《生活e5台語，台語e5生活》

 | | | 轉寄

Lo̍h Î-jîn Phok-sū Siū-pan Îng-ū-phok-sū Kám-giân

作者 Lo̍h Î-jîn 2012.10.14

1. Jīm-tông Siū Pak-siah ê Guân-tsū-bîn Guán tsuân-ke ê lâng lóng tsin tsun-tiōng guân-tsū-bîn, khuàⁿ in tsuè ka-kī ê lâng. Tī 1928 nî ê hioh-jua̍h, guán pa-pa siū phài khì Hōng-lîm si̍t-si̍p. Ū tsi̍t ji̍t, i khuàⁿ-tio̍h tsi̍t ê Taroko ê tông-pau tuì suaⁿ-tíng phāiⁿ tsi̍t tuā láng kin-tsio lo̍h-lâi kue-á buē hō͘ tsi̍t king suè king tiàm. Tiàm-tsú hō͘ i tsi̍t-kak puàⁿ gûn, i suî-sî khai káu sián tsîⁿ khì bué tsi̍t kuàn bí-tsiú, koh īng saⁿ sián tsîⁿ bué sió-hî-pó͘, tsē tī tshiū-á-kha lim tsiú; bô kú, I khai-sí tshiùⁿ tsiú-kua, kóng tsiú-uē, lim liáu tsiū tó lo̍h-khì thô͘-kha khùn. Khùn tshíⁿ, khuàⁿ-tio̍h ji̍t-thâu teh beh lo̍h-suaⁿ, kám-kak pak-tó͘ mā iau, i tsiū tò-tńg khì siâng hit king tiàm, īng só͘ tshun ê saⁿ sián tsîⁿ bué kuí tiâu-á í-king nuā-khì ê kin-tsio, tsi̍t-sî-á kú thun-liáu-liáu, jiân-āu khang-tshiú tò tńg-khì tshù nih, bô bué puàⁿ-hāng tńg-khì hō͘ tī tshù-ni̍h teh tán, teh iau-gō ê bó͘-kiáⁿ.

Só͘ khuàⁿ-tio̍h tsit ê kî-īⁿ ê tsîng-kíng tī it-sūn kan pìⁿ-tsuè īⁿ-siōng: guán pa-pa tī hit sî, hit só͘-tsāi kuat-tsì, tsiong-lâi beh khì tuì hō͘ tsìng-hú khi-ap kap Tâi-uân-lâng pak-siah ê guân-tsū-bîn thuân hok-im.
Uī-tio̍h beh si̍t-tsián tsit ê kuat-tsì, guán tsuân-ke tī 1948 nî puaⁿ-khì Tâi-tang. Tuì hit-tsūn khí, guán tshù tsiū pìⁿ-tsuè kán-ná lú-kuán, ū guân-tsū-bîn tshut-tshut-ji̍p-ji̍p, put-sî to ū guân-tsū-bîn lâi tuà, lâi tsia̍h-pn̄g; guán lóng tuì-thāi in ká-ná ka-kī ê hiaⁿ-tī á-sī tsí-bē. In-uī án-ni, Thian-Hiong kap guá tī 1995 nî beh tuì Hong Kong puaⁿ tńg-lâi Tâi-uân ê sî, guán khai-sí siūⁿ, tsiong-lâi tsiah-ni̍h tsuē ê tsheh beh hō͘ siáⁿ-lâng. Guán tsi̍t-kú-á tsiū kuat-tīng beh lâu hō͘ ka-kī só͘ jīm-tông ê tso̍k-kûn – tsuan-bûn hùn-liān guân-tsū-bîn thuân-kàu-tsiá ê Gio̍k-san Sîn-ha̍k-īⁿ.

