《歷史上ê主耶穌》

| | | 轉寄

第十一章_3 前往耶路撒冷ê路徑

三)你是基督,是永遠活ê上帝ê Κiáⁿ

耶穌tshōa門徒渡過加利利海去到對岸,因為門徒bē記得帶餅,就順機會教導in講:「Lín tio̍h謹慎,防備法利賽人kah撒都該人ê酵。」門徒彼此議論講:「這kám是因為咱無帶餅。」耶穌知影門徒ê想法,就講:「Lín tsiah ê小信ê人,為啥物因為無餅to̍h彼此議論?Lín kám iáu bē明白?Bē記得hit五塊餅分hō͘ 五千人,koh收拾gōa tsē籃á ê餅屑?Kám mā bē記得hit七塊餅pun hō͘ 四千人,koh收拾gōa tsē筐á ê餅屑?我kā lín講:『Tio̍h防備法利賽人kah撒都該人ê酵』,tsit-ê話m̄是teh指餅講ê,lín án怎bē明白?」門徒án-ne tsiah知影祂講ê m̄是叫in防備餅ê酵,乃是防備法利賽人kah撒都該人ê虛假教示(馬太16:5~12、馬可8:14~21)。

究竟法利賽人kah撒都該人ê虛假教示是啥物?是án怎耶穌教導祂ê門徒ê時ài in謹慎細膩(sè-jī)防備?是因為in經常kah耶穌ê門徒四界跟tòe耶穌ê腳跡,聽耶穌對眾人ê教導,看見耶穌所行ê神跡,食過餅kah魚,看過真tsē病人得tio̍h醫好,m̄-koh,in lóng m̄相信耶穌是上帝ê Κiáⁿ,而且iáu想beh tshōe出耶穌教導人ê話柄kah安息日ê禁令來陷害祂;其次,in tī眾人面前tiāⁿ-tiāⁿ thiau故意對眾人風神in是gōa-ni̍h-á ē遵守摩西ê誡命,行仁慈,施疼心,賑濟sàn-tshiah人。其實,in tī眾人面前做tsiah-ê tāi-tsì lóng是假冒偽善ê行為;了後,耶穌bat對in直接指出,in án-ne做真正是有禍à!(請看馬太23:1~36、馬可12:38~40、路加11:37~52、路加20:45~47)

做餅ài加酵是因為酵ē-tàng hō͘ 麵粉膨大;因為án-ne,法利賽人kah撒都該人錯誤ê思想kah教示,若是親像酵暴發膨大,ē污染眾人ê行為,做善事lóng tio̍h有目的,想beh得tio̍h別人ê o-ló;tī眾人看bē-tio̍h ê所在á是tī安息日,in to̍h絕對bē做善事幫贊人。

Koh再講,耶穌tī tsia mā提起用五餅二魚飼飽五千人kah七餅飼飽四千人ê tāi-tsì,可見這是tī二个無仝地方所行ê神跡。耶穌tī加利利海對岸,tī庫爾西格拉森人tòa ê所在,kā hō͘ 群鬼附身ê人ê群鬼趕走,群鬼走到豬群中間,hiah-ê豬群被嚇kah衝入去加利利海;以及耶穌koh再到加大拉kā加大拉人hō͘ 鬼附身ê人身tsiūⁿ ê鬼趕走,iáu有一大陣豬被嚇kah衝入去加利利海,這mā是兩件tī無仝所在對無仝ê人所行ê神跡,無重複,絕對m̄是親像某一kóa人解說為仝一件事,kan-taⁿ是tī數字上有tsing差ê記述。

