《押韻啟應詩篇》

 | | | 轉寄

台語押韻啟應詩篇 78a

作者 Tīⁿ Jî-gio̍k 2007.07.22

78　　A-sat kà-sī ê si.

1a　Guá ê peh-sìⁿ ah , lín tio̍h thiaⁿ guá ê kà-sī ,
　　我 的 百 姓 啊，恁 著 聽 我 的 教 示，

1b　　　Àⁿ hī-khang thiaⁿ guá ê tshuì ê uē só͘ tsí-sī .
　　　　俯 耳 孔 聽 我 的 嘴 的 話 所 指 示。

2a　Guá beh khui-tshuì siat phì-jū ê uē ,
　　我 要 開 嘴 設 譬 喻 的 話，

2b　　　Guá beh kóng-tshut kó͘-tsá ún-ba̍t ê uē ,
　　　　我 要 講 出 古 早 隱 密 的 話。

3a　Tsiū-sī guán só͘ thiaⁿ--kìⁿ, só͘ tsai--ê ;
　　就 是 阮 所 聽 見， 所 知 的；

3b　　　Ia̍h sī guán ê tsó͘-kong thuân hō͘ guán--ê .
　　　　亦 是 阮 的 祖 公 傳 給 阮 的。

4a　Guán bô beh tsiong tsiah-ê sū tuì in ê kiáⁿ-sun ún-muâ si̍t-tsîng,
　　阮 無 要 將 諸 些 事 對 伊 的 子 孫 隱 瞞 實 情，

4b　　　Beh tsiong Iâ-hô-hua ê miâ-siaⁿ kap I ê kuân-lîng,
　　　　要 將 耶 和 華 的 名 聲 與 祂 的 權 能，

4c　Í- ki̍p I só͘ kiâⁿ kî-biāu ê sū ,
　　以及 祂 所 行 奇 妙 的 事，

4d　　　Thuân hō͘ āu-sè-tāi kú -kú .
　　　　傳 給 後 世 代 久 久。

5a　In -uī I tī Ngá-kok li̍p tiāⁿ-tio̍h ê siú-lé ,
　　因 為 祂 在 雅 各 立 定 著 的 守 禮，

5b　　　Tī Í -sik-lia̍t siat lu̍t-huat ê tsè.
　　　　在 以 色 列 設 律 法 的 制，

5c　Sī I bīng-līng lán ê tsó͘-kong--ê ,
　　是 祂 命 令 咱 的 祖 公 的，

5d　　　Iā thang thuân hō͘ in ê kiáⁿ-sun--ê .
　　　　也 通 傳 給 伊 的 子 孫 的。

6a　Hō͘ āu-tāi, tsiū-sī teh beh tshut-sì ê kiáⁿ-sun tsai;
　　使 後 代，就 是 在 要 出 世 的 子 孫 知；

6b　　　In ia̍h beh khí-lâi thuân hō͘ in ê kiáⁿ-sun tsuè kài.
　　　　伊 亦 要 起 來 傳 給 伊 的 子 孫 做 戒。

7a　Hō͘ in bô buē-kì-tit tuì Siōng-tè sìn-nāi,
　　使 伊 無 不 記 得 對 上 帝 信 賴，
　　 Tsuân-lîng--ê ê só͘ tsuè teh tsú-tsáiⁿ,
　　 全 能 者 的 所 做 在 主 宰，

7b　　　Sī beh hō͘ in tsun-siú I ê kài.
　　　　是 要 使 伊 遵 守 祂 的 戒。

8a　Bián-tit tshin-tshiūⁿ in ê tsó͘-kong hit-tāi,
　　免 得 親 像 伊 的 祖 公 彼 代，

8b　　　Sī ngī-sim puē-gi̍k ê sè -tāi,
　　　　是 硬 心 悖 逆 的 世 代，

8c　Sī tsûn-sim bô sì- tsiàⁿ ê sè -tāi,
　　是 存 心 無 四 正 的 世 代，

8d　　　In ǹg Siōng-tè ê sim bô kian-kò͘ siū that-gāi. 　　
　　伊 向 上 帝 的 心 無 堅 固 受 塞 礙。