Guán m̄-sī ū-tsîⁿ-lâng, sing-ua̍h phok-sò͘. Tī Princeton tha̍k-tsheh thâu tsit nî (1960) ê tang-thiⁿ, in-uī tsin kuâⁿ, guá tsiū khì Salvation Army ê kū saⁿ-tiàm bué tsi̍t niá jacket; hia teh buē ê lóng-sī lâng m̄-ti̍h ê kū saⁿ, tsin sio̍k, guá īng nn̄g-kak-puàⁿ kā i bué tńg-lâi. Hit niá jacket kàu kin-á-ji̍t (60 nî āu) guá iáu-teh tshīng. Thang kóng, tsiah-ê tsheh sī guán khiām-tn̂g neh-tō͘ bué ê. Sui-jiân guán tsin khiām, m̄-kú nā bué-tsheh tsiū tsin phàⁿ-tshiú. Tsiah-ê tsheh ū juā-tsuē pún, guá m̄-bat sǹg. Gio̍k Sîn ê truck í-king lâi tsài sì piàn, tsì-tsió tio̍h koh lâi nn̄g piàn tsiah puaⁿ uē-liáu. Guán mā ū siu-tsi̍p tsiâⁿ-tshing phìⁿ ê CD, tuā pō͘-hūn sī sìng-ga̍k. Koh bô kú tsiah-ê lóng uē lī-khui guán, ū ê í-king tī guán sin-piⁿ gō͘-la̍k-tsa̍p nî ā , sǹg sī lāu pîng-iú; beh kap tsiah-ê pîng-iú saⁿ lī, buē bián tit pi-siong. Gio̍k-Sîn lâi puaⁿ tē sì piàn í-tsîng, liân-suà nn̄g àm, guá tsi̍t-ê-lâng gōng-sîn-gōng-sîn tsē tī í-king tsíng-lí hó-sè ê tsheh bīn-tsîng ti̍t-ti̍t siòng, ti̍k-pia̍t sī khuàⁿ-tio̍h tsi̍t kuá Thian-Hiong īng tsin tsuē tsing-sîn, tsin tsuē sî-kan, tsin tsuē tsîⁿ tuì sè-kài tshut-miâ ê phok-bu̍t-kuán bué tńg-lâi ê; ū-ê sī i iáu bô ki-huē sú-iōng tsiū tsìn-ji̍p i ê ko͘-to̍k sè-kài – khuàⁿ-tio̍h hiah-ê bîng-uē kap tsheh ê sî, buē kìm-tit ba̍k-sái tsha̍p-tsha̍p tih, ná tsún beh kap siōng tshin-bi̍t ê tshin-lâng saⁿ lī-pia̍t tsi̍t iūⁿ. Bô tsheh tī sing-khu-piⁿ si̍t-tsāi tsin pi-siong koh bô hong-piān. Guá ta̍k-ji̍t to in-uī beh tha̍k á-sī tsham-khó bó͘ tuê-ba̍k á-sī bó͘ pún tsheh, tsóng-sī í-king bô tī sin-piⁿ lâi kám-kak khó͘-náu.

Kî-si̍t, tsiah-ê Sìng King, tsheh, kap CD - guán só͘ ū ê it-tshè, sī beh lâu-teh hō͘ ka-kī só͘ jīm-tông ê tso̍k-kûn ê, beh siu-tsông tī Gio̍k Sîn ê “Kì-liām Lo̍h Sian-tshun, Lo̍h Âng Bín Sìng King Bûn-kàu Kuán” lāi-bīn, ing-kai tio̍h in-uī ū hiah-ni̍h hó ê só͘-tsāi thang hē lâi huaⁿ-hí tsiah tio̍h. Guán tsin ǹg-bāng ū tsin tsuē lâng uē sú-iōng tsit ê Bûn-kàu Kuán, thang pang-tsān ka-kī khah liáu-kái Siōng-tè ê uē ê ò-pì, tit-tioh kà-sī kap tsō-tsiū, iā tuì tsiah-ê hó-thiaⁿ ê im-ga̍k tit-tio̍h kik-lē kap an-uì.

2 Khiā tī Īⁿ-tuan Tsoh Sîn-ha̍k
Taⁿ tshiáⁿ iông-ún guá tuì it-sing ê kang-tsok tsuè kán-tan ê kau-tài. Uē-tàng kóng, guá it-sing ê kang-tsok lóng-sī khiā tī īⁿ-tuan tsit pîng lâi tsuè ê.

Guá tī 1960 nî khì Princeton Sîn-ha̍k-īⁿ tha̍k tsheh, tī 1968 nî uân-sîng ha̍k-gia̍p tsiū tńg-lâi Tâi Sîn kà-tsheh. Guá tī Tâi Sîn kà bô-juā-kú tsiū khai-sí kám-kak ū būn-tuê. Guá só͘ kà ê hō͘ lâng phuàⁿ-tuàn tsuè “īⁿ-tuan”. Pó-siú ê suan-kàu-su sing khai-phàu, āu-lâi táng-sū kap hāu-iú khai-sí khòng-gī, tsō-sîng khùn-jiáu. Kai-tsài, tng-sî ê īⁿ-tiúⁿ Tân Sik-tsong phok-sū muí tsi̍t piàn lóng khiā tshut-lâi uî-hō͘ guá kóng, “Siàu-liân ê ha̍k-tsiá ing-kai ū tsū-iû huat-piáu ka-kī ê kiàn-kái.”

