《雙文開講》

 | | | 轉寄

聖誕禮拜2005--基督降生tī殘忍ê世界

作者 Ông Tsing-bun 2005.12.25

之一

當救主耶穌誕生ê時，有tsē-tsē老母ê哭聲。Tī伯利恆，一群婦人人大聲哀哭，因為伊ê kiáⁿ兒hō͘希律ê兵丁thâi死lah。

救主耶穌出世，tsit-ê新ê君王出世ê消息，不但(m̄-nā)感動幾位了解天文ê智慧人，由遠遠ê東方行向朝聖ê路途，tsit-ê消息mā驚動當政者。救主出世ê消息傳出去，人民ê內心開始有希望，總是，一個暴力ê統治者想beh將埋藏tī民間ê希望來消滅。

Tsit位將來ê君王只不過是一個平凡ê嬰á，出世tī平民ê家，暴君所得tio̍h唯一ê資料就是：tsit-ê gín-á出世tī伯利恆。所以希律就派兵丁去將所有伯利恆ê兩歲以内gín-á thâi死。

Tsiah-nih殘忍ê代誌，hō͘咱驚惶，咱真oh去想像hit-ê情景，咱mā時常掩面，刁工忽略tsit幕情景。

文藝復興時代ê畫圖家Pieter Bruegel bat將tsit幕ê情景搬到伊所tuà ê法蘭德斯ê鄉村，畫出tī落雪ê山城，穿鐵甲ê兵丁衝入厝內，威脅人。In 拔劍出來，將嬰á tuì老母ê手中強奪過來，用劍tu̍h死。畫家m̄-nā teh紀念伯利恆受thâi ê gín-á，伊同時teh紀念ti伊ê時代，爭取自由獨立ê荷蘭人民受tio̍h帝國ê西班牙軍隊無情ê鎮壓ê故事。

細漢gín-á、幼嬰，手內未bat kia̍h任何武器，嘴內mā無出半句怨言，就tī充滿衝突ê世界，受tio̍h有權勢ê政權ê殺害。這是救主耶穌所出生ê世界！這是羅馬帝國時代ê殖民地ê生活現實，是Pieter Bruegel 所生存ê十六世紀荷蘭ê現實，是台灣原住民tī 1930所經驗到ê霧社事件ê現實，是台灣人tī二二八以後所經歷ê，hō͘人驚惶、悲傷ê現實。主耶穌降生tī一個殘忍ê世界，降生tī你我所生存ê世界。

每一冬聖誕節ê時，咱時常會用快樂ê心情，享受溫暖kap和平，疼痛kap歡喜。總是teh慶祝新生命開始ê時，馬太福音ê作者為咱記載一個殘忍ê故事，hō͘咱聽tio̍h伯利恆眾老母ê哭聲，hō͘咱體會tio̍h，tsit-ê拯救ê希望是包含juā-tsē ê血kap目屎，伊起頭是hiah-nih無力，hiah-nih受tio̍h烏暗勢力ê包圍。 總是，奇妙ê光星，有一日會衝破烏暗暝。顏信星牧師有作詩來講起tsit-ê隱密ê希望：

遙遠ê東方 神話ê搖床，偌多ê故事 倒tī搖床無人問 奇妙ê光星 衝破烏暗冥，撥雲來見日 傳說中ê傳說 今出世


之二
小漢主耶穌，tsit-ê無反抗能力ê幼嬰，tī殘忍ê大屠殺以前，就hō͘父母帶到埃及去逃避災禍。出世無juā久就開始逃亡ê嬰á，伊親像被賣去埃及ê以色列祖先約瑟，tī艱難困苦，失落故鄉ê狀態中，靜靜等待上帝所預辦ê時刻。

咱ê心為tio̍h伯利恆遭難ê gín-á憂傷，為tsit-ê殘忍ê世界擘腹(peh-pak=痛心疾首)。總是，主耶穌ê活命猶原tī tsia，有一條充滿希望ê小小生命得tio̍h保全，祂beh長大，成為萬邦ê希望，帶來救贖ê信息。祂是一個無siâng款ê君王，祂安慰憂悶ê心，作和平ê使者，hō͘跟隨祂ê人tī tsit-ê殘忍ê世界堅持義kap愛ê道路。伊講：「為tio̍h義受窘逐ê人有福氣，因為天國是in ê。」 因為án-ni，雖然和平世界猶原iáu未臨到，歷史已經出現轉機。