-khì tsiū ē tú-tio̍h tsi̍t tsiah iáu m̄-bat hō͘ lâng khiâ-kuè ê lî-á pa̍k tī hia. Lín kā i tháu-khui, khan lâi tsia. 3 Nā ū-lâng mn̄g lín kóng ná-ē beh án-ne tsò? Lín tio̍h kā i kóng, ' Tsú beh īng tsit tsiah lî-á, liâm-piⁿ ē khan tńg-lâi hîng.' " 4 Hit nn̄g-ê bûn-tô͘ tsiū khì, khuàⁿ-tio̍h lō͘-piⁿ tsi̍t tsiah lî-á pa̍k tī mn̂g-guā, tsiū kā i tháu-khui. 5 Piⁿ-á teh khiā ê lâng mn̄g in kóng, " Lín tháu lî-á beh tshòng siáⁿ-mi̍h?" 6 In tsiàu Iâ-so͘ só͘ huan-hù ê kā in kóng. Hiah-ê lâng tsiū pàng hō͘ in khì khan. 7 In tsiū khan hit tsiah lî-á tńg-lâi hō͘ Iâ-so͘, kā in ka-kī ê saⁿ phua̍h tī lî-á tíng-bīn. Iâ-so͘ tsiū peh khí-lih khiâ. 8 Ū tsin-tsē lâng īng in ê guā-saⁿ pho͘ tī lō͘-ni̍h, mā ū-lâng īng tuì hn̂g-ni̍h tshò lâi ê tshiū-ki, pho͘ tī lō͘-ni̍h kā I huan-gîng. 9 Tsîng-kiâⁿ āu-tuè ê lâng tuā-siaⁿ huah kóng, " Hô-sàn-ná! hōng Tsú ê miâ lâi ê Hit-uī, ing-kai tit-tio̍h o-ló!( tsù: SPh 118:26) 10 Hit-ê teh-beh lâi ê ông-kok, tsiū-sī lán ê tsó͘-sian Tāi-pi̍t ê ông-kok, ing-kai tit-tio̍h o-ló! O-ló kui tī tsì-kuân ê Siōng-Tsú!" 11 Iâ-so͘ tsìn-ji̍p Iâ-lō͘-sat-líng, ji̍p-khì sìng-tiān lāi, sì-kè khuàⁿ tsi̍t liàn-tńg, in-uī thiⁿ í-king àm à, tsiū kah tsa̍p-jī sù-tô͘ tshut-khì, lâi-kàu Pik-tāi-nî.

Iâ-so͘ Tsiù-tsó͘ Bû-hua-kó-tshiū (Mt 21:18-19)
12 Keh-tńg-ji̍t, Iâ-so͘ kah bûn-tô͘ tuì Pik-tāi-nî tshut-lâi ê sî, Iâ-so͘ pak-tó͘ iau. 13 I tuì Hn̄g-hn̄g khuàⁿ-tio̍h tsi̍t tsâng ū tsin-tsē hio̍h-á ê bû-hua-kó-tshiū, tsiū uá-khì khuàⁿ hit tíng-bīn ū kué-tsí á-bô. Kàu-uī tsi̍t khuàⁿ, tshiū-tíng kan-taⁿ ū hio̍h-á, kî-tha bô puàⁿ-hāng, in-uī m̄-sī bû-hua-kó ê sî-kî. 14 Iâ-so͘ tsiū tuì hit tsâng tshiū kóng, " Tuì taⁿ í-āu, íng-uán bô-lâng ē koh tsia̍h-tio̍h lí ê kué-tsí." I ê bûn-tô͘ ū thiaⁿ-tio̍h tsit-kù uē.

Iâ-so͘ Tshing-khì sìng-tiān (Mt 21:12-17; Lk 19:45-48; Ih 2:13-22)
15 Āu-lâi Iâ-so͘ kah bûn-tô͘ lâi-kàu Iâ-lō͘-sat-líng, Iâ-so͘ ji̍p-khì sìng-tiān, tsiū kā tiān-lāi teh tsò bé-bē ê lâng kuáⁿ tshut-khì, koh tshia-tó uāⁿ-tsîⁿ ê lâng ê toh-á kah bē hún-tsiáu ê lâng ê í-á. 16 Mā m̄ tsún lâng tuà mi̍h-kiāⁿ, kā sìng-tiān tòng-tsò thong-lō͘ lâi-lâi khì-khì. 17 Iâ-so͘ koh kà-sī hiah-ê lâng kóng, " Sìng-king kám bô kì-tsài:: Guá ê tshù beh kiò-tsò bān-bîn kî-tó ê tiān?( tsù: ISA 56:7) M̄-koh lín suah kā i piàn-tsò tsha̍t-siū.( tsù: ILB 7:11)" 18 Tsè-si-tiúⁿ kah king-ha̍k kàu-su thiaⁿ-tio̍h, tsiū it-ti̍t tshuē-khuàⁿ ū siáⁿ-mi̍h pān-huat, lâi hāi-sí Iâ-so͘, m̄-koh in kiaⁿ Iâ-so͘, in-uī kûn-tsiòng tuì I ê kà-sī lóng tsin kám-ho̍k. 19 Hông-hun ê sî, Iâ-so͘ kah bûn-tô͘ tsiū tshut-khì siâⁿ-guā.

