《《一位台灣女信徒ê自述》》

 | | | 轉寄

第一章 11）進入淡水女學院

作者 吳月娥, 台譯：Lîm Tsùn-io̍k 2020.05.31

當我tùi頭圍庄公學校畢業去讀宜蘭ê高等科ê時，頭圍基督教會來一个少年 tsa-bó͘ gín-á，她教主日學，彈風琴，koh教全體會友唱聖詩；她是淡水女學院ê畢業生，名叫姚氏阿拿。阮阿媽真kah意阿拿老師，她認為「若是我ê tsa-bó͘ 孫阿娥mā去淡水讀冊，她tio̍h ē-tàng彈奏風琴，教聖詩，而且成做主日學ê老師。」所以她徵求阮父母ê同意，kā我送入淡水女學院，m̄-koh，阮老父無同意；伊主張講「Tsa-bó͘ gín-á讀宜蘭高等科畢業to̍h有夠額ā，咱田庄人無需要去讀高等女學校。」M̄-koh，阮阿媽一屑á都無beh放棄，幾nā pái去礁溪說服阮老父，致使伊終其尾同意à。Tùi礁溪到淡水，坐火車tio̍h四點半鐘以上，所以當然tio̍h tòa宿舍，m̄-koh，ta̍k個月ê費用是20元。Tsit筆錢hō͘ 阮tsit-ê中產家庭帶來沉重ê負擔，佳哉因為有阿媽ê幫贊，我tsiah ē-tàng穿淡水女學院ê制服。He是1936年ê春天。

淡水女學院ê校長是一位加拿大宣教會派來ê大約40歲ê婦人，是身材苗條ê金髮女郎。我bē記得tsit間學校ê創立日期，m̄-koh我認為是tī 1915年左右成立，因為頭一屆ê畢業生比我khah大十七、八歲（譯註：1884年，加拿大長老教會傳教士馬偕創立淡水女學堂，he是臺灣第一間女學校；1901年，該學堂因馬偕別世一度停辦；1907年再度復校，改名「淡水女學校」；1915年，增設高等女子部，改名為「淡水高等女學校」；1922年，又改名為「私立淡水女學院」，to̍h是月娥ê學校；1945年後bat kah淡水中學合併，成做淡水中學女子部，後來koh分離，改稱作「私立純德女子中學」，1956年kah淡江中學合併）。基督教tī 1865年傳來到台灣南部，1972年傳來到北部。當時是一位加拿大ê宣教師，名叫馬偕博士，伊家己一个人來到台灣，tùi淡水tsiūⁿ陸，tùi hia開始傳教。伊聚集少年人，建立中學校來培訓傳道師，而且建立「偕醫館」（後來台北市ê馬偕病院是teh記念馬偕），為台灣人做出重大ê貢獻。另外，伊koh tī中學校附近設立女學堂，來自台灣各地，無法度進入公立學校ê人，以及牧師kah傳教者ê子女lóng聚集óa來。因為tsit間學校是以傳福音做目的ê學校，所以聖經課程mā是常規課程ê一部分，m̄-koh一般人並m̄知這是一間以宗教為目的ê學校。看tio̍h無法度進入公立學校ê gín-á ē-tàng輕鬆進入tsit間學校，致使有人講tsit間學校ê學生lóng是無優秀ê gín-á。

台灣前總統李豋輝mā是淡水中學ê畢業生。最近有一个tī台灣小學教20 gōa年久ê老師問我：「李總統是淡水中學出身ê，伊ná有法度進入台大？」伊kah-ná感覺不可思議，tsiah ē án-ne問，m̄-koh，一个gín-á ê環境kah伊未來ê表現，人是無法度知影ê。Tio̍h算tī田庄學校得tio̍h siōng好ê成績，若是來到城市，伊mā ē lak到中kē級。田庄學校ê競爭m̄是真激烈，mā無gín-á升入去中學校，父母tī教育方面mā無gōa積極。

結婚後ê 15年內，我去頭城從事醫療工作，我ê gín-á去讀頭城國民學校。In lóng得tio̍h siōng好ê成績，m̄-koh，將來若beh進入一流ê中學、大學，tio̍h考慮需要kā in轉入去台北市ê國民學校。所以，tī in小學三年、四年ê時，我to̍h kā in轉去讀台北ê學校，後來，in tī台北受tio̍h升學考試ê致蔭，三人lóng ē-tàng進入一流ê中學kah大學。

淡水是一个風景真súi ê所在；淡水河ê對面to̍h是觀音山，淡水市街一直伸展到它ê山kha；淡水ê海岸線有台灣唯一ê山球（golf）場，mā有我ê母校tī hia，包括它ê中學校kah神學院。淡水女學院是一棟兩層樓ê英國式紅磚建築，有綠色ê草坪kah花壇；學校傳出ê鋼琴聲kah合唱團ê歌聲，不時teh安慰沿街路經過ê人ê心靈。

我來到淡水女學院ê目的之一是學鋼琴，因為án-ne，我隨時去上鋼琴課。這是一項課外ê私人課程，tio̍h額外支付一學期ê學費；我ê鋼琴教授是來自加拿大ê泰勒老師，當時tī台灣無人ē贏過她；她是西方音樂啟蒙者ê名聲，傳遍全台灣。

Ta̍k禮拜阮kan-taⁿ有一pái鋼琴課，了後ta̍k工lóng tio̍h ka-kī練習。學校有五間小琴房，內底有鋼琴，歇睏ê時ē-tàng免費使用。Tùi一年級到四年級，學習鋼琴ê人數ē-sái講是bē少，所以下課ê鐘聲一響，tshìn-tshìn-tshái-tshái kā老師行禮了後，ta̍k人to̍h緊tsông去琴房。

Tī厝裡放暑假了後koh tńg去學校，我看tio̍h：「陳仁愛老師beh去讀東京青山學院音樂系，鋼琴學習停止」ê告示，感覺真失望。陳仁愛老師是牧師ê tsa-bó͘ kiáⁿ，淡水女學院畢業。結局，這是kan-taⁿ維持一學期ê簡短課程。

Tùi 1936年第二學期開始，我注意tio̍h學校ê氣氛kah-ná真奇怪；Argo校長kah安藤教務長tńg去in ê母國tsìn前，並無對學生講再會。當學生tī不安中結束第二學期ê時，in發見日本政府開始驅逐外國人，而且接收學校。In mā注意tio̍h學校被改做普通學校，無koh再是一間宣教學校，而且tī hit年年底，有坂一世校長kah真tsē日本人教師陸續被差派來學校。學生m̄知影目前為止，原本ê老師已經去tó位，kan-taⁿ知影以下ê老師是來自日本：有坂一世老師（淡水中學、淡水女學院ê校長），堤老師（教務長、教歷史kah地理），田中心一老師（國文），田村老師（數學），岩崎老師（英語），岡村初子老師（體育），渡邊老師（裁縫），大土井老師（家事），佐藤老師（音樂），齊藤老師（物理kah化學）。

中村敬輝老師教美術；伊是台灣人，名叫陳敬輝，伊ê bó͘ 是日本人。伊以前to̍h tī tsit間學校教課，改日本名了後，tsiah ē-tàng繼續留tī tsia教冊。