9a　Í- huat-liân ê kiáⁿ-sun kia̍h ke-si kap king-tsìⁿ,
　　以法 蓮 的 子 孫 舉 機 俬 與 弓 箭，

9b　　　Lîm-tīn ê ji̍t , ua̍t-tńg-sin thè-āu--khì.
　　　　臨 陣 的 日，越 轉 身 退 後 去。

10a　In bô tsun-siú Siōng-tè ê iok-tiāⁿ,
　　　伊 無 遵 守 上 帝 的 約 定，

10b　　　M̄-khíng tsiàu I ê lu̍t-huat lâi kiâⁿ.
　　　　　不 肯 照 祂 的 律 法 來 行。

11a　Koh buē-kì-tit I só͘-kiâⁿ ê tuā-sū,
　　　復 不 記 得 祂 所 行 的 大 事，

11b　　　Kap I só͘ hō͘ in khuàⁿ-kìⁿ kî-biāu ê sū .
　　　　　及 祂 所 使 伊 看 見 奇 妙 的 事。

12a　I tī Ai-ki̍p-tuē, Só-an ê tshân-kíng,
　　　祂在 埃 及 地，瑣 安 的 田 境，
　　tī in tsó͘-kong ê ba̍k-tsiu tsîng,
　　　在 伊 祖 公 的 目 珠 前，

12b　　　Kiâⁿ kî -īⁿ ê sū tsuè kiàn-tsìng.
　　　　　行 奇 異 的 事 做 見 証。

13a　I hō͘ in kè--khì I só͘ pun-khui ê hái,
　　　祂 使 伊 過 去 祂 所 分 開 的 海，

13b　　　Koh hō͘ tsuí khiā--khí-lâi , tshin-tshiūⁿ thô͘-tui kui-tsài.
　　　　　復 使 水 立 起 來，親 像 土 堆 歸 載。

14a　I ji̍t--sî īng hûn tshuā--in ,
　　　祂 日 時 用 雲 導 伊，

14b　　　Thong-mî īng hé ê kng tshuā--in .
　　　　　通 暝 用 火 的 光 導 伊。

15a　I tī khòng-iá hō͘ tsio̍h-puâⁿ khui-tshuì,
　　　祂在 曠 野 使 石 磐 開 嘴，

15b　　　Hō͘ in tsuē-tsuē tsuí thang lim kàu khuì,
　　　　　使 伊 多 多 水 通 飲 到 氣， 　　
　　tshin-tshiūⁿ tuì tshim-ian tshìng-tshut tshim-tsuí.
　　　　　親 像 對 深 淵 沖 出 深 水。

16a　I hō͘ tsuí tuì tsio̍h-puâⁿ tshìng-tshut,
　　　祂 使 水 對 石 磐 沖 出，

16b　　　Hō͘ tsuí tshin-tshiūⁿ kang-hô lâu-lo̍h kui-khut.
　　　　　使 水 親 像 江 河 流 落 歸 窟。

17a　In iû-guân ta̍uh-ta̍uh tik-tsuē I ;
　　　伊 猶 原 沓 沓 得 罪 祂；

17b　　　Tī ta-sò ê tuē puē-gi̍k Tsì-kuân--ê ê tsí -ì .
　　　　　在 乾 燥 的 地 悖 逆 至 高 者 的 旨 意。

18a　In sim-lāi tshì Siōng-tè bô lia̍h tsuè sím-mi̍h,
　　　伊 心 內 試 上 帝 無 掠 做 什 麼，

18b　　　Tsiàu in ka-kī só͘-ài--ê kiû tsia̍h-mi̍h.
　　　　　照 伊 自 己 所 愛 的 求 食 物。

19a　In lām-sám gī-lūn Siōng-tè , kóng lâi kóng khì,
　　　伊 濫 糝 議 論 上 帝，講 來 講 去，

19b　　 Tsuân-lîng ê Tsú tī khòng-iá kiám uē pān-toh tshiáⁿ peh-sìⁿ ?
　　　　　全 能 的 主 在 曠 野 豈 會 辦 桌 請 百 姓？

20a　I bat phah tsio̍h-puâⁿ hō͘ tsuí tshìng-tshut,
　　　祂 曾 拍 石 磐 使 水 沖 出，

20b　　　Hō͘ kang-hô muá-tshut;
　　　　　使 江 河 滿 出；

20c　I iā uē siúⁿ-sù bí-niû mah ?
　　　祂 也 會 賞 賜 米 糧 嗎 ？

20d　　 I iā uē kā I ê peh-sìⁿ pī-pān bah mah ?
　　　　　祂 也 會 給 祂 的 百 姓 備 辦 肉 嗎？

21a　Só͘-í Iâ-hô-hua thiaⁿ-kìⁿ tsiū siū-khì,
　　　所以 耶 和 華 聽 見 就 怒 氣，

21b　　　Tsiū ū iām-hé sio Ngá-kok ê tuē-ki ,
　　　　　就 有 燄 火 燒 雅 各 的 地 基,
　　　　siū-khì tī Í-sik-lia̍t-tso̍k huat-khí. 　　
　　　怒 氣 在 以 色 列 族 發 起。

22a　In -uī in m̄ sìn-ho̍k Siōng-tè ,
　　　因 為 伊 不 信 服 上 帝，

22b　　　M̄ uá-khò I ê kiù-un lâi sit-bê .
　　　　　不 倚 靠 祂 的 救 恩 來 失 迷。