《歷史上ê主耶穌》

 | | | 轉寄

第十四章 三2 耶穌受難kah最後ê晚餐

作者 杜英助 台譯：Lîm Tsùn-io̍k 2021.03.28

門徒聽tio̍h耶穌對in應允講，tī祂ê國裡（認為耶穌緊beh做王ā），祂ē hō͘ in ta̍k人lóng坐tī寶座頂面來審判以色列人，心內一時心頭開，lóng一致認為跟tòe耶穌四界傳道、醫病、趕鬼，時間無tshái工。彼得koh khah挺身出來對主講：主ah，當祢受害、遭遇災難ê時，若有人beh凌辱祢、phah祢，「我一定beh kah你同死，mā絕對bē m̄認你。」既然有寶座thang坐，所有ê門徒lóng是kah彼得異口同聲án-ne講。M̄-koh，耶穌卻對彼得警告講：「我實在kā你講，今暝雞啼tsìn前，你ē三pái m̄認我。」（馬太26：32-35，馬可14：28-31），因為耶穌知影，撒旦既然進入偤大ê心內想beh出賣ka-kī ê老師；撒旦mā想beh得tio̍h其他ê門徒，kah-ná篩麥á仝款，搖動in跟tòe主傳福音ê決心！當時耶穌預告彼得講：「今á日雞iáu未啼，你ē三pái講bē認得我。」「M̄-koh，我已經為你祈求，hō͘ 你bē致使失了信心。你回頭以後，tio̍h堅固你ê兄弟。」（路加22：31-34） Tī Poâⁿ過節hit暗ê餐席teh beh結束ê時，約翰koh記錄耶穌對in所講述真tsē非常重要ê話，講：「Lín心內m̄-thang憂愁；lín信上帝，mā tio̍h信我。Tī我父ê厝裡有真tsē khiā家；…我去原本是beh為lín去預備所在。我若去為lín預備所在，我tī tó位，叫lín mā tī hia…。」koh講：「我to̍h是道路、真理、性命；若無藉tio̍h我，無人ē-tàng去到父hia。」

耶穌當時koh實實在在kā門徒講：「我所做ê工作，信我ê人mā ài做，而且tio̍h做kah比tsiah-ê koh khah大，因為我到父hia去。Lín奉我ê名無論求啥物（只要符合上帝ê旨意），我必成全，為tio̍h hō͘父因為Κiáⁿ得榮光，lín若奉我ê名向我求啥物，我必成全！」

續落來耶穌koh應允門徒講：「Lín若疼我，to̍h ē遵守我ê命令（彼此相疼）。我要求父，父to̍h ē賜hō͘ lín另外一位保惠師（聖神），hō͘ 祂永遠kah lín同在。…hit位真理ê聖神來ê時，beh為我做見證。Lín mā tio̍h做見證，因為lín tùi起初to̍h kah我同在。」

耶穌koh對門徒解說講：「真理ê聖神來ê時，祂ē引tshōa lín進入一切真理。因為祂m̄是想ka-kī所講ê，卻是kā祂所聽見ê lóng講出來，而且beh kā teh beh來ê tāi-tsì對lín傳達。…」

耶穌講suah tsiah-ê話，祂to̍h gia̍h目ǹg天，對父祈禱講：「我tī地tsiūⁿ已經榮光祢，祢交hō͘ 我做ê工作，我已經完成à。」

有關耶穌對門徒siōng尾臨別ê話kah祂ǹg父所祈求ê tāi-tsì，lóng記載tī約翰福音第14-17章，請詳詳細閱讀，對基督徒ê信心，將來ê ǹg望kah上帝ê應允，有相當tsē ê賜福kah喜樂tī tsit內面。記tiâu！一定tio̍h親自用心去研讀。

耶穌ê門徒tī耶穌ê臨別教導中聽tio̍h耶穌講：「Lín tī世間ē有苦難；獨獨lín thang放心，我已經贏過世間。」（約翰16：33）Ιn認為耶穌beh做王一定ē tú-tio̍h苦戰。Koh聽tio̍h耶穌對in講：「M̄-koh，taⁿ有錢袋ê tio̍h帶去，有行李袋ê mā tio̍h帶去；無刀ê人，tio̍h賣伊ê外衫，去買刀來帶去。」（路加22：36），所以當耶穌tshōa門徒離開晚餐樓，經過汲淪溪，面ǹg橄欖山行ê時，沿路唱詩，沿路行路。行路ê時，彼得身tsiūⁿ to̍h有配帶一支刀，iáu有一支刀由另外一个門徒配帶，預備萬一發生意外，beh gia̍h刀起來保護耶穌；耶穌向in講，有兩支刀「有夠」。（路加22：35-38）

Oh！耶穌siōng尾一工自由tī耶路撒冷ê行動中所發生ê tāi-tsì，教導眾人kah門徒ê話「有夠tsē ā」。尤其tī Poâⁿ過節暗時ê餐席中所賜hō͘門徒ê一條新ê誡命「彼此相疼」是用祂ê寶血kah門徒所立ê新約，落實摩西ê律法kah眾先知教導ê總綱，非常重要！耶穌kah門徒講再會ê sî，用ǹg父祈禱做結束。

Τī tsit工所發生ê tāi-tsì中間，今á日世界kám bē koh出現偤大tsit種角色ê人物？咱一定tio̍h非常謹慎，tsit項tāi-tsì teh警告咱ta̍k位基督徒：Ē出賣教會kah牧師ê人，m̄是非基督徒，卻是教會內ka-kī ê長執á是會友！仝款道理，ē出賣台灣ê人mā m̄是外國人，乃是tòa tī台灣島上ê爪粑á kah內賊！Bē-tàng無謹慎預防。Tsìn前國民黨tī台灣執政ê時，tiāⁿ-tiāⁿ警告台灣人講：「一定tio̍h細膩（sè-jī），共匪可能to̍h tī你身邊，知匪不報，kah匪同罪！」M̄-koh，siōng驚人ê tāi-tsì to̍h是「有某一kóa國民黨ka-kī ê黨員，本身to̍h是隱身ê匪諜！」Κám m̄是？今á日tī台北市高舉中共五星旗鬧事koh phah人ê統促黨kah愛國同心會koh khah是「共匪」ê phah手。世tsiūⁿ ê智慧者所羅門bat講：「所ē有ê是早前已經to̍h有ê；所ē做ê是早前已經to̍h做ê。Tī日光ê下面無有新ê tāi-tsì。」（傳道書1：9），所以咱bē-sái無警醒，bē-sái無關心台灣ê將來，成做一个信望愛、真善美、自由、民主，有人權koh有公義ê正常國家，為咱ê kiáⁿ孫留落來一塊平安、喜樂ê美麗島！ 　　
請m̄-thang bē記得回顧歷史ê教示：美國總統林肯是hō͘ 美國白人暗殺ê，約翰甘乃迪總統kah伊ê小弟羅伯特甘乃迪mā是hō͘ ka-kī ê同胞暗殺ê。印度總理甘地夫人是tī她ê寓所hō͘ 她信任ê錫克教ê侍衛暗殺ê；韓國總統朴正熙演講ê時，hō͘伊ê侍衛長正面槍殺ê；埃及總統沙達特閱兵ê時hō͘ 部下暗殺來死。以色列總理拉賓tī特拉維夫廣場演講ê時，mā是hō͘以色列ka-kī ê人暗殺ê.…。平時有真tsē暗藏tī你身邊ê叛徒「偤大」，笑裡藏刀，向你親嘴示好，ài對你講「好聽ê話」，bē-tàng無謹慎！