《巴克禮普世版聖經（試讀本）》

 | | | 轉寄

巴克禮普世版（試讀本）_馬太福音第五章

作者 巴克禮普世版小組 2011.04.24

1) Iâ-so͘ khuàⁿ-tio̍h hiah-ê kui-tīn ê lâng, tsiū peh-tsiūⁿ suaⁿ; tsē lo̍h-lâi, I ê bûn-tô͘ tsiū uá-lâi.
2) I khai-sí kà-sī in:
3) " Tsai-iaⁿ tio̍h uá-khò Siōng-tsú ê lâng si̍t-tsāi ū hok-khì, in-uī in ē tsiâⁿ-tsò Thian-kok ê tsú-bîn!
4) Uī-tio̍h tsuē-kò iu-būn ê lâng si̍t-tsāi ū hok-khì, in-uī Siōng-tsú ē kā in an-uì!
5) Un-jiû ê lâng si̍t-tsāi ū hok-khì, in-uī Siōng-tsú ē siúⁿ-sù in I só͘ ìng-ún ê thó͘-tē!
6) Jia̍t-tshiat him-bō͘ bueh si̍t-hiān Siōng-tsú tsí-ì ê lâng si̍t-tsāi ū hok-khì, in-uī Siōng-tsú ē hō͘ in muá-tsiok!
7) Gâu lîn-bín lâng ê lâng si̍t-tsāi ū hok-khì, in-uī Siōng-tsú ē kā in lîn-bín!
8) Sim-kuaⁿ tshing-khì ê lâng si̍t-tsāi ū hok-khì, in-uī in ē khuàⁿ-tio̍h Siōng-tsú!
9) Tshiok-tsìn hô-pîng ê lâng si̍t-tsāi ū hok-khì, in-uī in ē tsiâⁿ-tsò Siōng-tsú ê kiáⁿ-jî!
10) Uī-tio̍h si̍t-hiān Siōng-tsú ê tsí-ì lâi siū pik-hāi ê lâng si̍t-tsāi ū hok-khì, in-uī in ē tsiâⁿ-tsò Thian-kok ê tsú-bîn!
11) Nā uī-tio̍h guá ê iân-kò͘ hō͘ lâng bú-jio̍k, pik-hāi, huí-pòng, lín tsiū si̍t-tsāi ū hok-khì.
12) Tio̍h huaⁿ-hí khuài-lo̍k, in-uī lín tī thiⁿ-tíng ū tsin tuā ê pò-siúⁿ bueh hō͘ lín; lín kó͘-tsá ê sian-ti iā sī án-ne hō͘ lâng pik-hāi."
13) " Lín ná tshin-tshiūⁿ sè-kan-lâng ê iâm; iâm nā sit bī, bueh án-tsuáⁿ hō͘ i koh ū kiâm-bī? Nā sit-khì kiâm-bī tsiū bô lō͘-īng ā, tsí-ū hiat khì guā-bīn, hō͘ lâng thún-ta̍h."
14) " Lín sī sè-kan ê kng; khí tī suaⁿ-tíng ê siâⁿ am-khàm bē-tiâu.
15) Bô lâng tiám ting khàm tuà bí-táu lāi-bīn, lóng sī kā i tshāi tī ting-tâi tíng, lâi tsiò kng hō͘ tshù-lāi ê lâng.
16) Tshin-tshiūⁿ án-ne, lín ê kng tio̍h tsiò tī lâng ê bīn-tsîng, hō͘ in khuàⁿ-tio̍h lín ê hó hîng-uî, lâi îng-kng lín tī thiⁿ-tíng ê Pē."
17) " M̄-thang siūⁿ kóng guá lâi ê bo̍k-tik sī bueh huè-tû Mô͘-se ê lu̍t-huat á-sī sian-ti ê kà-sī; guá lâi m̄-sī bueh huè-bô, sī bueh sîng-tsuân.
18) Guá si̍t-tsāi kā lín kóng, Tsiū-sī kàu thiⁿ-tē siau-sit, it-ti̍t kàu lu̍t-huat ê bo̍k-tik lóng ta̍t-sîng, lu̍t-huat ê tsi̍t tiám tsi̍t ue̍h iā bē siau-sit khì.
