《Tui3台語開始》

 | | | 轉寄

聖經百科全書─彼拉多kap耶穌ê死、安息日

作者 張德麟 2008.08.24

彼拉多kap耶穌ê死

耶穌hō͘公會(猶太人ê 最高法庭)審判ê時，罪名是：侮辱了上帝。Tsiah-ê公會裡面ê人想beh判耶穌死刑，但是hit時in是羅馬帝國ê殖民地，無判人死刑ê權利。所以，in將耶穌轉送hō͘羅馬總督彼拉多。In mā知影彼拉多bē受理tsit種宗教爭執ê案件，koh-khah bē判耶穌死刑，所以就捏造耶穌ê罪狀，告伊是政治犯，罪名是：(1)耶穌是革命份子，(2)伊傓動人māi納稅，(3)自稱是王(參看路加福音二三章第二節)。

彼拉多實在m̄相信耶穌是政治犯。伊一直想beh放耶穌。譬喻講，那時tsūn是搬過節。照慣例，ē-sái放一個罪犯。彼拉多就kā耶穌kap一位重刑犯巴拉巴排作伙，問群眾beh釋放tó一位。無想tio̍h群眾大聲叫講：「beh巴拉巴，無愛耶穌。」到最後，彼拉多無辦法，只好用「洗手」來表示伊kap tsit-ê tāi-tsì無關。

傳說講，到今á日，彼拉多ê鬼魂iáu重覆洗手ê動作。彼拉多認為伊洗了手就逃避了責任。伊無想tio̍h，當一個人應該釋放一個人，卻逃閃伊ê責任，並將tsit-ê tāi-tsì交hō͘別人去解決ê時，別人所做ê決定lóng kap伊有關。

教會史真清楚 kā咱講，彼拉多kap耶穌ê死絕對有關係。使徒信經án-ne講：「咱ê主……tī本丟彼拉多任內受苦，釘ti十字架。」


安息日

有一kuá人講：「因為十條誡中kā咱講當守安息日，所以禮拜日咱愛去禮拜堂敬拜上帝。」十誡中kā咱講當守安息日無錯。禮拜日當去禮拜堂mā無錯。但，認為禮拜日就是安息日卻是m̄-tio̍h ê。因為安息日是禮拜五日落ê時到禮拜六日落ê時，並m̄是現在ê禮拜日。

安息日，猶太人寫真tsē ê律法。譬喻講，這一工行路無應該該超過三分之二公里，這一工若有人受傷，干單ē-tàng 簡單包khang-tshuì，bē-sái buah藥膏。為什麼neh？因為猶太人認為tsiah-ê lóng是「作工」，lóng是不守安息日ê行為。甚至有一kuá koh-khah極端ê派別竟然m̄准人去便所。Tsiah-ê人án-ne做，kā一個輕鬆平安ê日子變做重擔。

耶穌尊重律法，但伊並無死守律法。伊甚至為tio̍h安息日ê律法kap法利賽人衝突過。譬如馬太福音十二章中記載，有一pái耶穌到了一座猶太人ê會堂。Hia有一個人，伊e5koo-tâ。耶穌無tshap hiah-ê條文縟節，醫治hit-ê人。結果法利賽人非常無歡喜，就「計謀攻擊耶穌。」耶穌做tsiah-ê事ê siōng基本想法是：「安息日是為tio̍h人設立ê，人m̄是為安息日設立ê。」

耶穌復活昇天後，初代教會ê基督徒本來iáu守安息日，但漸漸改tī「主日」(就是現在ê禮拜日)崇拜。而且耶穌是tī禮拜日復活ê，基督徒koh tī這一工聚集紀念伊，漸漸，主日就代替了安息日。