《歷史上ê主耶穌》

 | | | 轉寄

第十四章_一2 耶穌受難kah最後ê晚餐

作者 杜英助 台譯：Lîm Tsùn-io̍k 2021.02.14

Teh過Toà棚節ê時，有一工耶穌tńg來到聖殿教導人，文士kah法利賽人tshōa一个犯姦淫hông掠tio̍h ê tsa-bó͘人來見耶穌，問祂講：「老師，tsit-ê tsa-bó͘人是tú teh行姦淫ê時hō͘人掠tio̍h。摩西ê律法命令咱，tio̍h用石頭kā tsit款tsa-bó͘人tìm死，taⁿ祢想án怎？」In講án-ne是beh試探耶穌，ài beh tshōe孔縫kā祂告。耶穌就àⁿ落去，用指頭á tī土腳寫字。In一直問bē suah。耶穌就khiā起來，對in講：「Lín中間無罪ê人thang先用石頭kā她tìm。」耶穌koh àⁿ落去，用指頭á tī土腳寫字。In聽tio̍h tsiah-ê話了後，tùi老ê到少年ê，一个一个溜出去，tshun耶穌家己一个留tī hia。Hit-ê tsa-bo͘人猶原khiā tī hia，耶穌khiā起來，kā她講：「Tsa-bó͘人，in hiah-ê人去tī tó位？無人kā你定罪，是無？」Tsa-bó͘人應講：「先生ah，無半人。」耶穌講：「我mā無beh kā你定罪，你thang tńg去，taⁿ以後m̄-thang koh犯罪。」（約翰8：1～11）

文士kah法利賽人聽tio̍h耶穌teh教導人kah醫病ê時，心內真懷疑耶穌ê權柄，自頭到尾m̄肯相信耶穌是上帝ê Κiáⁿ，而且講：「祢ê見證無效。」（約翰8：13），耶穌對in ê m̄信講：「Lín m̄-bat我，mā m̄-bat我ê天父。Lín若bat我，mā ē bat我ê天父。」（約翰8：19）

當文士kah法利賽人離開，耶穌向前走ê時，看見一位自出世to̍h失明ê人，祂ê門徒問祂講：「老師，tsit-ê人出世to̍h tsheⁿ-mê，是啥人犯罪？是伊本身á是伊ê父母？」耶穌回答講：「Tsit-ê人無犯罪，伊ê父母mā無；是beh通過伊來顯明上帝ê作為。」就phùi瀾tī土腳，用嘴瀾攪土來糊tsheⁿ-mê人ê目tsiu，而且叫伊去西羅亞池á內洗；因為án-ne伊to̍h聽從耶穌ê話去西羅亞池洗，tńg來以後，目tsiu to̍h ē-tàng看tio̍h，tsit工mā是安息日。真tú好！

關係tsit件神跡，偤太人kah法利賽人lóng m̄相信tī安息日有人ē醫好伊ê目tsiu；當法利賽人一再問伊，kā伊目tsiu醫好ê hit-ê「罪人」（犯安息日ê禁令）是啥人？伊回答講：「….咱知上帝無聽罪人ê祈求，獨獨人若敬拜上帝來遵照祂ê旨意，上帝就會聽伊ê祈求。…. Tsit-ê人若m̄是tùi上帝hia來，就無可能做tsit款tāi-tsì。」法利賽人聽tio̍h伊ê回答心內真受氣，就對伊講：「你出世to̍h有罪，tī罪惡中大漢，顛倒beh教示阮？」In就對會堂kā伊趕出去（約翰9：1～34）。當耶穌tī聖殿外tú-tio̍h伊，to̍h問伊講：「你有信人子無？？」Hit人回答講：「主ah，我信！」伊就跪落去kā祂拜（約翰9：35～38）。

Tī tsit-ê神跡中，咱看tio̍h偤太人（包括耶穌ê門徒）lóng認為人類ê一切病症lóng是因為「犯罪」帶來ê，lóng無醫學常識；耶穌ê回答是「否定」tsit種「錯誤ê認知」。有人患病kah得tio̍h醫治，乃是beh是beh通過伊來顯明上帝ê作為（約翰9：3）。

Tī tsit件善事中，法利賽人本來m̄相信是耶穌做ê，因為in無親目看見tsiah ē koh再去問伊ê父母；mā m̄相信tsit位盲人ê目tsiu復明，to̍h是以前hit位tī聖殿對人乞食ê盲人。若是有人認為hō͘盲人復明tsit項tāi-tsì是耶穌做ê，承認耶穌是基督，in to̍h beh kā伊趕出會堂（約翰9：22）。

凡若信耶穌是上帝ê Κiáⁿ，是基督ê偤太人，lóng tio̍h hō͘ 法利賽人趕出會堂；因為án-ne，真tsē偤太人ê官長lóng m̄敢公開承認in信耶穌是上帝ê Κiáⁿ（kan-taⁿ有法利賽人尼哥德慕議員，kah亞利馬太人約瑟議員等兩人除外）。

若是主張「台灣獨立」，á是「台灣beh成做新koh獨立ê正常國家」ê人，lóng tio̍h被關入去牢獄，á是趕出台灣，tsit種tòa tī外國ê台僑想beh回國探親，kám敢承認「台灣是咱ê老母？」這是咱近代台灣戒嚴時期siōng嚴重ê一个政治議題。

既然是án-ne，台灣ê局勢kah耶穌時代偤太人ê政治、宗教迫害有啥無仝？試想看māi，真tsē所謂「民主國家」ê政府，雖然有制定宗教自由ê法律，m̄-koh若kah國教無仝信仰ê人，tsit-má tú-tio̍h政府á是伊ê國教信徒迫害、屠殺，政府官員（法官á是民意代表）kám敢效法尼哥德慕議員ê勇氣，出面主持公義，重視人道，轉型正義？