《歷史上ê主耶穌》

 | | | 轉寄

第九章_一 加利利ê傳道歲月

作者 杜英助 台譯：Lîm Tsùn-io̍k 2020.08.09

（公元26年秋天～27年春天）

一）挑選門徒做傳道同工
當耶穌tùi試探山落來ê時，行洗禮約翰koh一pái tú-tio̍h耶穌，就對眾人講：「看ah，上帝ê羊羔，除去世間人罪孽ê…這是上帝ê Κiáⁿ。」（約翰1：29、34）。隔工koh看見耶穌行過伊ê身邊，伊就向伊ê兩个門徒講：「看ah，上帝ê羊羔！」Tsit兩個門徒聽見行洗禮約翰ê見證，就跟tòe耶穌，而且問耶穌：「祢tòa tī tó位?」In to̍h是約翰（約翰福音書ê作者本人）kah安得烈。

安得烈、約翰兩人kah耶穌做伙tùi偤大曠野往北行，直到拿撒勒耶穌tòa ê所在去，當時安得烈to̍h去帶領伊ê阿兄西門來見耶穌。耶穌看見西門to̍h隨時kā伊號一个新名叫做磯法（彼得）。Koh過一工，耶穌想beh往加利利海去，途中tī迦拿tshōe-tio̍h腓力，to̍h對伊講：「來跟tòe我！」腓力kah安得烈、彼得是同鄉，lóng是伯賽大人。伯賽大ê位置是tī加利利海北pêng ê一个漁村，所以，in ê本業lóng是掠魚人。拿但業聽tio̍h耶穌對伊講：「看ah，這是一个真正ê以色列人，伊ê心內無詭詐。」就回答耶穌講：「拉比，你是上帝ê Κiáⁿ，你是以色列ê王！」（約翰1：47～49）

耶穌挑選安得烈、彼得、約翰、腓力kah拿但業五名門徒了後，tī祂tńg來到加利利ê第三工，祂就tshōa in去迦拿參加一个婚宴。Tī宴席進行中，主人ê喜酒用完ā，耶穌ê老母tī hia就kā耶穌講：「In無酒à。」後來，耶穌to̍h對用人講：「Kā缸倒滿水。」結果hit-ê水變成美酒，又koh是「好酒」（約翰2：1～11）。這是耶穌出來傳道所行ê第一件神跡，kan-taⁿ有少數人知影，連主人都m̄知！Tsit項事以後，耶穌ê老母馬利亞、兄弟kah門徒lóng落去迦百農，tòa tī彼得ê丈姆ê厝，開始祂傳道ê事工。

Tùi地理位置來看，加利利海西北岸ê迦百農、伯賽大kah哥拉汛tsit三个所在通稱耶穌tī加利利傳福音ê金三角地區。

當耶穌tī迦百農ê時，祂呼召足足12个門徒；第二批ê門徒是：西庇太ê kiáⁿ雅各（伊是約翰ê阿兄）、馬太、多馬、亞勒腓ê kiáⁿ雅各、奮銳黨ê西門、雅各ê kiáⁿ偤大kah加略人偤大，總共12人。