《歷史上ê主耶穌》

 | | | 轉寄

第十四章_二4 耶穌受難kah最後ê晚餐

作者 杜英助 台譯：Lîm Tsùn-io̍k 2021.03.14

M̄-koh，世界末日tang時ē來臨？耶穌iáu舉例對門徒說明：「Lín tio̍h tùi無花果樹來學習。當枝puh-íⁿ發葉ê時，lín就知熱天teh beh到à；親像án-ne,lín看tio̍h tsiah-ê tāi-tsì，就知人子teh beh到à，來到門口à。」(馬太24：32-33；可13：28-31；路21：29-33)真tsē解經家á是聖經學者lóng一致解說「無花果樹」是象徵以色列。以色列tī公元70年，耶路撒冷hō͘ 羅馬政府ê軍隊拆毀，聖殿mā被拆毀燒掉，人民被thâi。逃走到死海西岸ê馬撒大希律王所起造設ê避難堡壘生活ê革命分子，tī公元73年ê時mā hō͘ 羅馬軍隊征服。Hiah-ê逃難ê偤太人tī羅馬兵攻破馬撒大希律堡tsìn前有967人，除了2个婦女tshōa 5 个gín-á共7人避難不知情以外，有960人全部壯烈捨身成仁，無願意做羅馬人ê奴隸，á是死tī羅馬兵ê刀槍之下，就án-ne偤太人正式亡國。人民受逼離開偤太地，分散tī歐洲各國流浪，tī別人ê厝借tòa，m̄准tńg去厝裡，偤太mā被改名叫做巴勒斯坦（意思是非利士人之地）。
直到1948年月14日，tī聯合國大多數國家ê支持、投票贊成下，以色列tsiah復國。以色列ê復國ná親像無花果樹lian去koh再生出tsíⁿ芽kah樹葉來。按照tsit-ê解說，若是耶穌ê預言真正應驗ā，咱tsit-má就thang知影世界末日近loh，耶穌一定ē真緊koh來！尤其當咱看見世界末日tsìn前ê今á日世界，人民攻打人民、國攻打國ê事件，tsit幾年來tiāⁿ-tiāⁿ發生，饑荒、地動、水災ê次數一直增加，人民ê疼心漸漸冷落，真sêng挪亞大水ê時代。耶穌講：「挪亞ê日子án怎，人子來臨mā ē怎樣。」所以，凡若忠信上帝ê基督徒，一定tio̍h敬虔、謹慎過日子，準備心迎接主ê來臨（馬太24：1-44，馬可13：1-13，路加21：5-19）。

耶穌向門徒講完世界末日teh beh到ê實況以後，koh再繼續對in講：人子koh來ê時ē坐tī祂榮光ê寶座頂，kā萬民分別做綿羊、山羊一般，對安置tī祂正pêng ê綿羊（基督徒）講：「Lín這蒙我父賜福ê，thang來承受ná創世以來為lín所預備ê國。因為我iau ê時，lín有hō͘我食；我嘴乾ê時，lín有 hō͘我lim;我出外做客，lín有接待我。」（馬太25：35）耶穌koh講：「我實在kā lín講，Lín有án-ne好款待我ê兄弟中siōng微細ê一个，to̍h是對待我án-ne。」（馬太25：40）所以，保羅寫hō͘羅馬教會受苦難ê基督徒講：「疼人tio̍h誠心誠意，tio̍h討厭邪惡，親近良善。Tio̍h相疼親像親兄弟，tio̍h互相尊敬….。Tio̍h幫贊lín中間sàn-tshiah ê信徒，tio̍h好款待出外人。….tio̍h做眾人看做好ê tāi-tsì。….你ê對敵若iau，tio̍h hō͘伊食，嘴乾，tio̍h hō͘伊lim….。」（羅馬書12：9-21）。Tsiah-ê人會受tio̍h永遠ê刑罰；m̄-koh，義人會得tio̍h永遠ê活命（馬太25：31-40、46）。

對hiah-ê hông安置tī寶座tò-pêng ê山羊（指惡人、不義ê人、魔鬼ê附庸者），in kan-taⁿ顧ka-kī（守財奴、獨善伊ê身者），m̄知koh再去關懷tī社會上siōng需要人看顧ê弱勢者，hō͘ 人看輕、無依無靠ê人、為義受關ê人….。耶穌ê判決，裁定：Tsiah-ê人to̍h是beh往永遠ê活命去（馬太25：41-46）。這to̍h是綿羊（義人）kah山羊（不義ê人），好人kah pháiⁿ人ê終局。