《《白袍．白杖》盲人醫師自傳》

 | | | 轉寄

《白袍．白杖》第11章, 愛情是盲目ê

作者 Dr. David Hartman, MD, 台譯：宋麗瓊、林俊育 2018.07.29

Tī tsit本冊裡一再teh出現ê主題是：Tī我所知ê心情中，hông同情ê感覺是siōng-kài害ê。當我回頭看，想beh tshōe出到底是啥人hō͘ 我了解同情ê恐怖ê時，我ē-tàng想tio̍h ê只有tsa-bó͘ gín-á。我聽tio̍h一陣善良ê tsa-bó͘ gín-á ê聲，in講：「Oh！Dave，我真歡喜kah你出去sńg。」M̄-koh，這其實是講：「我真歡喜放棄一个真正ê約會，來陪你出去sńg。」

我會記得tī我讀Gettysburg大學二年ê時，有一个tsa-bó͘ gín-á對我有興趣，她是一个虔誠ê教徒。我the̍h出勇氣beh約她出來ê hit工tú好是「神聖禮拜四」（譯註：Holy Thursday；耶穌最後ê晚餐hit工），所以我講：「Heh！咱今暗同齊去教堂kám好？」她講：「好ā。」當我去接她ê時，她講：「我kā你講，我kā另外一个盲生Miriam講咱beh去教堂，koh請她mā做伙去。」

Taⁿ mā好à！我心內真懊惱，tī去教堂ê路裡，我一句話都無想beh講。阮三人行做伙，明眼人tī中央，兩个依賴她ê盲人，一pêng一个依附tī她邊á，ná親像半遂（piàn-sūi）ê翅股。我一直期待hit暗是一个約會，m̄-koh對她來講，he是一个「tī教堂ê盲人之夜」。

請容允我用一點á篇幅來紹介Miriam。除了lóng是盲人以外，我kah Miriam無啥物所在仝款，m̄-koh，經過一段時間了後，我to̍h漸漸真kah意她，仰慕她。她真gâu講話，真gâu表達，是一个真有才情ê作者（這是我感覺khah弱ê所在），她phah字ê技巧mā真熟練。Kah真tsē藝術家ê靈魂仝款，Miriam對實際kah精確ê科學，lóng無興趣。

人不斷the̍h阮兩人來做比較。In會問講：「Dave，是án怎你hiah-ni̍h積極，Miriam卻m̄是？」無人會因為兩个人kan-taⁿ仝款來自德州，á是仝款主修天文學，to̍h期待in會類似。人會敦促我去「幫贊」她，去鼓勵她khah積極一點á，特別是敦促她去參加大學ê姊妹會。我bat試過一pái。她真有禮貌聽我講，了後真直接kā我講，她無ài聽hiah-ê有ê無ê。結果，幾個月後，我發覺兄弟會之間虛假偽善ê人際關係，就離開兄弟會。我想beh講ê是，雖然我kah她lóng是盲人，m̄-koh，這並無表示阮一定有真tsē共同點。

我ài koh補充一點。Tī我大學二年ê時，學校有收一个盲人新生，名叫做Max。伊厝裡ê人專工來tshōe我，問我講：「盲生讀大學大概是啥物情況？伊應該知影啥物？」

我講：「Siōng重要ê tāi-tsì之一是，Max tio̍h建立一个好ê社交生活。成績好是真好，m̄-koh你無法度親像和尚án-ne生活，mā tio̍h ài有快樂ê生活。伊應該參加兄弟會，邀請tsa-bó͘ gín-á出去約會。」 Max確實tùi我ê經驗學tio̍h真tsē；伊參加兄弟會，koh sńg kah真快樂，suah大學一年無讀完to̍h hông退學。

想beh依賴tsa-bó͘人ê hit種誘惑―ná親像咱lóng bat依賴老母仝款―加減會吸引每一个tsa-po͘ 人，對盲人尤其明顯，因為伊依賴ê程度大大超過一般人。好運ê是，我有phah拚hō͘ 我安然通過誘惑，koh學會曉去抵抗hit種誘惑，這tio̍h感謝兩个tsa-bó͘ gín-á，我kah in lóng差一點á to̍h論到婚嫁。