Tsit-tsūn tsi̍t-ē siūⁿ khí-lâi, būn-tuê sī tshut tī guá siuⁿ tsù-tiōng lí-lūn, bô khó-lū tio̍h si̍t-tsián. Princeton ê tshòng-ha̍k lí-liām sī “Learning and Piety” (Ha̍k-si̍p kap Kìng-khiân), tsiū-sī ha̍k-būn kap sìn-gióng, lí-lūn kap si̍t-tsè ê kuan-hē; giâm-keh lâi kóng, sī tio̍h nn̄g-hāng kiam-kò͘. M̄-kú, kàu hiān-tsāi iáu ū tsi̍t kuá Sìng King ha̍k-tsiá tsú-tiuⁿ kóng, Sìng King gián-kiù ê bo̍k-ti̍k sī kan-taⁿ sú-iōng “li̍k-sú phue-phuàⁿ ê hong-huat (historico-critical method)” thui-lūn bó͘ tsi̍t ê sū-kiāⁿ, bó͘ tsi̍t kù uē á-sī tsi̍t tuāⁿ uē ê li̍k-sú sìng tsiū uân-sîng i ê jīm-bū. I ê gián-kiù sī tio̍h thê-tshut Sìng King tuì guân tho̍k-tsiá ū thuân sím-mi̍h sìn-sit (what it meant), bô ing-kai thàm-thó Sìng King tuì hiān-tāi-lâng ū sím-mi̍h sìn-sit kap ì-gī (what it means), in-uī tse sī Hē-thóng Sîn-ha̍k-ka á-sī thuân-kàu-tsiá ê jīm-bū.

Guá khuàⁿ tsit khuán ê siūⁿ-huat siuⁿ kán-tan, sīm-tsí siuⁿ iù-tī; in-uī, tuì Ki-tok-tô͘ lâi kóng, Sìng King sī Siōng-tè ê uē, sī Ki-tok-tô͘ ê sìn-gióng kap hîng-uî ê tsún-tsîn. In-uī án-ni, lán mā tioh kuan-sim tho̍k-tsiá ê liáu-kái kap kám-siū. Guá tam-jīm Sìng King Kong-huē ê Huan-i̍k Kò͘-būn liáu-āu ū hì-ki̍k-sìng ê kái-piàn; tsit-khuán ê kái-piàn thang kóng sī tsi̍t tsióng ê “huān-tiû tsuán-î” (paradigmatic shift), tuì “ti̍k-sû ê guân tho̍k-tsiá“ tsuè tiōng-tiám (original reader specific) tsuán-î kàu “ti̍k-sû ê hiān-tāi tho̍k-tsiá” (present reader specific) tsuè tiōng-tiám. Tse mā-sī Sìng King huan-i̍k só͘ tú-tio̍h ê būn-tuê, in-uī huan-i̍k sī beh thuân-ta̍t Siōng-tè beh hō͘ lâng ê sìn-sit; nā bô ta̍t-sîng tsit ê bo̍k-ti̍k, huan-i̍k tsiū bô ì-gī. Án-ni thang kóng, paradigmatic shift mā sī tsi̍t tsióng ê huán-tōng.

Hiān-tāi Liân-ha̍p Sìng King Kong-huē tuā pō͘ hūn ê huan-i̍k lóng-sī kun-kù Dr. Eugene Nida ê “kong-lîng tuì-tíng” (functional equivalence) ê lí-lūn, bô koh-tsài sú-iōng thuân-thóng ê ti̍t-i̍k, sī tsù-tiōng ì-sù ê thuân-ta̍t, bô koh khuàⁿ jī-tuì-jī ê tuì-ìng (formal correspondence). Tsit jī tan-jī á-sī tsit ê sû, bô i tan-to̍k ê ì-sù; ì-sù sī tuì siōng-hā-bûn ê tsiân-āu kuan-hē (context) lâi kuat-tīng, bô hō͘ guân-bûn ê jī só͘ sok-pa̍k, bo̍k-ti̍k sī beh hō͘ i̍k-bûn uē-tàng koh-khah uân-tsíng, koh-khah tsū-jiân tsiong guân-bûn ê ì-sù īng ka-kī ê uē piáu-ta̍t tshut-lâi, hō͘ hiān-kim ê tho̍k-tsiá kap guân-bûn ê tho̍k-tsiá lóng tit-tio̍h siâng-khuán ê sìn-sit, mā ū siâng-khuán ê kám-siū (closest natural equivalence); tse thang kóng sī tuì ti̍k-tīng ê tho̍k-tsiá lâi huan-i̍k ê, sī í-king ta̍h-ji̍p “what it means” ê kài-hān. Tsin bîng-hián, tsit khuán ê huan-i̍k tsin tsù-tiōng tho̍k-tsiá ê liáu-kái, i̍k-bûn khah ua̍h, khah tsū-jiân; m̄-kú ū lâng khuàⁿ tsit-khuán huan-i̍k tsuè huán-tōng, īⁿ-tuan, sīm-tsí kong-khai khui sím-phuàⁿ-huē.

