《歷史上ê主耶穌》

| | | 轉寄

第十章_一1 耶穌行出加利利

第十章 耶穌行出加利利 (公元27年~28年)

一)Tshōa門徒到耶路撒冷參加Poâⁿ過節

耶穌tshōa門徒前往耶路撒冷ê途中,tńg來到ka-kī ê家鄉拿撒勒傳道、醫病,hō͘鄉親看輕、陷害。耶穌脫險了後就行出加利利,落南去耶路撒冷參加Poâⁿ過節ê節慶;tī耶路撒冷停留ê時間約10工左右,發生幾件重大事件如下:

1)潔淨聖殿(約翰2:13~22):約翰kah耶穌tsiūⁿ耶路撒冷,做伙去聖殿,伊講:「耶穌看見聖殿內底有賣牛、羊、粉鳥ê,而且有兌換錢銀ê人坐tī hia,耶穌就the̍h索á做鞭,kā牛羊lóng趕出聖殿外,倒出兌換ê人ê錢銀,推倒in ê桌á,koh對賣粉鳥ê講:『Κā tsiah-ê物件the̍h出去!M̄-thang kā我父ê殿當做買賣ê所在。』」 是án怎耶穌看tio̍h此情此景,心內ē tio̍h急ná親像火teh燒?因為聖殿是敬拜上帝,向上帝祈禱ê聖地;上帝是聖潔ê,所以,敬拜上帝,向上帝祈禱ê所在mā tio̍h聖潔,tsiah ē得tio̍h上帝ê歡喜接納。Koh再講,聖殿ê功用m̄是做買賣ê市場,偤太人ê大祭司允准出租聖殿hō͘ 做買賣ê人使用,ē污染聖殿ê聖潔。違背聖殿使用ê功能是無合法ê!耶穌為tio̍h維護聖殿ê聖潔,做合法ê使用,所以kā做買賣ê人趕走;做買賣ê sing-lí人明知無合法,所以,in雖然繳租金hō͘ 祭司長,m̄-koh in敢受氣,m̄敢動手,kan-taⁿ ē-tàng kā伊ê苦衷不滿ǹg大祭司吐氣。

耶穌阻礙大祭司收無合法ê稅金,tsit項tāi-tsì mā是致使耶穌tī聖殿傳道、醫病kah趕鬼做善事ê時,hō͘ 大祭司、祭司長、祭司kah法利賽人當時四界想beh tshōe耶穌教導人ê話柄,thang好早一點á來謀害祂ê原因;m̄-koh,因為一般偤太人ê人民看tio̍h耶穌所做ê一切善事,對耶穌lóng非常友善,所以,in頭尾m̄敢下手,恐驚發生反效果,顛倒hō͘ 偤太人ê人民反對,suah lóng去跟tòe耶穌。