Laura可能是我ê第一个戀人，我愛慕她。她ê身koân約四呎十一吋，溫柔，有一點á無自信，有ha̍h耳迷人ê聲音，而且非常虔誠。伊ê老父是受按立ê福音派牧師，平日做卡車司機，是一个粗魯、ná勞工階級ê人。事實上，我kah Laura是tī一个宗教營會裡熟似ê，當時她iáu是一个高中三年ê學生。

Laura會用無窮盡ê耐性為我報讀。她會預見我ê需求，一切按照我ê想法做tāi-tsì，絕對bē hō͘ 她ê意見（若是有）來干涉。我ē-tàng看tio̍h她ta̍k工早起歡歡喜喜開車送我去辦公室，下晡koh來接我，hit中間閒落來ê時間，她lóng bē埋怨。若是我想beh tiàm厝內，她to̍h會tī厝裡做裁縫；若是我想beh出外，她mā真歡喜陪我出去。Án-ne ê tsa-bó͘ gín-á，啥人bē ài leh？

有兩个阻礙hō͘ 阮無法度koh繼續交往落去。第一，beh去見Laura真麻煩，因為in tau離Gettysburg約有一點鐘ê車程，我一定tio̍h ài拜託阮老父á是Wayne開車來Gettysburg，koh再載我去到她tòa ê城鎮，了後in tio̍h tī hia等我kui暗，tsiah koh載我tńg去厝裡。Tī tsit種不利ê條件之下，戀情無容易發展。第二，有一工tī海邊，她坦白kā我講：「我一定tio̍h ài kā你講，Dave，阮老父無歡喜我kah盲人約會。」

我真歡喜發見家己m̄-nā bē受氣，koh顛倒感覺真心sik。Tsit-ê tsa-po͘人teh關心in tsa-bó͘-kiáⁿ未來ê經濟問題，卻擔心她kah一个beh成做醫生ê人做伙會受iau餓！後來我tsiah知影，Laura ta̍k pái beh kah我出去ê時，lóng tio̍h對厝裡ê人講白賊，講她是beh去別位。我kah父母有親密koh信任ê關係，這hō͘ 我真oh得想像介入Laura kah in老父之間；我真正做bē到。Laura講她ǹg望我ē-tàng到in tau食暗頓，kah in老父見面，koh hō͘ 伊kah意我。

我坐火車去Laura ê厝，koh tī hia度過一工。Siōng尾我the̍h出勇氣，問in老父tsìn前是m̄是bat tú過盲人，伊回答講：「當然mā bat。我tī費城市中心ê街角bat見過一个盲人，手gia̍h一支柺á，koh the̍h一个杯á。」Tī伊ê想像中，盲人所ē-tàng做ê to̍h是做乞食。

Tī某一kóa方面，盲人kah烏人真類似。人是有成見ê，m̄-koh，類似ê中間有真明顯ê差別。烏人hông貶kē，hông忽視，有時koh hông排斥；種族差異激起人性中siōng-bái ê一面。盲人ê情況tú-tú顛倒。盲人會激起別人ê禮貌、親切kah關心；只有心性極pháiⁿ ê人tsiah會對盲人作孽（tsok-gia̍t）。所以，tùi某種意義來看，烏人ê處境比盲人koh khah艱難。M̄-koh，無論兩者之間是m̄是有存在差異，烏人kah盲人之間有一種自然產生ê親切感；in lóng是hông排斥ê人。Tī病院裡，我感覺烏人病人tī某種程度上kā我當做仝類來接納我，這hō͘ 我感覺真溫暖。

頭一pái tī Laura in tau做客ê暗時，我頭一pái kah in老父見面，hō͘ 我對Laura有koh khah深刻ê了解。她ê老母tī幾年前to̍h往生，她ê老父tī厝裡扮演強者ê角色。「The̍h這 hō͘ 我，the̍h he hō͘ 我。鹽罐á空ā，去kā它添hō͘ 滿。」Laura安於扮演服從ê角色。

