《生活e5台語，台語e5生活》

 | | | 轉寄

蕭泰然大師受獎

作者 鄭兒玉 台譯：潘為欣 2009.01.25

蕭泰然老師 beh受文化獎 ê前幾日，我才接著行政院文建會ê正式邀請函，大概是由bet tuà tī LA ê林衡哲醫師kā承辦單位介紹ê。邀請書連提起一擺“蕭泰然”三ê字lóng無，因為我事前已經接過林醫師電話，所以知影受獎人是蕭老師，不過照邀請函ê含糊文句來看，可能也有其他人士beh受獎。總是，不管受獎ê人有幾個，因為我kap泰然兄弟ê個人交情，就撥工起身上北參加，去到現場才知影，受獎人只有蕭老師一個人nā-tiāⁿ。

文化獎ê活動手冊封面，相siâng無提起半字受獎者蕭泰然ê名。Tī手冊頭頁下腳，有用真細ê字印講：「台灣ê拉赫曼尼諾夫情繫鄉邦ê作曲大師」，這位“大師”到底是啥人，猶原無提起。手冊第二頁才有行政院長劉先生ê寫文內底講著蕭泰然ê名，這是頭一擺提起“蕭泰然”ê名，tī第三頁mā有講著《1947序曲》ê代誌。 總是，由承辦單位準備ê VCR當中，看著內面所介紹ê“得獎人”，就明顯展露出主辦單位進退兩難ê苦心。Tī“年表”內底有講著：「1994年完成《1947序曲》」，VCR就直接uì 1991年跳過去1995年，kan-nā有意忽略1993到1994那年ê代誌，也就是救主誕前後ê心臟大病，佳哉經過名醫救活，才ē-tàng完成伊人生上高峰ê作品《1947序曲》(包含《台灣翠青》)。

1997年蕭泰然病後第一擺回國，tī國家音樂廳劃時代ê來演出《1947序曲》，但是tī VCR ê“年表”當中，有關這號代誌那親像編者lia̍h無著中心點仝款，故意模糊。頒獎典禮hit日大略有五、六百人參加，hông邀請ê來賓， 以當場ê氣氛來看，大部分是文化界或欣賞古典音樂 ê人士kap學生，無看見欣賞《台灣翠青》ê民主運動人士。

隔轉天(09.01.08) ê自由時報只有刊tī「D版」nā-tiāⁿ。今仔日(09.01.09) ê《自由時報》(A版p.15) 盧孝治先生彼篇，那准是hō͘蕭老師ê彌補。最後結尾來講，tī馬英九ê天下，“蕭泰然老師被表揚”比無khah好。

以下是盧孝治ê文章。

如果更多人聽蕭泰然

今仔日下晡tī台北喜來登飯店參加一場使人感動ê頒獎典禮。由行政院劉兆玄院長將第廿八屆文化獎頒hō͘作曲家蕭泰然。 感動是因為蕭泰然大師，伊ê人、伊ê音樂。大師虛懷若谷，伊ê音樂展現ê是上帝hō͘伊ê感動，以及伊對這塊土地ê愛kap奉獻。蕭大師已經是有歲ê人，伊慢慢行上台頂受獎講：「我鼓勵大家，大家mā鼓勵我，做伙來行這tsuā有意義、無簡單ê路—─繼續為台灣付出。」

頒獎典禮上，演出伊ê名作「上美ê花」、「永遠ê故鄉」，真tsē人kap我仝款受感動，伊ê人、伊ê音樂hō͘阮感動，心靈受聖潔ê洗禮。

蕭大師因為做tsia-ê曲，bat是黑名單，有厝bē-tàng轉去。Kap真tsē愛台灣ê人仝款，阮有「福爾摩沙之夢」，阮希望台灣成做新koh獨立ê國家，阮期待公義tī這塊土地上實現。 Siáⁿ hō͘蕭老師變做黑名單？Siáⁿ 造成「福爾摩沙之夢」無法度實現？Siáⁿ阻礙公義降臨這塊土地？當然是外來ê國民黨政權。蕭老師ê音樂安慰每一位為台灣受難、受冤、打拚付出ê人，伊寫ê「台灣翠青」，早就是咱心中ê國歌。

1945年中國ê國民黨政權，theh槍來到版圖之外ê台灣（in制憲ê版圖無包括台灣），1949年in失去所有ê版圖，suah宣稱光復台灣。但是國際上已經無人承認「中華民國」，也無人認為這個流亡政府對台灣ê統治是合法ê。現實上ê佔領kap殘忍ê屠殺、白色恐怖，留下太tsē血淚kap不公不義。

蕭泰然—─咱敬愛ê大師，竟然beh uì殘害打壓「台灣魂」ê國民黨劉兆玄手中領這個獎！當然劉會講伊是合法ê,因為馬指派伊，馬也講伊是合法ê,因為伊得著七百萬票，是lín台灣人甘願選出非法ê政權，hō͘ in穿合法ê衫。

唉！假使有koh khah tsē ê台灣人聽蕭大師ê音樂，今晚頒獎人就m̄是劉兆玄。