《《白袍．白杖》盲人醫師自傳》

 | | | 轉寄

《專文推薦》 一位視障醫師ê艱辛求學路

作者 張信義 2018.02.11


Kah俊育兄tī波士頓台灣基督教會認bat無gōa久了後，我to̍h發見伊多才多藝、興趣廣泛（huat），特別是伊對視障朋友福利ê鼓吹kah奉獻，hō͘ 我非常敬佩。Tsit pái伊完成《白袍·白杖（White Cuat, White Cane）》ê翻譯初稿了後，請我幫伊校稿，因為伊認為我是精神科醫生，對醫學名詞khah熟似，對醫學生ê苦甘滋味有親身ê經驗，而且對本冊主角哈特曼醫師（David Hartman, M.D.）ê專業―精神科mā khah了解。後來伊koh ài我寫序文，我一向受俊育兄對視障朋友ê奉獻精神感召，所以m̄敢無答應。

讀完tsit本冊了後，我深受感動。Tsit本冊是哈特曼醫師ê自傳，其中m̄-nā記載伊成做美國第一位完成醫學教育輝煌成就ê盲人，koh khah難得ê是伊有描寫伊克服百般障礙，準備申請醫學院、完成醫學教育ê過程，而且用精神醫學ê心理觀點來詳細描寫，koh做中肯ê分析，對視障者á是明眼人朋友來講，這lóng是一本值得來讀ê好冊。

一个活潑、無時定ê tsa-po͘ gín-á，因為視網膜剝離suah視力減退，經過幾pái開刀治療，iáu是無法度挽回伊ê視力；tī伊八歲ê時，終其尾完全失明。手術ê痛苦無算，失明後ê生活發生一百八十度ê轉變，m̄-nā伊家己tio̍h重新適應失明ê生活，連厝里ê人mā tio̍h學習án怎來對待tsit-ê失明ê tsa-po͘ gín-á。伊ê老母用保護弱者ê心態來對待伊，m̄-koh，伊ê阿姊卻激勵伊tio̍h學習自立；關係tsit家人之間複雜koh微妙ê關係，作者lóng有深刻ê描寫kah分析。

當伊teh讀盲人小學以及後來進入一般高中讀冊ê時，伊對視障學生ê教育方針mā有獨特ê感受kah見解。是m̄是tio̍h khah強迫每位視障學生學習編織籃á ê技術，thang準備將來有基本ê謀生技能？Á是應該挑戰每位學生去發揮潛能，鼓勵in訂定khah koân ê目標，免得in浪費才華？伊講假使伊規規矩矩來學編織籃á，á是其它ê盲人傳統工作，伊to̍h會失去以後做醫生ê機會；伊ê看法值得大家去深思、檢討。

當伊表示伊ê志向是beh做一个醫生ê時，除了伊ê阿舅半信半疑，kā伊潑冷水以外，連伊ê父母mā lóng感覺伊是teh做夢，勸伊tio̍h去讀心理學，將來做一個心理治療師；當然koh khah m̄免期待醫學院ê入學審查委員會願意接受伊ê入學申請。伊總共申請十間醫學院，包括哈佛、耶魯、賓州等大學ê醫學院，結果全軍覆沒（hok-bu̍t）；伊iáu保留hiah-ê入學審查委員會寄hō͘ 伊ê拒絕入學信件，並且tī冊中登載出來；伊所受ê打擊，表露無遺。M̄-koh，伊無放棄，而且繼續努力，終其尾有進入添波大學（Temple University）ê醫學院。伊回顧讀大學kah準備申請醫學院ê時，有幾位教授對伊特別關照kah鼓勵，hō͘ 伊非常感激。伊家己以後mā特別關照視障者，並且呼籲社會大眾ē-tàng像伊所感激ê教授仝款，hō͘ 視障朋友有機會發揮in ê潛力。

伊就án-ne開始四年ê醫學生生涯。醫學院ê課程對明眼學生來講都有夠食力ā，咱ē-tàng想像視障學生是beh án怎學習解剖學，beh án怎看病人，beh án怎克服病人kah教授對伊ê無信任？伊tī冊中描寫伊克服tsiah-ê困難ê撇（phiat）步，hō͘人phah桌huah好。

了後，伊畢業à，成做美國（有可能mā是全世界）第一位得tio̍h醫學博士學位ê盲人，新聞、電視熱烈慶賀報導，伊ê成就成做視障朋友ê模範。伊kā伊ê成長kah求學ê過程寫出來，beh鼓勵視障朋友立大志，努力向前，mā beh hō͘ 社會人士減少in對視障者ê誤解kah偏見。