幾禮拜後有一工暗時，當阮單獨做伙開講ê時，我tsiah真正了解我對Laura「服從者」角色ê看法。Hit時，她對一kóa tāi-tsì感覺心思煩亂，suah開始啼哭，我講：「親愛ê，來我tsia。」忽然間，我發覺tī阮ê關係中間，我已經成做主人；她tsit-má teh服從我，to̍h ná親像她teh服從in老父仝款。Án-ne對她kám好？對我kám好？

Laura ê世界kah我ê世界ê差別jú來jú明顯，tsit段關係自然就án-ne漸漸退色。

Kah我差一點á to̍h結婚，結局卻相閃身ê是Dolores。她ê家境富裕，tòa tī Tsestnut Hill四十四英畝大ê土地頂面，hia是全世界siōng適合khiā起ê所在之一。她比我大二歲，我讀大學ê時，她當teh修碩士學位。年歲比我khah大一點á ê tsa-bó͘ gín-á真吸引我，這可能是因為阮阿姊大我二歲ê關係。若是你有一个比你khah大一點點á ê阿姊，她tī你細漢ê時，不時teh講：「等你大漢了後，你家己to̍h會知影。」Án-ne，大一點點á to̍h是一件真不得了ê tāi-tsì à。

Kah Dolores有關ê所有tāi-tsì lóng是真美妙ê，而且he mā應該會是一場美滿ê婚姻。她是我見過siōng有組織能力ê tsa-bó͘ gín-á。我會記得有一pái，我ê眼蓋刺激tio̍h目tsiu ê時，我示範hō͘ 她看我án怎混合一種溶液來減輕我ê痛苦。我kā矸á hē tī水槽ê一个角落，tī心內記tiâu它kah水道頭ê相對位置；我lóng是án-ne teh記物件ê位置。Dolores the̍h一張紙來，寫hit-ê溶液ê名，了後貼tī矸á頂面，免得有人the̍h m̄-tio̍h。Án-ne ê小事hō͘ 我印象深刻，koh hō͘ 我非常有安全感。她mā幫贊我tī圖書館查資料，做我想beh做ê一切tāi-tsì，kā照顧我當做是快樂。這真正是完美ê結合。

唯一ê問題是，我無法度愛她；我m̄知是啥物原因。Dolores ê個性真積極，外表粗勇，he kiám-tshái會hō͘ 其他ê人非常kah意她。我kah意她，甚至mā ē-sái講是用某一種方式teh愛她，m̄-koh to̍h是無法度愛入骨。你beh án怎解說leh？

我是tī統計課認bat Tseri Wallker―hit-ê後來kah我結婚ê tsa-bó͘ gín-á。Hit當時她大學二年，我三年。我知影她非常聰明、真有活力koh外向，而且以小khóa oh得預測kah神經大條出名；我mā知影她生做細粒籽，講話聲音愉快，koh人緣好，一切lóng符合我ê口味。M̄-koh，可能to̍h是因為她人緣siuⁿ好，致使我m̄-bat想過beh引起她ê注意，因為她根本都 m̄-bat hō͘ 我機會，我mā認為kah她交陪bē起。而且，她tī學生會真積極，hō͘ 我koh khah感覺她hō͘ 學生會ê活動纏絆，其他ê人根本to̍h無機會。我是Sigma Tsi兄弟會tī學生會ê代表，有時會khiā起來發表一kóa意見；m̄-koh，tùi高中時代做學生會幹部ê經驗，我得tio̍h ê結論是：學生會組織是極其無聊ê，所以，我並無認真teh參加學生會ê會議。 了後有一工，真正是料想bē到，tī代表會議結束了後，我感覺有一支柔軟ê手搭tī我ê手股頭頂面，koh聽tio̍h Tseri ê聲講：「Dave，我有tāi-tsì想beh kah你談。我當teh競選學生會秘書長，阮ê候選人名單頂面iáu欠一个副主席，你kám有興趣參加競選？」

