《歷史上ê主耶穌》

| | | 轉寄

第十章_三 耶穌行出加利利

三、耶穌koh再離開加利利,前往泰爾(推羅)西頓趕鬼

因為久長以來耶穌tī祂傳道、醫病ê工作中,想beh hō͘人相信祂是tùi天父上帝差遣來ê,m̄-koh,真tsē偤太人m̄信。有kóa人講:耶穌自稱祂是「上帝ê Κiáⁿ,是天父差遣我。」這是迷惑人ê話,to̍h想掠祂來kā祂殺害;koh有人講:耶穌tī安息日kā人治病,犯tio̍h安息日bē-tàng工作ê誡命,應該受律法ê制裁。因為tsit種原因kah爭議,耶穌to̍h暫時離開祂傳道、醫病kah趕鬼ê加利利地區,tshōa門徒往北方ê腓尼基(黎巴嫩)地中海ê海邊ê泰爾(推羅)kah西頓去;ē記得舊約時代,以利亞先知為tio̍h閃避以色列亞哈王kah耶洗別王后ê殺害,mā奉上帝ê指示來到泰爾、西頓,tòa tī一个撒勒法寡婦ê厝避難三年久(參考列王記上17:8~24)。

Tsit pái耶穌tshōa門徒(祂ê老母馬利亞mā kah祂做伙去)去外邦,一面退修一面傳道,因為耶穌tī加利利tú出來傳道ê時名聲tháu,tùi泰爾、西頓tsia to̍h有真tsē人tshōa病人做伙來加利利聽道,而且受耶穌醫病;所以,當耶穌來到西頓ê時,to̍h有一个迦南婦人(tsit位婦人是希臘人,屬敍利亞ê腓尼基族,m̄是偤太人)帶她ê信心來見主耶穌,靠她ê信心向祂祈求,講:「主ah,Ta-bi̍t ê kiáⁿ孫,可憐我!我ê tsa-bó͘ kiáⁿ hō͘鬼附身,真艱苦。」當耶穌聽tio̍h她ê呼求,為tio̍h beh試探她ê信心,起初一句話都無回答。M̄-koh,她繼續真謙卑phak tī耶穌ê腳前,求耶穌tùi她ê tsa-bó͘ kiáⁿ身tsiūⁿ趕出hit-ê鬼。M̄-koh,耶穌卻回答她講:「我奉差遣kan-taⁿ去以色列家失迷ê羊hia。」就án-ne,hit-ê婦人koh跪tī耶穌面前,koh再三kā祂拜,講:「主ah,幫贊我!」M̄-koh,耶穌猶原koh再試她ê信心,講:「Hō͘ kiáⁿ兒先食飽,m̄-thang the̍h kiáⁿ兒ê餅tàn hō͘ 狗食。」耶穌對tsit位婦人講ê tsit句話,kā偤太人ê gín-á看做寶貝ê gín-á á kā她ê tsa-bó͘ kiáⁿ比喻做無價值受重視ê小狗,kah-ná有一點輕視(有人會感覺是一種侮辱),m̄-koh,tsit位婦人iáu有信心,她相信耶穌一定ē憐憫她ê tsa-bó͘ kiáⁿ,來救她!就án-ne,她心內koh khah謙卑承認她ê tsa-bó͘ kiáⁿ to̍h是小狗,kā主回答講:「主ah,無m̄-tio̍h; m̄-koh,狗á mā ē-tàng食in ê主人ka-la̍uh tī桌腳ê餅幼á。」當耶穌聽tio̍h tsit位老母tsit種回答,就án-ne,對她講:「婦人,你ê信心真大,照你ê心願hō͘你得成。」Tùi hit時起,鬼已經出去à。當她tńg去厝裡ê時,她ê tsa-bó͘ kiáⁿ已經倒tī床頂歇睏,好勢好勢!(馬太15:21~28、馬可7:24~30)

耶穌teh傳道ê時,迦百農羅馬兵ê百夫長kah迦南人ê婦女對耶穌ê信心hiah-ni̍h大,回頭koh再想看偤太人有看tio̍h神跡卻m̄肯悔改,莫怪耶穌對ka-kī ê偤太人同胞ē悲嘆責備in講:「Ko-la̍h-sìn,你有災禍!伯賽大,你有災禍!因為我tī lín中間所行tsiah-ê權能,若行tī 推羅 kah西頓,in早to̍h穿麻衫,sám火灰,坐teh來悔改。」(路加10:13、馬太11:21),迦百農有禍à!Lín若相信,mā bē致使被sak落去地獄。