Án-ni khuàⁿ khí-lâi, guá ê kang-tsok tsin-tsiàⁿ kap īⁿ-tuan bô huat-tō͘ thang tshiat-tn̄g kuan-hē. Kî-si̍t, īⁿ-tuan put-kò sī khiā tī līng-guā tsi̍t pîng, tuì bô siâng-khuán ê kak-tō͘ lâi khuàⁿ tāi-tsì, lâi gián-kiù, lâi kué-seh, lâi liáu-kái Siōng-tè thong-kè Sìng King beh thuân-ta̍t hō͘ lâng ê sìn-sit. M̄-kú in-uī kak-tō͘ bô siâng, tshuan-sik tshut-lâi ê sìn-sit bô sio-siâng, kiat-lūn khó-lîng sī tāi-piáu sió-sò͘ lâng ê kuan-tiám, kap thuân-thóng ê liáu-kái iú-só͘ tsha-pia̍t, sī tsi̍t tsióng ê tshòng-sin. Só͘-í, lán uē-tàng kiat-lūn kóng, kap thuân-thóng bô sio-siâng bô-tú-tú sī pháiⁿ tāi-tsì, sī ū tshòng-kiàn; ū tshòng-kiàn tsiū ū īⁿ-tuan, ū īⁿ-tuan tsiah uē sán-sing īⁿ-siōng.

3. Guá só͘ Siū-tio̍h ê Pang-tsān
a. Uî-hām:
Guá tsiap-siū Liân-ha̍p Sìng King Kong-huē ê bo̍k-ti̍k sī beh tsuè Huan-i̍k Kò͘-būn, ti̍k-pia̍t sī beh pang-tsān guá só͘ jīm-tông ê guân-tsū-bîn ê huan-i̍k. M̄-kú, iáu-bē tsin-tsiàⁿ ū ki-huē khai-sí tsit ê jīm-bū, guá tsiū hō͘ UBS tiàu-khì tsuè Huan-i̍k Tsóng Kò͘-būn, tsú-iàu sī hîng-tsìng ê kang-tsok, hia̍p-tiau A-Thài Khu 15 ê Huan-i̍k Kò͘-būn ê kang-tsok, hū khah tuā ê tsik-jīm. Sui-jiân guá bô sî-tiāu kò͘-būn ê jīm-bū, kiat-kó mā sī tio̍h tsiong tsí-tō Tâi-uân ê guân-tsū-bîn ê kang-tsok kau hō͘ pa̍t-lâng hū-tsik, guá tsí ū tsham-ka huan-i̍k-tsiá ê gián-si̍p-huē, á-sī īng phue pang-tsān huan-i̍k-tsiá kái-kuat būn-tuê. Put-kò, guá iáu uē-kì-tit, mā hui-siông khim-gióng lán lāi-bīn kuí-nā uī guá khah ū tsiap-tshiok ê pîng-iú , ū-ê sī ko͘-kun-hùn-tò͘, kian-tshî piàⁿ kàu lō͘-bé ê ióng-sū, tshin-tshiūⁿ Amis ê Gân Bú-tik bo̍k-su, Taroko ê Tiân Sìn-tik bo̍k-su, Paiwan ê Khó͘ Siông bo̍k-su, Kheh-uē ê Phîⁿ Tik-siu bo̍k-su kap Tsan Tshiong-huat phok-sū, tíng. Tsuè tsi̍t ê Huan-i̍k ê Tsóng Kò͘-būn guá tsì-tsió ū kian-tshî muí tsi̍t ê guân-tsū-bîn ê huan-i̍k lóng ū tit-tio̍h kàu-gia̍h ê ū-suàn thang tsuè huan-i̍k. Tsit hāng, guá tsuè-ū-kàu.