準講我無想beh參選，我iáu是歡喜kah起激動。為tio̍h beh繼續kah Tseri講話，mā想beh藉tio̍h對她ê tāi-tsì表示關心來巴結她，我講：「Ai-ah！我ê好朋友Bob Klein是學生代表，我真願意去問伊是m̄是beh參選。」（Tseri後來kā我講，她有受tio̍h傷害。她講：「我真正m̄相信你會án-ne講。我想盡所有ê辦法，tsiah tshōe-tio̍h一个藉口來認bat你，你卻kan-taⁿ會曉講：『我會kah我ê朋友講。』我想，Uah！我真正hō͘ tsit-ê人三振出局ā。」）

Hit pái交談ê結果是一場兩對男女ê約會，he是我一生中，mā有可能是人類歷史上，siōng複雜koh siōng混亂ê一pái約會。我真早to̍h bat答應過Wayne，為tio̍h表示我ê敬意，我會邀請伊來Gettysburg大學，而且安排伊kah校園裡siōng-kài理想ê tsa-bó͘ gín-á約會；我當時認為siōng-kài理想ê tsa-bó͘ gín-á to̍h是Tseri，m̄-koh beh kā 她紹介hō͘ Wayne kah-ná無gōa適合，因為Tseri已經清楚表示對我有興趣。所以，我決定選擇Tseri做約會對象，koh為Wayne紹介另外一个非常迷人koh活潑ê tsa-bó͘ gín-á，她是koân我一年ê同學。M̄-koh，hit-ê tsa-bó͘ gín-á無答應，講她真無閒。最後我只好kā Tseri紹介hō͘ Wayne；m̄是kā Wayne紹介hō͘ Tseri。Tseri講：「當然ē-tàng，我會kah Wayne做伙出去。」了後，我為家己另外tshōe-tio̍h一个約會ê對象。M̄-koh，tī約會tsìn前兩工，我ê約會對象講她無法度來。我只好koh去tshōe Tseri，問她講：「妳kám ē-tàng為我安排一个tsa-bó͘ gín-á？」結果她有tshōe-tio̍h一个。

Hō͘ kui个劇情變kah koh khah複雜ê是，我起初邀請Tseri ê時是講：「你kám願意去kah我ê朋友Wayne『盲約會？』（譯註：blind date；由第三方紹介，為互相無熟似ê男女安排ê初次見面）」

Tseri問講：「你ê意思kám真正是講tsheⁿ-mê ê約會，是kah盲人約會？你ê朋友kám是盲人？」 作孽ê念頭一時控制了我ê嘴舌，我回答講：「無m̄-tio̍h，伊是一个盲人。」

我kā Wayne講tsit段經過，了後阮決定beh kā戲演到底；伊提早來到我ê房間，kā我借一支盲人柺á，koh戴一副深色ê目鏡，án-ne，hit兩个tsa-bó͘ gín-á to̍h看bē-tio̍h伊活lêng-lêng ê目tsiu。

Wayne真正是有夠gâu。伊感覺tio̍h Tseri ê無自在，她不時笨腳笨手，因為這是她頭一pái teh引tshōa「盲人」；Wayne iáu察覺tio̍h別項。Kiám-tshái Tseri有察覺出Wayne ê動作無gōa自然，可能是因為除了「tsheⁿ-mê」以外，她對Wayne ê其它一切lóng m̄知，所以，她對Wayne ê反應，to̍h ná親像失明to̍h是wayne ê一切仝款；m̄-koh，她是kā我看做一个人，對我ê了解khah tsē。Wayne試beh用笑話，kah失明有關的笑話來hō͘ 她放輕鬆。無經驗ê Tseri有時會hō͘ Wayne去lòng-tio̍h柱á á是椅á，了後她就會一直會（hōe）失禮；Wayne會講：「無要緊，無要緊，這需要一點á時間學習。對我來講，這是真sù常ê tāi-tsì。」伊講in ê校園有一支電火柱，引tshōa伊ê人tiāⁿ-tiāⁿ會hō͘ 伊去lòng-tio̍h hit支柱á。了後伊koh用無可奈何ê語氣補充一句講：「我tī柱á頂面hō͘ 我lòng lap去ê所在做記號，看我是m̄是有jú來jú koân。」

