《歷史上ê主耶穌》

 | | | 轉寄

第十章_一3 耶穌行出加利利

作者 杜英助 台譯：Lîm Tsùn-io̍k 2020.09.27

3）耶穌kah撒瑪利亞婦人講起（約翰4：1～39）：耶穌tshōa門徒離開耶路撒冷beh tńg去加利利，途中beh經過撒瑪利亞ê敍加城（示劍）。Hit時是中晝，因為旅途真thiám，所以，耶穌就坐tī雅各井旁歇睏，叫門徒入城去買食物。有一个撒瑪利亞婦人出來tshiūⁿ水，耶穌就利用機會kah她講起，解答她心內ê疑問。她問耶穌講：「先生，我看出你是先知。咱ê祖宗tī tsit-ê山頂禮拜，lín倒páiⁿ講，應當禮拜ê所在是tī耶路撒冷。」耶穌對她講：「你tio̍h信我。…lín拜天父，mā無tī tsit山頂，mā無tī耶路撒冷。….真正拜天父ê人，tio̍h用心靈kah誠實拜祂，因為天父上帝ài tsit種人拜祂。上帝是一个靈，所以，拜祂ê人一定tio̍h用心靈kah誠實來拜祂。」

聽tio̍h耶穌ê教導kah指示，tsit位婦人心內明白，to̍͘h向耶穌表明她ê信仰講：「我知彌賽亞（to̍h是hit位稱做基督ê）beh來；祂來à，一定ē kā所有ê tāi-tsì lóng kā咱講。」耶穌對她講：「Tsit-má kah你講話ê to̍h是祂！」了後，tsit位婦人就趕緊入城，去向鄉親做見證講，她tú-tio̍h基督à。

當敍加城裡ê人出城看見耶穌，因為hit-ê婦人ê見證，有kóa人lóng信耶穌，而且求耶穌tī城內tòa兩工；因為聽耶穌ê教導，信ê人就koh khah tsē à。是án怎平常kah偤太人無往來ê人ē相信偤太人耶穌是「世界ê救主？」

a）耶穌無看輕撒瑪利亞ê tsit位婦人已經換過五个丈夫，tsit-má kah她同居ê tsa-po͘人m̄是她ê丈夫；因為耶穌做人子來世tsiūⁿ，to̍h是為tio̍h beh拯救失喪ê罪人。
b）Τī公元前722年，北方ê以色列國hō͘ 亞述帝國消滅，人民被掠去到亞述，漸漸hō͘ 世間人bē記得。亞述帝王kā伊ê國內ê人民（亞摩利人）徙到以色列tòa，kah無hông擄去亞述ê以色列人通婚，偤太人kā in ê kiáⁿ孫叫做撒瑪利亞人；因為in ê血統已經m̄是純種ê偤太人ê關係，所以，當偤太人tī公元538年波斯帝國ê皇帝古列（居魯士）消滅巴比倫帝國ê時，允准in tī公元前586年hō͘ 巴比倫王掠去巴比倫做奴隸ê偤太人tńg去耶路撒冷重建聖殿。當時偤太人tńg來到聖城beh重建聖殿ê時，拒絕撒瑪利亞人ê幫贊；自hit時到tsit-má，偤太人kah撒瑪利亞人lóng無往來。

撒瑪利亞人到taⁿ iáu tī約書亞宣讀摩西十誡祝福之山—基利心山頂敬拜上帝，á偤太人就是tī耶路撒冷聖殿哭牆敬拜上帝；m̄-koh，耶穌是彌賽亞，是世界ê救主，祂phah破偤太人kah撒瑪利亞人心內ê高牆，kā福音mā帶hō͘ 撒瑪利亞人，證明以善勝惡，「m̄是敵人to̍h是朋友」。

c）耶穌無分地域、種族，kā敬拜上帝ê真理kā撒瑪利亞人講：「上帝是一个靈，所以拜祂ê一定tio̍h用心靈kah誠實來拜。」Tsit種神學教導是人人lóng ē-tàng接受ê真理，mā是上帝所歡喜ê。