b. Siōng Buē-tàng Buē Kì-tit ê Sū-kiāⁿ:
Tī 1980 nî tāi, tsi̍t kuá tshut-pán-siā khai-sí tshut-pán “Gián-tho̍k Pún Sìng King” (Study Bibles). Liân-ha̍p Sìng King Kong-huē mā kám-kak ū su-iàu tshut-pán tsit khuán ê Sìng King, put-kò m̄-tsai beh tsáiⁿ-iūⁿ khai-sí; in-uī UBS thuân-thóng ê tsìng-tshik sī só͘-ū ê Sìng King buē-īng-tit ū tsù-kha á-sī kué-seh (“no note or comment”), kiaⁿ-liáu tī kàu-huē tiong ín-khí bô pit-iàu ê hun-tsing. Guá tsiū hó-táⁿ tsio saⁿ uī pîng-iú Tân Lâm-tsiu, N̂g Pik-hô, kap Tīⁿ Gióng-un saⁿ uī phok-sū kap guá tso͘-sîng sió-tso͘ (í-guā Ia̍p Iok-hān, Tiuⁿ Tik-lîn, Tông Tshun-huat phok-sū, í-ki̍p Tiuⁿ Bîng-iū kap Niû Tiông-kong bo̍k-su mā bat tsham-ú thó-lūn.) Sió-tso͘ kuat-tīng sing īng Hiān-tāi Tiong-bûn ê “Lō͘-Ka Hok-im” tsuè tshì-iōng-pún, īng “Hō͘ Pian-iân-jîn ê Hok-im” tsuè tsheh-miâ, tho̍k-tsiá bo̍k-phiau tīng ko-tiong thîng-tō͘, lia̍t-tshut tsi̍t kuá guân-tsik kap hong-huat liáu-āu tsiū tio̍k-tshiú siá kó. Kó-kiāⁿ king-kè thó-lūn koh siu-kái liáu-āu ū tshiáⁿ kuí-nā-ê ha̍k-sing lâi tshì tha̍k. Kiat-kó, guán huat-hiān ha̍k-sing tha̍k sī bô būn-tuê, tsóng-sī lia̍h buē-tio̍h tsú-tuê. Sió-tso͘ tsiū suî sî kuat-tīng tîng siá, muí tuāⁿ ê khai-sí lóng ke tsi̍t kù “tsú-tuê thê-sī (thematic highlighting)”, thang kik-khí tho̍k-tsiá khai-sí mn̄g sìn-sit tuì in hiān-tsāi ū sím-mi̍h ì-gī ê būn-tuê.

Guán tàu-tīn tsuè tsit-ê project, hō͘ guá tit-tio̍h siōng tuā ê siu-sîng, ha̍k-si̍p tio̍h guá tī tha̍k-tsheh ê sî bô o̍h-tio̍h ê tsi̍t-bīn, tsiū-sī Princeton só͘ kóng ê “piety” tsit-bīn.

Guá ū tsiong tsit piàn ê king-giām siá-tsuè lūn-bûn. Guá sing kài-siāu guân-tsik kap hong-huat, suà lo̍h-khì tâm-lūn tsáiⁿ-iūⁿ sú-iōng Gadamer ê tshuan-sik lí-lūn (the fusion of the two horisons) tsuè ki-tshó͘, tsuè-āu tsiong kiat-kó siông-sè pò-kò. Tsit phiⁿ lūn-bûn guá tī 1984 nî jua̍h-thiⁿ, tī muí saⁿ nî tsiah ū tsi̍t-piàn, muí-piàn ū tsi̍t ge̍h-ji̍t kú, uī-tio̍h tsuân sè-kài ê Huan-i̍k Kò͘-būn ê gián-thó-huē sî huat-piáu. Hit tsūn sī UBS siōng-sīng ê sî, tsuân sè-kài lóng-tsóng ū tshit-tsa̍p ê tsham-ka; ta̍k-ê-lâng lóng tio̍h tha̍k tsi̍t phiⁿ lūn-bûn. Gián-thó-huē beh suah ê nn̄g ji̍t tsîng ū tsuè tsi̍t ê bîn-ì tiâu-tsa, só͘ mn̄g ê būn-tuê tsin lóng-thóng: “Tsit piàn ê gián-thó-huē sím-mi̍h siōng hó?” Tuā pō͘-hūn ê lâng kóng “tsia̍h kap tuà tsin hó;” ū-ê kóng “huē-gī ê só͘-tsāi tsin hong-piān;” mā ū-ê kóng “weikend ê lú-iû an-pâi liáu tsin lí-sióng;” tsí ū tshit ê lâng kóng-khí lūn-bûn ê tāi-tsì, tshit ê lóng kóng “I-Jin Loh’s paper is the best.” Āu-lâi UBS ê Tsip-hîng Uí-uân-huē ū huat-piáu tsi̍t tiuⁿ position paper, kî-tiong lán só͘ thê-tshut ê kuan-tiám tuā pō͘-hūn ū siū tshái-iōng. Guán tī Tâi-uân só͘ tsuè ê tuì sè-kài ū kòng-hiàn, ū ín-khí kiōng-bîng!