Tuì Bû-hua-kó-tshiū Tit-tio̍h Kà-sī (Mt 21:20-22)
20 Keh-tńg-tsá-khí, Iâ-so͘ kah bûn-tô͘ tuì hia king-kuè ê sî, khuàⁿ-tio̍h hit tsâng bû-hua-kó-tshiū í-king ta-khì à. 21 Pí-tik siūⁿ-tio̍h tsiū kā Iâ-so͘ kóng, " Lāu-su, Lí khuàⁿ, Lí só͘ tsiù-tsó͘ hit tsâng bû-hua-kó-tshiū í-king ta-khì à!" 22 Iâ-so͘ ìn kóng, " Lín tio̍h sìn Siōng-Tsú. 23 Guá si̍t-tsāi kā lín kóng, lâng kā tsit-tsō suaⁿ kóng, ' Suá-khì thiām hái!' sim-lāi bô giâu-gî, sìn i só͘ kóng ê it-tīng ē si̍t-hiān, it-tīng ē tsiàu i ê ì-sù hō͘ i si̍t-hiān. 24 Só͘-í guá kā lín kóng, lín kî-tó bô-lūn kiû siáⁿ-mi̍h, tio̍h siong-sìn í-king tit-tio̍h, tsiū lóng ē tsiàu án-ne si̍t-hiān. 25 Lín khiā-teh kî-tó ê sî, siūⁿ-tio̍h ū-lâng tik-tsuē lí siáⁿ-mi̍h, tio̍h kā i sià-bián. Lín ê Thiⁿ-Pē mā ē sià-bián lín ê kuè-sit. 26 Lín nā m̄ sià-bián lâng, lín ê Thiⁿ-Pē mā bē sià-bián lín ê kuè-sit."( tsù: Ū-ê tshau-pún bô tsit tsat.)

Lūn Iâ-so͘ ê Kuân-pìng (Mt 21:23-27; Lk 20:1-8)
27 Iâ-so͘ kah bûn-tô͘ koh lâi-kàu Iâ-lō͘-sat-líng. Iâ-so͘ tī tiān-lāi teh kiâⁿ ê sî, hiah-ê tsè-si-tiúⁿ, king-ha̍k kàu-su kah tiúⁿ-ló lâi tshuē Iâ-so͘, 28 mn̄g I kóng, " Lí khò siáⁿ-mi̍h kuân-pìng lâi tsò tsiah-ê tāi-tsì? koh sī siáⁿ-lâng hō͘ Lí tsit-ê kuân-pìng lâi tsò tsiah-ê tāi-tsì?" 29 Iâ-so͘ kā in kóng, " Guá mā beh mn̄g lín tsi̍t-kù uē. Lín nā ìn Guá, Guá tsiah beh kā lín kóng, Guá khò siáⁿ-mi̍h kuân-pìng lâi tsò tsiah-ê tāi-tsì. 30 Iok-hān ê sé-lé ê kuân-pìng sī tuì thiⁿ á-sī tuì lâng lâi ê? Lín tio̍h kā Guá kóng." 31 In tsiū hō͘-siōng gī-lūn kóng, " Lán nā kóng, ' Tuì thiⁿ', I ē kóng, 'Án-ne lín ná-ē m̄ sìn Iok-hān?' 32 M̄-koh lán kám thang kóng, ' Tuì lâng'?" In án-ne kóng sī teh kiaⁿ kûn-tsiòng, in-uī tsìng-lâng lóng lia̍h Iok-hān tsò sian-ti. 33 In tsiū ìn Iâ-so͘ kóng, " Guán m̄-tsai." Iâ-so͘ tsiū tuì in kóng, " Guá mā bô beh kā lín kóng, Guá sī khò siáⁿ-mi̍h kuân-pìng lâi tsò tsiah-ê tāi-tsì."