19) Só͘-í, nā ū lâng huān-tio̍h sui-jiân sī kài-bīng tiong siōng-sè ê tsi̍t tiâu, koh án-ne kà-sī lâng khì huān, i tī Thian-kok sǹg-tsò sī siōng-sè; tsí-ū si̍t-hiān kài-bīng koh kà-sī lâng khì kiâⁿ, i tī Thian-kok tsiū ē sǹg-tsò sī siōng tuā ê.
20) Guá kā lín kóng, lín nā bô pí king-ha̍k-kàu-su kap Huat-lī-sài-phài ê lâng khah tiong-si̍t lâi tsun-siú Siōng-tsú ê tsí-ì, tsua̍t-tuì bē-tàng ji̍p Thian-kok."
21) " Lín bat thiaⁿ-tio̍h lu̍t-huat tuì kó͘-tsá-lâng kóng, 'M̄-thang hāi-sí lâng; hāi-sí lâng ê tio̍h siū sím-phuàⁿ.'
22) Tān-sī guá kā lín kóng: tuì hiaⁿ-tī tsí-bē siū-khì ê lâng, lóng tio̍h siū sím-phuàⁿ. Mē hiaⁿ-tī tsí-bē 'pn̄g-tháng' ê lâng, tio̍h tsiūⁿ huat-tîng; mē hiaⁿ-tī tsí-bē 'gōng-tai' ê lâng, it-tīng tio̍h siū tē-gi̍k ê hué-hîng.
23) Só͘-í, lí khì tsè-tuâⁿ hiàn tsè-mi̍h ê sî, nā siūⁿ-khí lí ê hiaⁿ-tī tsí-bē tuì lí ū sím-mi̍h put-muá;
24) lí tio̍h pàng-hē lí ê lé-mi̍h tī tsè-tuâⁿ, tāi-sing khì kap lí ê hiaⁿ-tī tsí-bē hô-hó, jiân-āu tsiah tńg-lâi hiàn tsè-mi̍h."
25) " Nā ū lâng kā lí kò͘-sò͘, bueh thua lí khì huat-tîng, iáu tī lō͘-ni̍h ê sî, tio̍h thàn-tsá kap i hô-kái, nā bô i ē kā lí kau hō͘ huat-tîng, sím-phuàⁿ-kuaⁿ kā lí kau hō͘ gê-ia̍h khì kuaiⁿ lo̍h kaⁿ.
26) Guá si̍t-tsāi kā lí kóng, tsuè-āu ê tsi̍t sián tsîⁿ bô hîng tshing-tshó, lí tsua̍t-tuì bē-tàng tuì hia tshut-lâi."
27) " Lín bat thiaⁿ-tio̍h lu̍t-huat kà-sī lâng kóng, M̄-thang huān kan-îm;
28) m̄-koh guá kā lín kóng, Tng jīm-hô tsa-po͘-lâng khì-tô͘ pà-tsiàm lâng ê bó͘,koh sî-siông ba̍k-tsiu kim-kim teh khuàⁿ tsit-ê tsa-bó͘-lâng ê sî ,hit lâng sim-lāi í-king hō͘ tsit-ê tsa-bó͘-lâng tsiâⁿ-tsò îm-hū.
29) Nā-sī lí ê tsiàⁿ ba̍k ín-khí lí huān-tsuē, lí tio̍h kā i ó͘ hiat-ka̍k; lîng-khó sòng-sit sing-khu ê tsi̍t pō͘-hūn, pí tsuân-sin hó-hó hiat-lo̍h tē-ga̍k khah hó.
30) Lí ê tsiàⁿ tshiú nā ín-khí lí huān-tsuē, tio̍h kā i tsām hiat-ka̍k; lîng-khó sòng-sit sing-khu ê tsi̍t pō͘-hūn, pí kui sing-khu hó-hó hiat-lo̍h tē-ga̍k khah-hó."
31) " Koh ū lu̍t-huat án-ne kóng, 'Lâng nā bueh kap i ê bó͘ lî-hun, tio̍h hō͘ i lî-hun tsìng-su.'