c. Siōng Buē Buē Kì-tit ê Lâng
Tshuà Jîn-lí phok-sū kap guá tī kang-tsok siōng siōng bi̍t-tshiat. I bat tsuè-kè Tâi-uân Sìng-King Kong-huē ê Tsóng Kàn-sū, A-thài-khu ê Tsip-hîng Uí-uân-huē ê Tsú-si̍k, kap Tsóng Kàn-sū. Tī I tsāi-jīm ê tiong-kan, i ū tsi-tshî guá uân-sîng tsi̍t-kuá Sìng King Kong-huē it-puaⁿ buē tsuè ê hāng-bo̍k, tshin-tshiūⁿ Sin-iok Hi-Hàn Sû-tián ( Ia̍p Iok-hān kap Tiuⁿ Tik-hiong phok-sū ū tsham-ú), Sìng King Kán-bîng Sû-tián (Ko Kim-tiân kap Tīⁿ Gióng-un phok-sū ū tsham-ú), Sin-iok Sìng King Pīng-Pâi Pán, Khue-puān Tsīng-su, Jit-tho̍k Sìng King (tse sī uī-tio̍h ta̍k-ji̍t siōng-pan ê bô-îng-lâng tsún-pī ê; muí-ji̍t ū tsi̍t sió-tuāⁿ Sìng King, kán-tan ê kué-seh, ū su-khó ê būn-tuê, kap té-té ê kî-tó),tíng. Huan-i̍k TCV (Todays Tsinese Version) sî, tī huán-tuì siaⁿ tiong, i mā kiông-li̍k tsi-tshî kap thui-kóng, Tuì tsuè sû-tián tsiah-ê hāng-bo̍k, guán ū ha̍k-si̍p tio̍h tsit-luī ê tsheh sī buē-tàng īng huan-i̍k ê hong-huat, sī tio̍h tsi̍t-jī tsi̍t-jī kò-pia̍t thó-lūn ê..

- TCV ê Sin-iok iû Khó͘ Bo̍k-sè kàu-siū huan-i̍k, huan Kū-iok ê sî ū Tsiu Liân-huâ, Ông Sîng-tsiong nn̄g-uī phok-sū kap Tsiau Bîng lú-sū ka-ji̍p. Tsit ê i̍k-pún hui-siông tiōng-iàu, sī thâu tsi̍t pún iû Huâ-jîn só͘ huan-i̍k ê, bûn-pit tsin tsū-jiân, piáu-ta̍t tshing-tshó, tsin hó liáu-kái, só͘-í hiān-tsāi iáu teh huan-i̍k e Hiān-tāi Tâi-gú I̍k-pún i-ki̍p kî-tha guân-tsū-bîn huan-i̍k á-sī siu-i̍k ê nâ-pún. Guá tuì tsit ê huan-i̍k o̍h-tio̍h huan-i̍k tsiá su-iàu khiam-pi, ha̍p-tsok, pau-iông, buē kian-tshî ka-kī ê ì-kiàn ê tsing-sîn, in-uī Huâ-gú ūn-iōng ê khong-kan tsin khuah, huan-i̍k khah ū ì-kiàn.

Līng-guā tsi̍t hāng tāi-tsì guá buē īng-tit buē kì-tit. Guá khì Princeton tha̍k B.D. ê sî (1960), Tsiu Liân-huâ phok-sū í-king tī hia teh tsuè gián-kiù ha̍k-tsiá. I í-king sī tsi̍t-uī bîng-jîn, m̄-kú tsin iú-siān; i to-tsâi-to-gē, tsóng-sī m̄ bat hián-iāu ka-kī ê ha̍k-būn. I tuì hit tsūn khí, guá só͘ hū-tsik tsin tsuē Tiong-bûn ê huan-i̍k hāng-bo̍k, I muí tsi̍t hāng lóng ū gī-bū tsham-ka. I sī tshiok-tsìn hô-bo̍k ê tsing-sîn jîn-bu̍t.

