《歷史上ê主耶穌》

 | | | 轉寄

第九章_四 加利利ê傳道歲月

作者 杜英助 台譯：Lîm Tsùn-io̍k 2020.08.30

四）Tùi耶穌初期ê傳道，眾人看tio̍h啥物？
1）Τī偤太人kah外邦人lām做伙tòa ê加利利地，hiah-ê坐tī烏暗內底ê人民看tio̍h大光；坐tī死蔭之地ê人有發見光照tio̍h in(馬太4：15～16）。M̄-koh，照行洗禮約翰ê門徒mā是耶穌ê門徒約翰講：Tùi上帝hia差來ê行洗禮約翰，tī偤大曠野「beh為光（耶穌）做見證，thang hō͘ 全人類（包含法利賽人kah文士、祭司）聽伊ê話來信。 伊（行洗禮約翰）本身m̄是hit-ê光，kan-taⁿ是beh為hit-ê光做見證。Hit-ê是真ê光，beh來tsit-ê世間kā全人類照光。道已經tī世間，世間通過道來創造，m̄-koh，世間m̄-bat tsit-ê道。道來到家己ê本所在，家己ê人mā無接納祂。」（約翰1：6～11）

雖然約翰肯定講：「Tsit-ê光照tī烏暗中，m̄-koh，烏暗m̄接納光。」（約翰1：5）總是事實卻是：雖然有人tī烏暗裡看見hit-ê光，猶原排斥光照，m̄-koh，「Hiah-ê接納祂ê，to̍h是信祂ê人，祂就賞賜hō͘ in有權成做上帝ê kiáⁿ兒。」（約翰1：12），無koh做罪ê奴才，免受魔鬼附身ê拖磨，脫離tī烏暗裡痛苦ê生活。

2）當耶穌宣講上帝國度ê福音，「凡若悔改相信ê人」in身軀患有各種難治ê病症，只要相信，無論是偤太人á是外邦人，in ê絕症á是tùi祖先傳承落來ê遺傳病，lóng ē得tio̍h醫好；親像因為犯罪所帶來ê病症，m̄-nā伊ê病得tio̍h醫好，伊ê罪mā得tio̍h赦免（路加5：20、馬太9：5、馬可2：5）。

耶穌kā人治病ê方法無親像社會上ê醫生靠藥物á是手術，koh khah無親像巫師靠鬼神ê魔力。耶穌是以憐憫人ê心懷，用溫柔全能ê手去按病人；á是用話語ê權柄kā人治病。有一位患血漏ê婦人，甚至用她ê手去摸耶穌ê衫褲，kan-taⁿ因為她ê信心，mā hō͘ 耶穌ê能力tùi祂身tsiūⁿ出去，kā她ê病症治好，就án-ne，她ê流血隨時停止（馬可5：25～34、馬太9：20～22）。有一pái耶穌m̄-nā giú已經死ê gín-á ê手，iáu用祂話語ê能力吩咐已經斷氣ê tsa-bó͘ gín-á起來，hit-ê tsa-bó͘ gín-á to̍h隨時起來行（馬可5：41～42）；mā有一pái，tī伯大尼叫已經死4工ê拉撒路tùi墳墓活起來（約翰11：28～44）。耶穌kā人治病無分偤太人á是外邦人，只要有「信」，祂一律憐憫in，醫好in ê病症。

親像有一位迦百農羅馬兵ê百夫長（管100名阿兵哥ê連長），為tio̍h伊ê僮僕半遂倒tī厝裡非常痛苦，無藥thang治，伊來求耶穌醫，耶穌想beh去伊ê厝kā伊醫。Tsit時，百夫長竟然真謙卑koh真有信心，kā耶穌講：「主ah，你到我ê厝來，我不敢當；只要你講一句話，我ê奴僕to̍h一定ē好勢。」（馬太8：5～8），就án-ne，耶穌真驚奇伊ê信心比任何以色列人lóng khah大，就kā伊講：「你tńg去！照你ê信心，hō͘ 你成全à。」就tī hit時，伊ê僮僕to̍h隨時好起來（馬太8：13、路加7：1～10）。

3）魔鬼承認耶穌是「上帝ê Κiáⁿ」：Ta̍k pái耶穌tú-tio̍h hō͘ 魔鬼（á是講污靈、垃圾鬼）附身ê人ê時，in(魔鬼）lóng ē大聲叫：「我知祢是啥人，祢是上帝ê聖ê。」（馬可1：24、路加8：28）á是大聲huah講：「至koân上帝ê Κiáⁿ耶穌」（馬可5：7、馬太8：29）。真奇怪！魔鬼ē承認koh相信拿撒勒人耶穌是至koân上帝ê Κiáⁿ，á偤太人ê法利賽人、文士kah眾祭司卻lóng m̄相信。魔鬼tú-tio̍h耶穌ē求耶穌hō͘ in離開被in附身ê人，á法利賽人、文士kah眾祭司tú-tio̍h耶穌tī會堂kā人治病，卻心懷鬼胎kah陰謀，想beh陷害耶穌，究竟是án怎？

若是是主日á是安息日，耶穌來到咱ê教會傳福音，仝hit工koh醫病kah趕鬼，你kám ē歡迎祂？Á是親像偤太人遵守律法á是教規，而且嫉妒祂ê神能suah決定kā祂趕出去？！ 　　
當in kā耶穌交hō͘羅馬總督彼拉多審判定罪ê時，彼拉多總督原本知影偤太人ê大祭司、祭司長kah法利賽人kā耶穌送交伊審判、釘十字架，它ê原因是「因為嫉妒」tsiah kā耶穌tùi偤太人ê議會解送到安東尼亞樓衙門ê輔華石廣場，公開接受審判（馬太27：18）。彼拉多依照羅馬ê法律，明文查耶穌無罪！無奈，偤太人却講：「阮有律法，照律法祂應該死，因為祂家己講祂是上帝ê Kiáⁿ。」（約翰19：7） 　　
真奇怪！偤太人以政治犯控告耶穌是「偤太人ê王」，羅馬總督彼拉多查無罪狀，tsit時，偤太人反講：耶穌自認為是「上帝ê Κiáⁿ」，就該處死！Tsit-ê偤太人所講ê罪狀，tī羅馬ê法律明文內底是bē成立ê。所以，彼拉多想beh háu放耶穌，m̄-koh，「嫉妒」耶穌權能ê偤太人知影彼拉多ê心意想beh háu放耶穌，in竟然恐嚇伊講：「你若放tsit-ê人，就m̄是羅馬皇帝ê朋友。（約翰19：12），彼拉多因為「驚」偤太人作亂，就án-ne kā耶穌交hō͘ 太人去釘十字架！Á今á日ê偤太人竟然反駁，kā耶穌釘十字架ê人是羅馬兵！