耶穌kah祂ê門徒tī北加利利,先到伯賽大醫好一个盲人(馬可8:22~26),續落來koh再行到黑門山麓有名ê凱撒利亞腓立比ê境內,問門徒講:「咱人講人子是啥人?」á是講:「眾人講我是啥人?」In kā某一kóa人ê認知kā耶穌講:「有人講是行洗禮ê約翰;有人講是以利亞;koh有人講是耶利米á是先知內底ê一位。」希律王(安提帕)聽tio̍h別人koh án-ne講:「是行洗禮ê約翰tùi死koh活。」就án-ne,希律王mā想beh見耶穌(馬太14:1~2、馬可6:14~16、路加9:7~9)。

耶穌聽tio̍h tsiah-ê kah祂ê身分無符合ê答案,就koh再問祂ê門徒講:「Lín講我是啥人?」眾門徒ioh bē出ê時,西門彼得終其尾答tio̍h à,伊講:「祢是基督,是永遠活ê上帝ê Κiáⁿ。」耶穌tsit時o-ló彼得講:「約拿ê kiáⁿ西門,你是有福ê!因為這m̄是屬血肉ê指示你ê,卻是我tī天頂ê父指示ê。我beh koh kā你講,你是彼得(意思是石磐),我beh kā我ê教會起造tī tsit-ê石磐上;陰間ê權柄無法度贏過伊。我beh kā天國ê鎖匙hō͘ 你,凡若你tī地tsiūⁿ所綑縛ê,tī天頂mā tio̍h綑縛;凡若你tī地tsiūⁿ所tháu放ê,tī天頂mā得tio̍h tháu放。」(馬太16:13~20、馬可8:27~30、路加9:18~20)

講mā奇怪,當彼得受天父啟示講出「耶穌是基督,是永遠活ê上帝ê Κiáⁿ。」ê時,耶穌對眾人見證祂是上帝ê Κiáⁿ基督,m̄-koh,偤太人ê祭司長、法利賽人kah撒都該人,頭尾lóng恬去, m̄相信。Hit時,耶穌是án怎竟然吩咐門徒講:M̄-thang對任何人講祂是基督(馬太16:20)?耶穌kā門徒講:這是因為「祂一定tio̍h去耶路撒冷,會hō͘ hiah-ê長老、祭司長、經學教師迫害,受真tsē苦難,mā一定會hō͘ in害死,第三日上帝會hō͘祂koh活。」(馬太16:21),當時彼得聽tio̍h耶穌忽然án-ne講,伊就真體貼耶穌,用手kā祂giú-.leh,講:「千萬m̄-thang án-ne,tsit項tāi-tsì絕對m̄-thang發生tī祢身tsiūⁿ。」M̄-koh,耶穌tńg身過來,卻責備彼得講:「撒旦,閃開!你是我ê阻礙,你所想ê m̄是上帝ê tāi-tsì,是人ê tāi-tsì」(馬太16:22、23)

試想看māi:彼得tú-tú受tio̍h天父啟示,伊講:「人子是基督,是永遠活ê上帝ê Κiáⁿ。」過無gōa久,伊ê心內to̍h去ho͘ū撒旦侵佔,kah-ná真體貼耶穌,叫祂明明知影有危險,甚至ē喪失性命,就m̄-thang koh再去耶路撒冷受害;彼得心內ê變化ná ē hiah-ni̍h大?既然受tio̍h天父啟示伊知影人子是啥人,m̄-koh tòe後,撒旦就進入伊ê心,想beh阻止人子到耶路撒冷去為tio̍h擔當罪人ê罪來犧牲性命。表面上kah-ná是真體貼主耶穌,啥人知這是違背上帝ê旨意,所以,耶穌看透彼得ê心,to̍͘h對伊講一聲:「撒旦,閃開!」

因此可見,做上帝ê代言人mā可能成做撒旦ê代言人,真正oh得猜想ē到!為tio̍h 無ài講m̄-tio̍h話,人人一定tio̍h「緊緊來聽,慢慢á講」tsiah好;「想好勢,tsiah koh講」比較bē講m̄-tio̍h,求主賜hō͘ 咱有分辨是非,分別tio̍h kah m̄-tio̍h ê智慧、能力。