Hiān-tāi Tâi-gú I̍k-pún sī hian-tsāi iáu teh tsuè ê huan-i̍k. Tse sī thâu tsi̍t-piàn Sìng King Kong-huē kap Tiúⁿ-ló-huē ha̍p-tsok ê huan-i̍k. Tsit ê huan-i̍k tsin ti̍k-pia̍t, uē-īng-tit kóng sī “tō tsiâⁿ jio̍k-thé” ê huan-i̍k, tha̍k khí-lâi, uē thiaⁿ-tio̍h Siōng-tè tsin tsiàⁿ tsiâⁿ-tsuè Tâi-uân-lâng, īng sûn-tshuì ê Tâi-uân-uē teh tuì lán kóng-uē, lóng bô guā-kok-khiuⁿ. Guá tuì muí tsi̍t uī huan-i̍k sió-tso͘ ê lâng ha̍k-si̍p-tio̍h tsin tsuē.

Guá siōng ài, mā siōng kiaⁿ Ong Siu-kiong bo̍k-su kóng, “Tse m̄-sī Tâi-uân-uē”, á-sī “Tâi-uân-uē m̄-sī án-ni kóng”: siōng ài, in-uī tio̍h siu-kái, siu-kái-liáu ê ì-sù it-tīng uē khah tsìng-khak; siōng kiaⁿ, in-uī tio̍h koh liáu sî-kan thó-lūn. Iûⁿ Khé-siū īⁿ-tiúⁿ ti̍k-pia̍t kuan-sim ài pó-tshî guân-bûn só͘ īng ê ì-siōng (image) kap àm-jū (metaphor), in-uī án-ni i̍k-bûn tsiah uē ua̍h koh suí, khah ū-la̍t, mā khah hó kì. Tiuⁿ Tsong-liông bo̍k-su sī tsin ū tsâi-lîng ê tsú-si̍k, tha̍k tsin tsuē tsheh, sī tsi̍t pún ua̍h ê pik-kho-tsuân-su. Gô͘ Bîng-hiông bo̍k-su siōng gâu píng kok-tsióng pán-pún tsuè tsham-khó; mā tuì hiān-tsāi ê siàu-liân lâng teh īng ê Tâi-uân-uē ū pá-ak, in-uī tsit piàn ê huan-i̍k tsin ǹg-bāng hui Ki-tok-tô͘ mā tha̍k-ū. Tiuⁿ Kong-îng bo̍k-su ti̍k-pia̍t tsù-ì Lô-má-jī tsù-im ê tsìng-khak; Gân Sìn-sing bo̍k-su tuì si kap kó͘-ji ê siá-huat tsin ū pá-ak; Sih Pik-tsàn bo̍k-su ti̍k-pia̍t tsù-ì tī káng-tâi tíng ê suan-tho̍k; Khng Tsìn-sūn bo̍k-su tuì guân-bûn ū tsin hó ê liáu-kái; Niû Tiông-kong bo̍k-su tuì tiān-náu ê ūn-iōng kap huan-i̍k ê it-tì-sìng, tíng ê būn-tuê lóng ū ti̍k-pia̍t ê tsù-ì. Tsuè -kūn tsiah tsham-ka ê Tân Lâm-tsiu phok-sū tuì huan-i̍k mā ū ti̍k-sû ê kòng-hiàn. I ū-sî tāi-lí tsú-si̍k khui-huē tsin kó-tuàn, in-uī i kap guá ha̍p-tsok ê sî-kan khah tn̂g,ū kiàn-li̍p tsin hó ê rapport, i só͘ beh mn̄g ê būn-tuê kap guá siūⁿ ê būn-tuê siông-siông sī siâng-khuán, guá nā bô mn̄g, i lóng uē mn̄g. Koh tsi̍t hāng hó ê tāi-tsì, tsiū-sī tsí ū i sī thâu tsi̍t-tāi ê Ki-tok-tô͘, só͘-í put-tsí liáu-kái hui Ki-tok-tô͘ ê iōng-sû. Lán iā í-king ū tsi̍t-uī uē-hiáu īng tiān-náu lâi tshù-lí kó-kiāⁿ ê Niû Tiông-kong bo̍k-su. Tsuè-āu, lán mā í-king ū tsi̍t-uī pí guá khah ū lîng-li̍k ê Kū-iok tsuan-ka, mā uē-hiáu tiān-náu pâi-pán ê Niû Bāng-huī phok-sū tsuè lán ê Huan-i̍k Kò͘-būn thang hû-khí lóng-tsóng ê tsik-jīm. Siong-sìn tsit ê tsin-tsiàⁿ īng lán ê pē-bú-uē ê Sìng King koh bô-kú tsiū uē tshut-hiān.