暗頓了後，阮來到我ê房問，用我ê點字紙牌sńg「紅心大戰」（譯註：Hearts，是一種四个人sńg ê撲克牌遊戲，看啥ē-tàng得tio̍h siōng少ê紅心）。Wayne tùi我ê經驗裡得tio̍h靈感，伊叫Tseri輕輕á khà糞埽桶，了後我tàn一个麥á酒罐á；「乒」一聲，入去à。 當Wayne kah我有機會tī房間外單獨做伙ê時，阮認真參詳，看beh án怎來結束tsit齣戲，beh án怎hō͘ tsa-bó͘ gín-á知影Wayne是一个看會tio̍h ê人。阮想tio̍h tòa隔壁ê同學有一領希臘式ê「Sigma Tsi」兄弟會ê長袍，ē-sái請伊穿hit領長袍行入來我ê房間，表演一套宗教儀式，了後宣告講Wayne看會tio̍h à。

Siōng尾，阮決定安排一kóa koh khah巧妙ê劇情。Wayne kā深色目鏡the̍h落來，掛伊家己ê目鏡，koh向tsa-bó͘ gín-á解釋講，伊有時會掛一般ê目鏡，幻想家己看會tio̍h。伊會kah其中一个tsa-bó͘ gín-á目對目幾秒鐘；正確無誤ê烏仁對烏仁ê注視；了後，當伊發覺hit-ê tsa-bó͘ gín-á開始緊張ê時，伊ê目tsiu tio̍h會恢復正常，目神變做柴柴。Tseri開始懷疑。後來，Wayne ê目神接觸是hiah-ni̍h直接，致使Tseri完全確定Wayne是一个明眼人。

Tseri開始大聲笑，我mā禁bē-tiâu大聲笑，連Wayne mā笑出聲，了後Tseri笑kah koh khah大聲。我ê約會對象一直無出聲，一直到最後tsiah問講：「是啥物hiah-ni̍h好笑leh？」 Tùi he了後，Tseri kah我之間to̍h khah自在ā。Hit暗tshun落來ê時間，我成做她講話ê主要話題，koh不時用她柔軟koh幼秀ê手來摸我ê腳頭u，hō͘ 我感覺非常激動。

這kui个好笑ê經驗中有趣味ê所在―事實上，是hit-ê無趣味ê部分―to̍h是它hō͘ 我感覺有一點á鬱卒。Wayne ē-sái講：「我tsit-má失明。Abracadabra（譯註：美式咒文），tsit-má我看會tio̍h à。」M̄-koh，我無法度。M̄管我tī班裡成績有gōa好，m̄管我ián倒gōa tsē相ián對手，我ê失明猶原是會hō͘ 異性失去興趣ê缺點。Tsa-bó͘ gín-á頭一件了解我ê tāi-tsì，to̍h是我ê失明；而且in大部分ê人，當想tio̍h我ê時，想ê mā大部分kah失明有關係。我bat夢想家己忽然宣布我看會tio̍h à，koh看tio̍h hiah-ê bat拒絕我ê tsa-bó͘ gín-á突然表現出一副後悔ê模樣。我會先kā啥人講leh？我是m̄是會先假做看bē-tio̍h，了後tī一个siōng適當ê時機宣布我看會tio̍h？我是m̄是會有男子氣慨，行到hiah-ê tsa-bó͘ gín-á面前―早前in因為我ê失明tsiah拒絕我，tsit-má卻對我傾心愛慕―了後冷酷ua̍t頭行開，享受勝利ê滋味？

