《台語遊戲教學》

 | | | 轉寄

我siōng緊

作者 梁淑慧 2005.10.23

學習ê技能：字母ê字形kap發音ê對應。

使用ê時機：學生已經學過2-ê以上ê白話字ê字母抑是聲調時。

需要ê教具：
烏枋（抑是白枋）
吸鐵（用來固定字母卡）
白話字字母卡（抑是聲調卡）2張以上
2枝塑膠槓槌仔（抑是蠓捽仔）

活動前ê準備：
將beh hō͘學生辨認ê字母卡（抑是聲調卡）用吸鐵固定tī烏枋。
全班分做2組。

按怎sńg:
請各組照輪流1擺派1位代表出列，分hō͘代表ê學生1人1枝塑膠槓槌仔，khiā tī 離烏枋2~3公尺ê所在。
老師唸1-ê字母ê發音，學生ài照所聽著ê音去摃字母卡（抑是聲調卡），看啥人緊koh正確，hit組to̍h會當得1分。
累積分數khah kôânehit組贏。

變通ê活動：老師所唸ê音會當看學生ê程度來變化辨音ê困難度。
一開始會當1擺唸1-ê字母ê發音，譬如：單母音（1）a、（2）i、（3) ui̍…。子音（1）k、（2）kh、（3）h……。聲調（1）a、（2）á、（3）â……等。
進一步會當1擺唸1-ê包含該字母ê單音節詞，譬如：（1）ma(媽）、（2）ti(豬）、（3）tshù(厝）……等，hō͘學生照所聽著ê音去摃母音卡。抑是（1）ká(絞）、（2）khì(去）、（3）hê(蝦）……等，hō͘學生照所聽著ê音去摃子音卡。
程度khah kôâne會當1擺唸幾若ê連續ê音，學生ài照所聽著ê順序去摃字母卡（抑是聲調卡），譬如：（1）a、e、o;(2）i、u、o͘；(3）gû、lé、hō……等，抑是（1）ka、khu、ho;(2）khi、he、ko;(3）hái、khàu、kî……等。

請注意：
老師ài先設定1擺複習ê範圍是仝性質--ê,譬如：單母音、複母音、子音、聲調……等。
會當tuì khah簡單ê,1擺比較2-ê字母（抑是聲調）開始，看學生ê程度來增加所複習ê字母（抑是聲調）ê數量。
Tsit-ê活動會當用來複習「上細對比組」。譬如：子音聲母「送氣音」kap「無送氣音」、「清音」kap「濁音」；「鼻化母音」kap「無鼻化母音」；入聲韻尾「-t」kap「-k」；鼻音韻尾「-m」kap「-n」kap「-ng」；「入聲」kap「非入聲」；聲調「第一聲」kap「第七聲」、「第四聲」kap「第八聲」……等。
一開始會當用khah慢ê速度唸，然後看學生ê反應漸漸將唸ê速度變khah緊，增加活動ê刺激性。