《台語chit條路》

 | | | 轉寄

《台語tsit條路》--加學、加聽，做肥底 ─ 洪惟仁訪問(十五)

作者 楊允言 2008.08.10

卵：tsit-má學生想beh提出一e5khah清楚ê語言政策，一寡物件愛交代著，譬如講，你干taⁿ做福佬話ê研究，tse是學術性ê，tse會使免tshap無要緊，但是講著全面性ê語文運動，iá是思考koh khah大ê問題，tse確實是衝著，咱beh按怎解除in心理ê結？in m̄是真正反對你。

洪：我ê做法是階段性ê，我ê主張是本土語言教育，著是講，ti7tsit-ê所在大多數人講ê話，除了北京語以外，譬如講台北市，福佬人佔大多數，你著愛學tsia ê話，buē曉講mā愛學a。

頂kái有人講，in若beh認同北京話著hō͘伊去認同，我講你無資格認同，啥麼原因leh？因為語言是一ê民族ê標誌，你一ê福佬人，beh hông消滅去a，你講甘願去hông消滅，你kā kiáⁿ講，無要緊a，你beh hông做kiáⁿ是你ê自由，哪有hia ê自由？我無贊成tsit款ê自由。

人ê認同，無影講是家治去決定ê，伊自細漢學北京語，kám自由去選擇ê？he是政治ê結果mà？按呢有人講『我是外省人、我是客人，我tuà台北市，kám一定愛講福佬話？』我講mā愛講福佬話，因為你做一ê外地人，入梨tsit塊土地，你無去適應in ê文化生活kám會使？當然buē使a，你去美國為啥麼英語會講甲siá-siá叫，甚至到尾a，你ê gín-á buē曉講母語，he是社會環境ê問題mà，是無法度ê代誌。

所以外省人來tsia，beh保存家治ê母語無法度，in不得已只好認同北京語，tō叫咱台灣人mā愛放棄，哪有he代誌？我批評丁邦新著是teh批評tsit點，你家治放棄mā是不得已ê，buē使講你不得已著愛叫別人tuè你犧牲。

凰：認賊做父。

洪：至少tī台北tsit-ê所在是福佬人ê地區，來到tsia著是愛學tsia ê語言，你tī客人區，無管你是外省人iá是福佬人，你仝款愛學客話，你tī hia生活mà，若按呢，你客人beh教gín-á福佬話bò͘？he是你ê代誌，假使你攏beh tuà客人區，感覺講無需要福佬話，會使。

進：tú-tsiah有講著政策ê問題，伊若叫你講北京語，我tō照常講福佬話mà，我無要求你一定愛講福佬話，是按怎你規定我愛講北京語？

洪：tse語言是競爭ê lah，你若kā尊重ê時tsūn伊著hia-pai起來a，伊tō講『咱著愛尊重少數，所以愛講北京語』有bò͘？少數愛尊重，a多數m̄免尊重ò͘？

進：你若kap客人講ê時tsūn，伊福佬話真正聽無，你tō無法度a，至少講hit種伊聽有ê語言，阮hia tshiâⁿ-tshiâⁿ有外國人來訪問，咱kap伊做伙，是beh講啥麼話，像我beh kap你講話，無beh kap伊講，按呢咱beh講啥麼話。

洪：對待人客kap對待客人無仝款，像有三ê人，你、我kap一ê外國人，伊是人客，為著beh hō͘伊加入咱ê討論，咱kā伊尊重，tse無要緊。今仔日外省人kap客人m̄是人客ne，伊是kap咱tuà做伙ê人，若一ê外先省人iá是客人來tī tsia，咱十幾ê人著`愛變聲？無理a！

其實咱teh推動台語，m̄是干taⁿ研究，研究是一ê基礎，無啥麼實際ê作用，實際作用是愛去講、去寫，將台語做咱生活ê一部分，若無，做古董teh耍哪有意義？我teh研究台灣話mā m̄是beh做古董、beh做墓牌。