我ê鬱卒感是無法度逃避ê。我笑，m̄-koh無法度一笑（it-tshiàu）解千愁。以後ê hit幾工，我不得不一再思考tsit-ê問題。我頭一pái受tio̍h tsit-ê認知ê打擊，而且tsit pái我一定tio̍h ài接受tsit-ê認知：我真正ǹg望我家己看會tio̍h。我koh進一步意識tio̍h，而且接受一件事實：Tùi八歲起，我to̍h用真tsē精力去壓抑（a̍h-ik）hit-ê隱藏tī家己意識中ê hit-ê慾望kah認知。

幾工後我收tio̍h Wayne ê phue，其中有一大段是beh寫hō͘ Tseri-.ê。根據長期kah我密切來往ê經驗，伊beh批評Tseri認為伊是盲人ê時ê表現（真明顯，Wayne有預感，Tseri kah我是命中註定beh做伙ê）。Wayne對Tseri指出，tī她iáu認為Wayne是盲人ê時，她siuⁿ過友善，siuⁿ過外向，koh感覺koân伊一等；了後，當伊表明伊看會tio̍h ê時，「你開始親像對待一般人án-ne teh對待我。」

Hit工暗時，Wayne深受啟發。因為準講伊有我tsit-ê多年ê盲人好朋友，mā早to̍h學會曉kah任何人mā仝款放輕鬆來交朋友，m̄-koh，阮ê小作孽iáu是有hō͘ 伊機會體驗tio̍h盲人ê感受。

幾禮拜了後，阮三人koh再聚集做伙，無禁無忌（khī），開懷講起頂pái ê經驗kah Wayne ê phue。Tseri提出一kóa有力ê觀點，hō͘ Wayne ê看法suah變成無意義。其中一點是，Wayne m̄是盲人，而且Tseri kui暗lóng有怪怪ê感覺；因為她無法度解說hit種怪怪ê感覺，kiám-tshái suah hō͘ 她反應過度。第二點是，她kah Wayne畢竟是盲約會，她tsìn前lóng m̄-bat見過Wayne，對伊mā一無所知，所以，她kan-taⁿ ē-tàng針對「伊是盲人」tsit點來對伊做出反應。

她ê辯護是正確ê，因為tī阮私下接觸tsìn前，Tseri對我to̍h已經非常了解；她bat tī上課中，kah tī學生會議中觀察過我，而且tī阮正式交往以後，我lóng m̄-bat感覺她對我ê失明有先入為主ê偏見。M̄管án怎，Tseri發見Wayne ê phue對她有一kóa幫贊，mā hō͘ 她感覺有一點á受氣；tùi hit-tia̍p開始，她知影若是beh密切參與一个盲人ê生活，她一定tio̍h ài kā家己好好á調整到盲人kah明眼人之間，hit種微妙ê互動關係。因為她hiah-ni̍h清楚hit種微妙關係，所以，Tseri後來bat受邀請去社區團體演講，談論án怎有效kah盲人á是其他殘障者做伙。

Tī hit pái兩對男女約會後ê第三工暗時，Tseri kah我頭一pái單獨約會，he是一个值得記念ê禮拜五。我邀請她去看學生製作ê舞台劇―《Án怎tī sing-lí場輕鬆得勝》。Hit場演出真tsán，Tseri本能tik，真自在tī我ê耳孔邊細聲口述一kóa舞台頂我看bē-tio̍h ê ta̍p-ta̍p-tih-tih ê劇情，hō͘ 我ē-tàng了解hiah-ê笑詼khue ê台詞，這hō͘ 我感覺koh khah快樂。她知影án怎kan-taⁿ kā必要ê重點講hō͘ 我聽。Hō͘ 我印象koh khah深刻ê是，她知影án怎真sù-sī靠tī我ê肩胛頭，thang好對我講細聲話。我受tio̍h誘惑，真想beh kā手股頭靠（khòa）tī她ê椅背（í-pōe）。我kám應該án-ne？我kám無應該？阮kám會koh khah sù-sī？Án-ne做kám會hō͘ 我ê約會就án-ne結束？

