《Tui3台語開始》

 | | | 轉寄

上帝kap咱同在

作者 張德麟 2008.06.15

1.上帝kap咱同在 經文：以賽亞七章一到十六節 主前八世紀，tī現在ê兩河流域有一個大帝國名叫亞述。Tsit-ê帝國有統一世界ê野心。當時想beh統一世界，tio̍h ài先the̍h lo̍h埃及。想beh the̍h lo̍h埃及，tio̍h ài先克服二帝國中間ê三個國家：敘利亞、以色列、猶大。

敘利亞kap以色列為tioh8tsit ê事組織軍事同盟，in期待猶大mā會凍加入。但是當猶大王亞哈斯執意m̄肯ê時，敘利亞kap以色列二國就興兵攻打猶大，這就是以賽亞七章一到九節ê背景。

當時猶大國ê先知是以賽亞。以賽亞對亞哈斯王講，你現今ê態度，m̄是靠家己，mā m̄是靠遠遠ê亞述，單單是ài hō͘家己khiā tī永遠ê磐石頂。上帝beh幫助你，hō͘你無振動。以賽亞kā亞哈斯王講，有一個記號beh為tsit ê事件來出現，就是亞哈斯ê皇后會生一個查埔gín á，tsit-ê gín á tī「ē-tàng分別是非ê時tsūn」，這兩國一定滅亡。(十六節)所以，當亞哈斯王看tio̍h這ê gín-á ê時tsūn，tio̍h確實知，上帝kap大家同在。tsit-ê gín-á ê名就是「以馬內利」，希伯來文ê意思是：上帝kap咱同在。

當馬太福音ê作者tī耶穌基督誕生ê事件頂面，看tio̍h上帝kap人同在ê信仰意義以後，伊引用tsit段文字。作者所使用ê，是一個超越原來事件ê意義。福音書ê作者是án-ne描寫ê：「這一切ê事發生是beh應驗主託先知所講ê話：『你看，在室女ê有身生kiáⁿ，伊ê名beh叫做以馬內利』，『以馬內利』ê意思是『上帝kap咱同在』。」(馬太福音一章廿二、廿三節)

2.一個bat失敗過ê人 經文：使徒行傳十五章三六到四十節 Tsit段經文記載保羅kap巴拿巴冤家。原因是巴拿巴tī第二pái傳道旅行ê時tsūn beh帶約翰‧馬可同行，但是保羅無願意，所以in兩人就家己行家己ê路。

保羅為什麼無願意約翰‧馬可同行？這ài tuì約翰馬可tsit-ê人講起。約翰‧馬可，咱普通稱伊做馬可，一般咱認為伊是馬可福音ê作者。馬可福音十四章五一節有記載一ê青年身軀頂干taⁿ披一塊麻布跟tuè耶穌。當耶穌受掠ê時，掠耶穌ê人mā想beh掠伊。結果伊就tàn落那塊布「裸奔」了。有一kuá神學家講tsit ê青年就是馬可伊家己。馬可厝裡非常富有。耶穌被接升天以後，門徒聚集ê厝就是in-tau(使徒行傳一章一三節)，伊bat是保羅ê同工(使徒行傳一三章一三節)，但可能是對旅途遙遠感覺驚惶，mā可能是富家子弟凍buē tiâu艱苦，tī外口想起厝裡ê溫暖，tī第一pái傳道旅行ê半路伊suan去loh。

當保羅、巴拿巴準備第二pái傳道旅行ê時，「巴拿巴愛behtshua7叫做馬可ê約翰作伙去，m̄-koh保羅想講無適合，因為馬可bat tī非利亞離開in，無繼續kap in做工，in二人意見劇烈沖突，tī-kàu著分開。」(使徒行傳一五章三七、三八節)保羅m̄肯帶馬可，因為伊頂pái ê表現無好，巴拿巴主張帶伊，認為應koh再hō͘伊一個機會。保羅、巴the̍h巴二人為tio̍h這鬧kah bē爽快，各人行各人ê路。事後，咱發現巴拿巴用愛心接納一個悔改者是對ê。根據傳說，馬可後來去北非建立教會，甚至tī保羅後來ê phue信中mā提起伊，希望看tio̍h伊(提後四章一一節)。馬可，tsit位少年人，因為巴拿巴不計較伊以前ê錯誤，tī失敗中重新khiā起來。