《歷史上ê主耶穌》

 | | | 轉寄

第十三章_三4.5.6 試煉kah受難

作者 杜英助 台譯：Lîm Tsùn-io̍k 2021.01.31

4）Siōng大ê誡命：

馬太講：法利賽派ê人聽tio̍h耶穌已經hō͘撒都該派ê人無話thang應，就聚集做伙。其中一个律法教師來beh試探耶穌，講： 「老師ah，律法中tó一條誡命siōng重要？」耶穌應講：「你tio̍h盡心、盡性、盡意疼主—你ê上帝。Tsit-ê siōng要緊，mā是頭一个誡命。第二條mā仝款，tio̍h疼厝邊親像ka-kī。Tsit兩條誡命是全部律法kah先知教示ê總根頭。」（馬太22：34～40），Hit位文士聽tio̍h耶穌tsit種回答，伊就對耶穌講：Hit-ê經學教師對耶穌講：「老師，祢講了真tio̍h，上帝只有一位，祂以外無別个。」伊koh講：「Tio̍h盡心、盡意、盡力疼上帝，koh tio̍h疼厝邊親像家己，這比獻kui隻tsing-seⁿ ê燒祭kah祭物khah要緊。」耶穌看tio̍h伊應了真適當，就kā伊講：「你離上帝國度無遠à。」Tùi hit時起，無人敢koh問耶穌啥物問題。」（馬可12：32～34）。

耶穌講：「你離上帝ê國無遠à。」意思是講，你已經知影beh án怎進入天國à。M̄-koh ài進入天國，除了tio̍h親像耶穌hō͘另外一个來試探祂ê律法教師回答kah正確以外，koh khah tio̍h「照án-ne去做。」（路加10：37）tsiah ē-tàng進入天國，得永生。

Hit工，耶穌對祭司長、法利賽人、撒都該人kah律法教師回答真tsē有關in想beh謀殺祂來設計ê政治kah律法ê「陷阱」問題了後，耶穌對in iáu真客氣講：「Lín離上帝ê國無遠à。」因為in默認耶穌ê權柄kah行洗禮約翰仝款lóng是tùi上帝來ê，m̄-koh，in却無願意公開相信耶穌是上帝ê Κiáⁿ，而且iáu想beh謀殺耶穌，莫怪耶穌ē對in kah眾人講：「抽稅ê人kah娼妓ē比lín先進入上帝ê國。」一般聽眾聽tio̍h耶穌ê教導lóng真huah好，m̄-koh，祭司長in對耶穌ê話威脅tio̍h in tī宗教上ê地位kah權威，卻大tio̍h驚，suah起受氣！

5）耶穌譴責文士kah法利賽人：

當耶穌tī聖殿教導人ê時，法利賽人、文士kah撒都該人以及律法教師想beh掠 耶穌ê話柄來陷害祂，續接向耶穌催逼、盤問祂有關誡命kah政治ê問題，等機 會beh tī耶穌ê應話中掠tio̍h祂ê失言á是謬論，來陷害祂，m̄-koh in頭尾tshōe bē-tio̍h，to̍h有hit-lō嘴，無hit-lō心來扶tháⁿ耶穌，講：「耶穌回答了真tio̍h，真 好！」耶穌老早to̍h看透in心內ê陰謀gōa-ni̍h-á險惡；所以，當人民繼續注意 聽祂ê教導ê時，耶穌就轉向祂ê門徒講：「Tio̍h提防hiah-ê經學教師，in ài穿 長衫四界行，ài tī大路口hō͘人請安， 39 koh tī會堂內ài坐高位，tī宴席坐大位。 In侵佔寡婦ê家伙，thiau故意祈禱真長。In會受koh khah重ê刑罰！」（馬太 23：1～36、馬可12：38～40、路加20：45～47）

講suah，耶穌o̍at頭繼續對眾人kah門徒講論一kóa常識。根據馬太ê記載，耶穌講：「經學教師kah法利賽派ê人坐tī摩西ê位teh解說律法。所以，in kā lín講ê，lín lóng tio̍h遵守來做，總是，m̄-thang照in ê行為來行；因為in講一款，做koh另外一款。In kā重koh oh擔ê擔縛tòa人ê肩胛頭頂，m̄-koh，in家己連一支指頭á都m̄肯振動。In所做ê tāi-tsì lóng是為tio̍h beh hō͘眾人看。In kā經文袋做khah闊，衫á裾ê鬚做khah長。In koh ài tī宴席坐大位，tī會堂內坐高位，又koh ài tī大路口hō͘人請安....。」

耶穌koh向眾人指出文士kah法利賽人假冒偽善ê實例，講in有禍à。親像：Ιn tī人ê面前kā天國ê門關起來，ka-kī無想beh入去，mā無容允想beh入去ê人入去。說服人入教，卻hō͘ 伊成做比in加倍pháiⁿ ê地獄ê kiáⁿ；in kā薄荷、大茴香、小茴香獻十分之一，hit-ê律法上koh khah重要ê tāi-tsì to̍h是公義、憐憫、信實，in顛倒m̄做；in洗清氣杯盤ê外面，á內面卻充滿貪婪kah放蕩。In kah-ná kā墳墓粉飾，外面好看內面卻滿死人ê骨頭kah一切ê lâ-sâm。比喻指出in外面顯出公義，內面卻裝滿虛假kah不法ê tāi-tsì。