我忽然發見我是坐tī óa近通道ê位置，Tseri kiám-tshái tio̍h ài khi向我tsit pêng，tsiah ē-tàng閃開前座ê人頭。我問她講：「若是咱換位坐，你kám ē-tàng看khah清楚？」她講：「會ā。」當阮換位ê時，我就順手kā手股頭靠tī她ê椅背；她講：「Uah，這是一个大進展neh。」

我驚一tiô。她ê聲音有帶笑意，m̄-koh，我卻感覺ná親像褲làu落來hiah-ni̍h pháiⁿ-sè。我kám應該繼續kā手靠tī hia？Á是tio̍h講一聲失禮？Á是恬恬á kā手sóa開？我想我是繼續kā手靠tī hia，m̄-koh，he確實有hō͘ 我kā腳步放慢。她並無像我想ê hiah-ni̍h大條神經。

了後ê日子裡，tòa tī對面ê一位朋友Bill Dundon開始叫我「高中生Harry」，因為為tio̍h切望beh見Tseri，我開始想空想縫。我會計算她可能經過糖á販賣機ê時間，了後我會tú好tī hia出現；我mā會藉口beh the̍h物件hō͘ 她，去她ê宿舍房間。講tio̍h這會hō͘ 我感覺真gāi-gio̍h，m̄-koh，後來我發見Tseri mā成做「高中生Harriet」。她看tio̍h我tī遠遠ê校園對面ê時，她會衝過草埔走過來，停tī我ê邊á，了後對我講：「Oh！Heh！Dave。」，kah-ná對kah我偶然tú-.tio̍h感覺小khóa歡喜。 Koh來hit-ê禮拜，我tshōa她去看「超級巨星」（Jesus Tsrist Superstar)，了後ê第二工暗時，阮ê關係有重大ê進展。有一个宿舍舉行迪斯可舞會，我無邀請Tseri去，因為我遵照我hiah-ê老練ê朋友kā我建議ê原則：M̄-thang連續兩暗邀請仝一个tsa-bó͘ gín-á出去。所以，我坐tī房間裡，m̄知是beh踢家己，á是beh kā房間ê壁堵當做是hit-ê該死ê原則，án-ne我to̍h ē-tàng tī壁堵頂面踢一个空來出氣。

夜深ā―我甚至無心情讀冊，he原本一直是我閃避社交壓力siōng可靠ê庇護所―我決定ā，tshap-tshap它去啥物原則，我to̍h是beh去phah她宿舍ê門。我驚kah beh死，m̄-koh tī衝動ê催迫下，我iáu是去à。Phah門。Hō͘ 人心碎ê恬靜。

我拖tio̍h沉重ê腳步，行tńg來房間，已經死心，想beh kā頭栽入去耳機kah學習錄音帶中間拚命讀冊。Tī tńg來ê途中，我一定tio̍h經過舞會會場，所有ê人―絕對是所有ê人，除了我以外―lóng tī hia teh享樂；我本來mā ē-tàng kah Tseri tī hia同樂ā。若是我有邀請她，她tsit-má to̍h bē kah別人做伙。我peh起lih樓頂，倒tī眠床。Tú tī beh戴耳機ê時，我聽tio̍h phah門ê聲。

出現ê是Tseri。她不可思議忽然出現，對我來講是siōng óa近奇蹟ê tāi-tsì。Koh khah奇妙ê是，她kā我講，她kah一个名叫做Stan ê人同齊tī舞池裡跳舞；Stan外表英俊，人氣真好，是兄弟會ê高階會員，koh khah免講ê是，伊有20/20 ê好視力kah所有ê一切。Tseri kā我講，她忽然間發見家己無想beh kah Stan做伙，就藉（tsià）口講beh出去一下。她行出來，gia̍h頭看我房間ê窗á，發現燈火無光，suah感覺空虛、心碎，tú親像我去phah她ê門無人應聲ê時仝款。了後她想tio̍h：「伊無需要燈火！」她就án-ne來樓頂phah門。

