《宋澤萊ê台文蕃薯園》

 | | | 轉寄

日據初期官方對台語ê態度án怎？Kám有像戰後ê國民黨打壓台語ê行為？來台日本人對in bē曉講台語ê感覺án怎？來台ê國民黨kám有tsit種感覺？

作者 宋澤萊, 台譯：Lîm TsùnIo̍k/林俊育 2022.09.25

●日據初期來台日本人漢文家首席：籾山衣洲ê散文kah思想● ﹝註：籾山衣洲=もみやま いすう=Momiyama Ishuu﹞

【題目】日據初期官方對台語ê態度án怎？Kám有像戰後ê國民黨打壓台語ê行為？來台日本人對in bē曉講台語ê感覺án怎？來台ê國民黨kám有tsit種感覺？

──籾山衣洲漢文白話翻譯一篇〈台語類編敘〉！

◎宋澤萊譯

踏話頭：

先紹介籾山衣洲ê一生大概。

籾山衣洲1855年出世tī日本愛知縣，少年ê時學詩，bat擔任《東京朝日新聞》主編。1874年去東京求學，bat學英語、經濟學，而且入漢詩人松塘ê門下學習漢詩文，1877年考大學，可惜無考tiâu，回鄉。1995年擔任《東京朝日新聞》漢詩編輯。1898年應《台灣日日新報》邀約，來台灣擔任報社漢文版主任。1899年tòe兒玉源太郎南巡彰化。協助總督tī「南菜園」召開詩人雅集，有編輯一本《南菜園唱和集》，然後一家人借tòa tī「南菜園」一角，算是兒玉源太郎ê文膽。1902年kah中村櫻溪、館森鴻創立「文瀾會」。1904年破病tńg去日本治療。1905年去Tsiná天津擔任《北洋日報》主筆。1906年到Tsiná保定軍校擔任教官。1912年tńg去日本大阪，tī中國7年kahná經歷一場極大極久長ê風霜。1914年koh再來台灣，人事已經kah以前完全無仝，只好koh tńg去日本。1919年別世，享年65歲。
●
伊是日治初期，來台漢文家ê首席，根據中村櫻溪ê看法，伊是siōng受台灣詩人尊崇ê日本漢詩人，詩藝非常傑出。伊ê詩風清麗有色彩；散文對外境ê描寫ná親像潑墨山水。伊是一个「中﹝日﹞體西用説」ê學人，主張台灣士紳無應該koh再寫八股文，應該追求西學，tsiah免得被時代淘汰。一生出外走tsông，無真得志。
●
下kha是籾山衣洲為台語研究書籍《語學類編》所寫ê一篇序文，登載tī 1902年二月14日《台灣日日新報》第一版。中間thang看tio̍h日本人對台語ê友善態度，大部分來講，日據初期來台ê日本人真迫切想beh學習台語，只有ánne，日本人tsiah可能kah台灣人達成有效ê溝通。Tsit種見識比較kah戰後歷年來國民黨tī學校教育kah影視界全面消滅、打壓台語有差大碼，mā是賢kah不肖（putsiàu）之別。來台日本人因為無真gâu講台語，感覺無比ê操心見笑kah kui面全汗；來台ê國民黨人無真gâu講台語，卻想beh hip死台語，到tsitmá lóng iáu未後悔kakī ê行為，前到taⁿ m̄ bat講句道歉ê話，真正是不可思議！
※
〈台語類編敘〉白話翻譯 我bat講tio̍h學習無仝國度ê語言，ná親像進入河流學習駛船。真gâu理解無仝國度語言ê人，雖然面對蠻夷之邦ê人，mā ē tàng直接了解in ê心意；tio̍h算kahná真gâu駛船ê人，雖然tú tio̍h大風湧，mā ē tàng去到對岸，假使欠缺tsit種本等，ánne雖然kantaⁿ隔一條小水流，tio̍h算ē tàng清清楚楚看tio̍h對面ê人物雞犬，到siōng尾iáu是無法度kah in得tio̍h連繫來聚集做伙；tio̍h算ē tàng睏做伙，卻mā kantaⁿ ē tàng相借問，無法度開講，kantaⁿ ē tàng相見卻無話講，kahná喪氣ê啞口。Ai-ah！Ánne kah相隔千里外ê兩人koh有啥物差別？所以歐美各國，普遍掠準學習語言是真重要ê，往往有通達五、六國語言ê人，siōng少mā不只二、三國，in ê用心真大！
●
日本領台以來已經八年，近來ē tàng講台語ê人，連續出現，研究語言ê學者to̍h kahná奔走tī民間ê人，mā iáu bē少。M̄ koh學者ê程度深淺無一致，大多數是優點kah劣點並存，iáu未看tio̍h ē tàng集大成ê人，這是初學者ê毛病。中堂謙吉君來台已經幾nā年，專攻語言學，尤其專精音韻上，伊有編輯一本台語研究書籍，叫做《語學類編》，凡若音韻上ê正確á是錯誤，語言ê正偏，以及會話等等ê篇章，lóng有分門別類，詳細kā它考核，顯露其中ê精微，siōng盡力ê iáu是tī音韻ê研究上，大多數to̍h是我所謂ê集大成ê學者。伊無gōa久teh beh kā tsit本冊稿刻刊出版，先kā稿件the̍h來請我寫序。
●
Ai-ah，我是一个台語ê啞口，tsit本冊ná tio̍h等待我kā它寫序？ M̄ koh古早人講：「半遂ê人永bē bē記得tio̍h khiā起來，眼盲ê人永bē bē記得tio̍h看物件。」我雖然患tio̍h啞口症頭，kám講無想beh講話ê願望？Koh khah何況世間ê少年人當teh意氣高揚，身負有為ê天分，kám ē tàng hō͘ in kah我仝款患啞口症頭？假使有人ē tàng用tsit本冊做渡船，就ánne tùi渡口進入河道，koh tùi河道航行到海面，對岩礁所在ê位置，水流激烈ê所在，lóng ē tàng深入了解，ánne to̍h親像一台快船ē tàng破浪疾行，tsìn前喪氣ná親像啞口ê人，to̍h ē tàng縱橫談論，無所障礙來盡量講出kakī ê心懷！所以講tsit本冊m̄ nā ē tàng 利益初學者，mā兼thang安慰kah我仝款患啞口症頭ê人ê心境，這kám講m̄是一件thang歡喜ê tāitsì？我因為ánne寫序了後，kā冊稿還hō͘伊，tsit年是壬寅年（譯註：1902年）春天二月某日。衣洲籾山 逸寫序tī南菜園ê花竹扶疏處。
※
〈台語類編敘〉籾山衣洲原文言文

※請查閱廖振富、張明權選注：《tī台灣日本人漢詩文集》【出版社：國立台灣文學館 ； 出版日期：2013/11/01】一書。