32) Tān-sī guá kā lín kóng, lâng nā m̄-sī in-uī bó͘ kap lâng su-thong lâi kā i lî-hun, tsit-ê hū-jîn-lâng nā koh kè, tsiū hāi i huān kan-îm; nā ū lâng tshuā tsit-ê hū-jîn-lâng mā sī huān kan-îm."
33) " Lín iā bat thiaⁿ-tio̍h lu̍t-huat kà-sī kó͘-tsá lâng kóng, ' M̄-thang uî-puē tsiù-tsuā, lí tī Siōng-tsú bīn-tsîng só͘ tsiù ê tsuā, it-tīng tio̍h si̍t-hîng.'
34) Tān-sī guá kā lín kóng： lóng m̄-thang tsiù-tsuā; m̄-thang kí thiⁿ lâi tsiù-tsuā, in-uī thiⁿ sī Siōng-tsú ê pó-tsō;
35) mā m̄-thang kí tē lâi tsiù-tsuā, in-uī tē sī Siōng-tsú ê kha-tiam; mā m̄-thang kí Iâ-lō͘-sat-líng lâi tsiù-tsuā, in-uī Iâ-lō͘-sat-líng sī tuā Jîn-kun ê siâⁿ.
36) Iā m̄-thang kí lí ê thâu-khak lâi tsiù-tsuā, in-uī lí bē-tàng hō͘ tsi̍t ki thâu-mn̂g piàn o͘ á-sī piàn pe̍h.
37) Lín kóng-uē ing-kai, 'Sī' tsiū kóng 'Sī'; 'M̄-sī' tsiū kóng 'M̄-sī'. kî-tha ke kóng ê sī tuì hit ê mô͘-kuí tshut-lâi ê."
38) " Lín iā bat thiaⁿ-tio̍h lu̍t-huat ê kà-sī kóng, 'Ba̍k-tsiu puê ba̍k-tsiu, tshuì-khí puê tshuì-khí."
39) Tān-sī Guá kā lín kóng: m̄-thang ' Í ok pò ok.' Nā ū lâng siàn lí tsiàⁿ-pîng ê tshuì-phé, liân tò-pîng mā ua̍t hō͘ i siàn.
40) Lâng nā kò lí, bueh the̍h lí ê lāi-saⁿ, liân guā-saⁿ mā pàng hō͘ i.
41) Nā ū lâng kiông-pik lí phāiⁿ i ê hîng-lí kiâⁿ tsi̍t lí, tio̍h kap i kiâⁿ nn̄g lí lō͘.
42) Nā ū lâng tuì lí kiû sím-mi̍h, tio̍h hō͘ i; nā bueh kā lí tsioh, m̄-thang kī-tsua̍t.
43) " Lín iā bat thiaⁿ-tio̍h lu̍t-huat ê kà-sī kóng, 'Tio̍h thiàⁿ lí ê tshù-piⁿ, uàn-hūn lí ê tuì-ti̍k.'
44) tān-sī Guá kā lín kóng: tio̍h thiàⁿ lín ê tuì-ti̍k, tio̍h thè pik-hāi lín ê lâng kî-tó.
45) Lín nā án-ne tsò, tsiū ē tsiâⁿ-tsò Thiⁿ-pē ê kiáⁿ-jî; in-uī I hō͘ ji̍t-thâu tsiò pháiⁿ lâng kap hó lâng, iā lo̍h-hō͘ ak gī-lâng kap put-gī ê lâng.
46) In-uī lín nā kan-ta thiàⁿ hiah-ê thiàⁿ lín ê lâng, kám ē-tàng tit-tio̍h sím-mi̍h pò-siúⁿ? Liân hiah-ê thiu-suè ê mā ē-hiáu án-ne tsò.
47) Lín nā kan-ta tuì lín ê hiaⁿ-tī tsí-bē tshíng-an, ū sím-mi̍h pí pa̍t-lâng khah ti̍k-pia̍t? Kám m̄-sī liân guā-pang-lâng mā án-ne teh tsò?
48 Só͘-í lín tio̍h tshin-tshiūⁿ lín ê Thiⁿ-Pē hit khuán ê uân-tsuân.