我tī hia。
她mā tī hia。

到第二年ê春天，Dolores ê優點早to̍h hō͘ Tseri ê魅力取代ā。M̄-koh，Tseri kám是正確ê對象？我愛她，m̄-koh，這kám to̍h是我性命中真正ê愛情？Tio̍h án怎tsiah ē-tàng知影leh？Tio̍h問啥人？我問一位大學ê輔導員，伊講：「M̄免質疑，只要通過感覺kah經驗來做決定。」Tsit-ê建議真正bē bái，m̄-koh無夠具體；hō͘我做決定ê，是我ê宿舍厝邊ê偶然，m̄-koh真有說服力ê觀察：「Dave，beh確定她是m̄是正確ê對象，唯一ê方法to̍h是kah世界上所有ê tsa-bó͘ gín-á約會來做比較。」
是ā！Tsit句話一點á都無m̄-tio̍h。

我買一束小花束（譯註：corsage；pín tī胸前á是肩胛，á是掛tī手骨的小花束）送hō͘ Tseri，tshōa她去Dutts Pantry餐廳食牛排，koh請求她tī隔tńg年ê六月，tī她大學畢業了後嫁hō͘ 我。她雙手kā我lám-.leh，講：「好。」

阮bat間接聽tio̍h人對Tseri ê疑問，tsiah-ê問題是ē-tàng理解ê：是啥款ê心理特質hō͘ 她受盲人吸引leh？她是m̄是意愛生理上依賴她ê伴侶？Tī Tseri出世tsìn前，她ê老母是m̄是bat hō͘ 社工人員咬過？（譯註：親像「蜘蛛人」bat hō͘ 蜘蛛咬過，Tseri tsiah會有hit種特質？）她是m̄是會驚hông注視？（譯註：所以Tseri tsiah會hō͘ 盲人吸引？） Tseri kah我kan-taⁿ tshōe出一个合理ê解釋：她童年有真長ê一段時間tī委內瑞拉（Venezuela）度過，因為in老父bat hō͘ 一間美國石油公司派駐tī hia。當她十三、四歲，美國ê青少年當teh為「貓王」E1vis Presley癲狂ê時，委內瑞拉ê青少年卻是teh為一位熱情ê吉他手kah歌手Jose Feliciano khiú裂in ê頭毛。Feliciano是一个盲人，所以對Tseri來講，失明ê刻版形象並m̄是杯á khok kah khiang-khiang叫ê乞食，卻是性感ê象徵；對她來講，失明點to̍h浪漫史、無可能ê夢想、情慾、世故kah老成（ló-sêng）。

我ná ē-tàng拒絕有tsit種品味ê tsa-bó͘ gín-á leh？ Tseri koh補充一个理由，來說明是án怎我ê失明並無阻礙阮ê浪漫史。她是一个個性強烈ê人，要求家己ê人生ài有方向感kah成就感。Tī她十歲ê時，她有寫一本「冊」來表達她對上帝ê信仰（包括她ê質疑）。她ê冊解說所有有（iú）關宇宙、人類起源，以及差不多其它所有ê重要問題。（Tsit本冊並無完成，因為隔tńg年她十一歲ê時，她ê注意力轉向跳舞。了後Jose Feliciano佔有她，直到她為tio̍h我來放sak伊。）Kah其他大多數誠懇ê少年人仝款，她因為她ê誠懇無hō͘ 別人認真對待suah受到傷害。

Tseri kā我講，tī阮相tú ê時，她將近二十歲，差不多已經想beh放棄tshōe一个有堅持達成目標ê人格特質ê人。她講她tùi我身上看tio̍h tsit種特質，這hō͘ 我歡喜無suah，直到tsit-má iáu是án-ne。因為我tiāⁿ-tiāⁿ擔心―tsit-má有時mā iáu會擔心―我堅持克服困難達成目標ê個性，會hō͘ 我成做一个書呆（tsu-tai），á是hông討厭ê人。當阮兩人開始想講絕對無人會互相誠懇對待ê時，Tseri kah我卻發見，阮之間ê誠懇對待是一件輕鬆koh美妙ê tāi-tsì。