《Tui3台語開始》

 | | | 轉寄

聖經百科全書─願你的聖名受尊崇、悔改

作者 張德麟 2008.09.21

願你的聖名受尊崇

主禱文中kā咱講應該án-ne祈禱：「願你的聖名受尊崇。」tsit句話是什麼意思neh？

Tsit句話中有一字真要緊，就是「聖」。平常咱講某某人是聖人，是講伊ê倫理行為真好。但是聖經用聖tsit字ê時，伊ê意思卻m̄是án-ne。聖經中「聖」ê原意是「分別」。Tī希伯來人ê觀念中，一件物件是聖ê，意思是伊kap其他物件有分別；祭壇是聖ê，因為伊ê存在kap其它ê存在有分別；祭司ê工作是聖ê，因為這工作kap其他職業有分別。

Án-ne，咱就知影「願你的聖名受尊崇」ê意思leh。耶穌是講，上帝ê名應該khǹg tī一個獨一無二ê位置。伊kap世上ê君王有分別，因為伊是君王ê君王。伊kap世上ê教師有別，因伊是所有教師ê教師。伊kap世上ê法官有分別，因為伊是所有世上法官ê審判者。


悔改

主後三百五十四年十一月十三日tī北非出世了一位偉大ê神學家，伊ê名叫奧古斯丁。

奧古斯丁少年ê時真聰明，年紀輕輕就作到大學教授。但是伊ê生活相當敗壞，十七歲ê時就犯姦淫罪kap一個女子同居。伊一面追求真理，一面放縱情慾，tsit件事hō͘伊心中感覺不平安。伊看過一kuá基督教ê修道士，無什麼學問卻ē-tàng過一個聖潔ê生活，ah伊tsit-ê大學者suah無辦法。Tī tsit種自責聲中，有一pái伊tī伊羅馬ê厝裡ê花園中散步，聽tio̍h厝邊gín-á有聲teh講：「the̍h起來讀！」就 án-ne伊the̍h起一本聖經，phah開，裡面án-ne寫：「咱ê行為tio̍h端正，親像tī日時teh生活，m̄ thang放縱酒醉，m̄ thang好色、放蕩、m̄ thang相爭、怨妒。」(羅馬書十三章十三節)讀了tsit段經文了後，奧古斯丁心中有了真實ê平安。伊感受tio̍h上帝ê能力進入伊ê心中，hō͘伊克服罪惡。到落尾，伊成做一個偉大ê基督教會ê思想家。

Tsit種ê事件tī基督信仰中叫作「悔改」。意思to̍h是：轉離罪惡，歸向上帝。 施洗約翰ê講道中就常出現tsit-ê主題。附帶beh講ê是，悔改絕對m̄是一種精神狀況而已，伊必然會結出悔改ê果子。所以一個人悔改ah，伊m̄-nā有情感ê憂傷；siāng，伊mā會有生活上ê改變。