耶穌koh親像行洗禮約翰ê明察，肯定in ê個性tú親像蛇，講：Ιn是毒蛇ê孽 種，怎樣ē-tàng逃脫地獄ê處罰？耶穌清清楚楚指出上帝差遣先知、智慧人kah 文士到in tsia來，有ê被殺害，被釘十字架；有ê tī會堂內hō͘ in鞭phah，tùi tsit-ê 城逃到hit-ê城。Án-ne，地tsiūⁿ所有義人ê血lóng tio̍h歸tī in身tsiūⁿ （馬太23：33～36）。

當法利賽人聽tio̍h耶穌tsit種指責in，tī in中間to̍h有幾个人對祂講：「祢tio̍h離開tsia去別位，因為希律ài beh kā祢thâi。」（路加13：31），其實是法利賽人beh去結合希律黨ê人做伙來謀殺祂，所以，耶穌就直接坦白kā in講：「Lín去kā hit-ê狐狸（指加利利ê希律安提帕，伊bat下令kā行洗禮約翰斬頭）講：『今á日、明á載我趕鬼醫病，第三工我ê tāi-tsì就成全à。』」意思是指tī三工了後，耶穌完成天父交hō͘ 衪做ê事工了後teh beh hō͘ in鞭phah，釘十字架，結束上帝救贖罪人，重頭生、成義koh成聖ê工作（路加13：32）。

Tī Poâⁿ過節前兩工ê beh暗á，耶穌tshōa門徒出聖城，iáu koh tńg來伯大尼過暝。

6）抹大拉ê馬利亞用phang油倒tī耶穌身tsiūⁿ（公元30年四月3日禮拜二暝）：

耶穌tùi聖城出來到伯大尼ê時，當地有一个bat患癩ko病hō͘ 耶穌醫好ê西門，tī in tau內底準備暗頓，beh來接待耶穌kah門徒，抹大拉ê馬利亞（bat tī加利利hō͘ 耶穌kā她身tsiūⁿ ê七个鬼趕走）知影koh過兩工，耶穌teh beh交hō͘人去釘十字架，所以，她the̍h一个玉瓶，內面裝極貴ê phang油來，趁耶穌坐席ê時，倒tī祂ê頭殼頂面。加略人偤大（替耶穌管錢袋ê門徒）看見，真無歡喜，講：「Ná tio̍h tsiah-ni̍h浪費leh！Tsit-ê phang油ē-tàng賣真tsē錢（30个銀幣），來賑濟sàn-tshiah人。」

耶穌看出偤大對抹大拉ê馬利亞真受氣，認為tsit種真浪費。Tsit時，耶穌to̍h講：「Lín ná會beh刁難tsit-ê婦人人？她為tio̍h我做一項好事。Lín不時都有sàn-tshiah人kah lín做伙，m̄-koh，我無tiāⁿ-tiāⁿ kah lín tī-.leh。她倒phang油tī我ê身軀是teh準備我ê埋葬。我實在kā lín講，tsit-ê福音無論傳到普天下啥物所在，人ē講起tsit-ê婦人人所做ê來記念她。」（馬太26：6～13、馬可14：3～9），這是耶穌tī伯大尼食暗頓ê時，第二pái hō͘ 人用phang油倒tī祂ê頭殼頂ê tāi-tsì。

比較tsit二pái有啥異同ê所在？第一pái ê時間是tī Poâⁿ過節ê前六工，第二pái是tī Poâⁿ過節ê前兩暗；地點：第一pái ê地點tī伯大尼拉撒路ê厝附近某人（無指名）ê厝裡，有馬大、馬利亞kah拉撒路在場，由伯大尼ê馬利亞帶極貴重ê哪噠phang油來倒tī耶穌ê腳，並用她ê美髮來擦洗耶穌ê腳。第二pái ê地點是tī伯大尼bat患癩ko病ê西門ê厝，無看tio̍h馬大、馬利亞kah拉撒路在場。Tsit位婦女（雖無指名，m̄-koh，馬太是加利利人，伊一定知影她to̍h是抹大拉ê馬利亞，to̍h kah-ná約翰仝款，伊寫約翰福音書ê時mā tiāⁿ-tiāⁿ隱名）一定是tiāⁿ-tiāⁿ跟tòe耶穌四界傳福音，做服事工作ê受恩人；她the̍h來ê是極貴ê phang油，kā它phah開倒tī耶穌ê頭，仝款是為耶穌ê安葬預備ê。

Tsit二位馬利亞為主耶穌所做ê lóng是盡力來做ê「一件美事」，路加koh見證講，當耶穌被釘十字架，死去，「安khǹg tī挖嚴而成ê墳墓內，…hiah-ê tùi加利利kah耶穌做伙來ê婦女，有抹大拉ê馬利亞kah約西（雅各），以及約瑟ê老母、西庇太ê bó͘馬利亞kah撒米（馬太28：55-56；馬可15：47, 16：1）mā lóng tńg去koh再買香料phang油，beh去膏耶穌ê身軀（馬可16：1，路加23：56）。Tī耶穌三年gōa來ê傳道生活中，in一直用金錢kah財物供給衪ê需要，tsit-má koh再買珍貴ê香料kah phang油來beh膏耶穌ê聖體，in ê疼心是gōa-ni̍h-á偉大！咱信主蒙恩ê基督徒，tī一生中kám bat為主耶穌做過一件美事？Ιáu未做過ê兄弟姊妹，加油！Τī天家一定有主ê重賞！