《《一位台灣女信徒ê自述》》

 | | | 轉寄

第二章_11）我一心想beh離開岩槻回台

作者 吳月娥, 台譯：Lîm Tsùn-io̍k 2020.10.04

1944年，我tùi心底一直teh思念台灣；無論tú-tio̍h啥物危險，我lóng無法度控制ka-kī beh kah父母見面ê心願，我終於去kah頭家娘講明；她驚一tiô，kā我阻止。金子齒科診所有真tsē病人，院長kah阮ê三名醫生，tùi早起時八點到下晡五點，無停teh診療病人；若是阮離開，in ē真傷腦筋。M̄-koh，我beh tńg去厝裡；德子講她beh tòe我離開。阮就提出辭職書。金子齒科診所ê人知影阮ê決心真堅定，金子齒科診所to̍h放棄，講：「Lín先去東京，若是無船班，隨時歡迎lín tńg來。」Tsit-má想起來，我kan-taⁿ teh想ka-kī ê tāi-tsì；不管kā我ê tāi-tsì當做ka-kī本身ê tāi-tsì tsit種hiah-ni̍h親密ê人，我反省m̄知溫情ê自我。

阮三人to̍h去東京。我ê同學陳彩雲無上班，tòa tī下北澤ê寄宿房間內，我就tī hia借tòa一站á。厝主是一對大約五十歲ê夫婦，阮tòa tī二樓，in mā照顧阮ê三頓。我隨時去丸の內（まるのうち） ê一間船公司，問開往台灣ê船班，m̄-koh出發日期是秘密，若是我登錄我ê姓名kah地址，若有船班to̍h ē盡緊通知。

前一年，to̍h是1943年ê熱天，發生こ千穗丸沉船事案，真tsē台灣留學生死亡。Tī死者中間，有周鵲美ê叔伯小妹瑪麗小姐；我去tòa周家ê時，我有tòa做伙生活。瑪麗ê老母是齒科醫專ê大前輩，mā是台灣政界出名人物郭國基ê小妹。Tī日本統治期間to̍h kah政府激烈對立，伊tī東亞大戰期間mā提倡反對政府ê論述，瑪麗ê老父kah郭國基（郭大砲)被判入獄。瑪麗是一直想beh見ta̍k工teh流目屎過日子ê老母，因為án-ne tsiūⁿ船，suah不幸沉船。她是東京ê桐朋音樂學校聲樂出身，beh tńg來台灣tsìn前兩工，她tī日比谷（ひぴや）公會堂館舉行一場音樂會，就án-ne kah翁婿tī沉船事件中來犧牲。Hit時真tsē tī東京ê台灣留學生參加tsit場音樂會，我mā有去

Koh khah hō͘人tio̍h驚ê是，以後成做我ê翁婿ê許嘉代mā是預定坐tsit台船，m̄-koh，東京醫學專科學校忽然通知tio̍h去長野縣進行野外演習，因為án-ne tsiah取消tsit班船ê預訂。M̄-koh，因為伊無通知台灣取消ê消息，台灣ê家族去基隆，對沉船ê消息感覺悲痛。啥物是人類ê運命？ 我tī東京無工作，tī寄宿ê所在戇戇á過日子。一个禮拜日，我tshōa大家去新宿ê角筈(つのはず)教會。早起時是日本人聚會，下晡由台灣ê郭馬西牧師（伊是少年ê牧師，去紐約哥倫比亞神學院留學）聚集台灣人做台語禮拜。Tī禮拜suah ê開講中，阮講阮來東京是beh等船tńg去台灣，一位女士講：「神田êガ—ド下有一个算命先，lín tio̍h去看伊。Hit-ê算命先講tńg去無要緊ê人tsiah ē-tàng平安tńg到厝，若是講bē-sái tńg去koh強強beh tńg去ê人，通常ē成做海藻个碎片。」實際上，我經常tú-tio̍h tsit種情況，m̄-koh，我若是tī教會內án-ne講，我意識tio̍h我to̍h是真正無teh重視上帝。

人類是好奇心真強ê動物。阮知算命m̄是基督徒做ê tāi-tsì，m̄-koh，幾工後阮to̍h去拜訪hit位算命先。我先hō͘ 伊算，伊kah-ná是講：「你睏tī水裡mā bē死。你tī四個月內ē結婚。」Tsit-má我kan-taⁿ考慮beh tńg去台灣，結姻ē-sái講是hàm古ê笑話。續落來是德子，伊講：「你tsit-má有一个學士學位，m̄-koh將來你ē koh得tio̍h另外一个學士學位。」咱都是齒科醫學士，ná ē得tio̍h另外一个學位？這mā是一个笑話。換到鄭雲，伊講：「因為lín老父ê致蔭，你tsit-má真幸福，m̄-koh以後若是無謹慎，ē tú-tio̍h真tsē災難。」輪到周鵲美， 伊講：「你ē khah慢結婚，m̄-koh你ē tú-tio̍h一个免煩惱衣食住ê好翁婿。」伊對陳彩鸞講：「你將來結婚了後，ē去一个遙遠ê所在。」 Ta̍k人lóng認為這是teh講笑，並無khòa意。