《生活e5台語，台語e5生活》

 | | | 轉寄

全民來認股—守護濁水溪

作者 吳賢寧 2011.12.25

自早以來，衛生署就拍拚鼓勵民眾運動。加油哦！每日至少動十分鐘，對身體，就有淡薄á幫忙，如果一禮拜，會當動150分鐘，當然上好。

講著運動，對心血管幫助上大ê，可能就是有氧運動啦！這當中包括緊行，慢走，泅水， 腳踏車；種種方式，依你體力，由在你揀，但是，愛注意哦，足濟老大人習慣早時空腹運動，中晝飯後補眠，按呢顛倒對循環系統真不利；倒反來講，如果三頓飯後，馬上厝前厝後，行行幌幌半點鍾，其實，對血糖血油就有一定效果。 如果每日正確運動， 會使降低血油膽固醇，改善睏眠，Iá 有愈好ê，會改善血壓至 20 mmHg，如此，理論上， 可以減少一半心血管疾病，佮部份癌症。

讚無？當然讚啦！所以，咱衛生署認真推Sak 運動，但是，結果咧？近年國人心血管病，竟然有增無減。

是發生啥tāi-tsì？敢是咱民眾不受教，貧惰nuā性？當然毋是囉，政府鼓勵大家運動時，可能袂記，足濟愛運動ê民眾，卻是愈運愈無爽快，因此也愈懶，這時就愛考慮，當中，必定有濟濟問題需要解決。

首先，運動時呼吸，是平時6倍，也就是講，若佇工業交通繁忙中運動， 無論室內室外，攏可能吸著6倍坱埃毒氣， 包括PM10，PḾ.5，硫化物，氮化物，臭氧。遮个文明產物，可能增加50%癌症死亡，20%心臟病；愈慘ê，有人欶著汽車坱埃，馬上就大心氣，噗噗惝，運氣若Ba2i，凡勢心臟病馬上發作，即時就嗚呼哀哉，再見囉！今年，政府，猶原大力推sak高污染 ê 中科工業區時，咱憑啥質問，In為何無運動？

氣候也是一大問題，現代都市有濟濟熱島，出外運動若著痧，也可能引發心肌梗塞。當然上健身房吹冷氣，會使解決，但是，分配不公，無錢無閒上健身房ê民眾愈來愈濟， 咱憑啥質問，In為何無運動？

就算有錢有閒，每日行運動中心，通常嘛愛來到鬧區。人車洘秫秫ê 所在，噪音，也可能夯血壓，造成腦中風。尤其容易被忽略ê，是人耳感覺袂著的低頻噪音。這款聲響可能來自機械，汽車，飛凌機，風葉，重音喇叭；低頻聲波會軁牆迵壁，引起心神不寧，歹性地，但因為兇手無“聲“，無色，無味，受害者出外運動時，也可能莫名中，心頭嗶噗筅，心驚搭嚇。僫得了解原因。正當咱都市中，吸收噪音ê 綠地草埔， 一塊一塊消失，咱憑啥質問，Īn為何無運動？

好—啦， 如果， 你運動中無法輕鬆自在，可能毋是你ê 錯。請上病院檢查，也請想看覓，咱ê環境中， 有偌濟不公義，不友善ê元素，需要了心思克服？這也是世界衛生組織， 推廣健康城市ê目的。

其實，最好ê運動埕，m̄是大巨蛋，m̄是健身房，應是家己厝內，抑是徛家附近，清幽平坦ê空地，小可蔭涼當然上好。按呢，咱會使隨時，隨興，隨家己體力，做無仝運動；若發現這款所在， 相信飯後顧電視ê，應該會大大減少。而一大片森林，尤其有老樹ê 森林，正正符合這个條件。

森林公園可降低20%空氣污染，會穩定氣候，予氣溫下降2~5 °C， 牆溫降25 °C，噪音降2~5 分貝，會提供身，心，靈 ê 治療。甚至，有一寡小型實驗，認為森林中運動，會使增加免疫力。所以，閣認真想看，你身軀邊，猶有這款所在無？
KOh來，又koh來矣，連咱總統攏出面推廣，講愛強身強國，但是，同時間，咱都市森林被大量破壞，起造大巨蛋；良田綠地被毀滅，起造工業區；薪勞加班愈來愈悿頭，濟濟民眾，時間，空間，環境攏被剝削。按呢，咱政府敢閣好意思問講-In是按怎無愛運動？