It-sing tuì guá ū siōng-tuā ê íng-hióng kap pang-tsān ê tsiū-sī kap guá saⁿ-kap tsuè Gián-tho̍k-Pún ê “Lâm-tsiu. Pik-hô, Gióng-un” tsit saⁿ ê “tâng-phuāⁿ. Guán lóng-sī īng in ê hioh-khùn ji̍t, ji̍t-mî phah-piàⁿ tsuè-kang. Guán tuì bô bong-khí, thó-lūn kap piān-lūn, siu-kái koh siu-kái, siá kàu buán-ì uî-tsí. Guán ti̍k-pia̍t ū tiōng-sī ti̍k-sû ê tho̍k-tsiá (audience specific), ti̍k-sû ê khuân-kíng (context specific), ti̍k-sû ê sìn-sit (message specific), tíng ê būn-tuê. Kap in tàu-tīn ha̍k-si̍p hō͘ guá thé-giām-tio̍h Sîn-ha̍k, á-sī Sìng King ê tshuan-sik, m̄-sī sûn lí-lūn, mā-sī gē-su̍t, tio̍h khò thuàn-liān koh thuàn-liān tsiah uē láu-liān, tsiah tsuè uē tshut-lâi; m̄-sī thiu-siōng ê, sī uē-tàng si̍t-hîng ê; m̄-sī kò-jîn tsuè ê, sī kûn-thé kiōng-tsō ê; m̄-sī lóng tsìng-thóng ê, siông-siông sī huán-tōng ê, sī īⁿ-tuan ê. Tse lóng-sī guá kap in tsuè-kang ê sî só͘ o̍h-tio̍h ê. Kap tsit-tīn pîng-iú tsuè-tīn kau-tâm, thó-lūn kap piān-lūn hui-siông tsing-tshái, bô tsi̍t tiûⁿ líng-tiûⁿ, lóng ū tshòng-kiàn, hō͘ guá tuì ta̍k piàn ê khui-huē kám-kak ū kî-thāi koh hing-hùn, thé-giām tio̍h tsoh Sîn-ha̍k ê huaⁿ-hí kap khuài-lo̍k. .

Guá mā tuì guá tsí-tō in siá phok-sū lūn-bûn ê saⁿ-uī lāu-su ha̍k-si̍p tio̍h tsin tsuē. Tse tuì in ê lūn-bûn khuàⁿ uē-tshut. Note:Please use the language eats use Tsan and Tsiu in Tsinese, and Tsing in Inglish
Tsan Tshiong-huat: The Study of Jesus in Luke from Asian Perspective
Kapi Tsing： An Attempt at Reading the Story Martha and Mary with Juxtapositional Narrative Appruats
Tsiu Shupin： Reading Mission in the Gospel of Mathew from Identity of ``the little ones` ? A Narrative Critical Perspective
Tuì lūn-bûn ê tuê-ba̍k lán uē-tàng khuàⁿ-tshut tsiah-ê lóng sī ǹg līng-guā tsi̍t pîng teh kiâⁿ, tsin iu-siù ê lūn-bûn, kiat-lūn lóng sī huán thuân-thóng ê. Put-kò lán m̄-bián kiaⁿ, in-uī lán siong-sìn, ū īⁿ-tuan tsiah ū tsiong-lâi, tsiah ū īⁿ-siōng . Lán.tio̍h kè-sio̍k ǹg tsit ê hong-hiòng kiâⁿ tsiah ū pān-huat thang tsuè tshòng-sin ê Sîn-ha̍k lâi biān-tuì tsiong-lâi ê thiau-tsiàn.

4. Tsuè-āu ê Kám-siā
Tsuè-āu, guá beh koh tsi̍t piàn hiòng Gio̍k-Sîn ê táng-sū-tiúⁿ, tsu-uī táng-sū, īⁿ-tiúⁿ Pusin kap kok-uī kàu-siū piáu-ta̍t guá siōng tshim ê kám-siā, in-uī lín kin-á-ji̍t pan-siū tsit ê ki̍k-tuā ê îng-ū hō͘ guá. Guá mā ài tuì bat kap guá tàu-tīn tsoh Sîn-ha̍k, kiâⁿ tsit tiâu khám-khia̍t ê lō͘ ê tông-tsì pîng-iú seh-siā, kap in hun-hióng tsit ê îng-ū.

Thian-hiong kap guá lóng sī to-pīⁿ ê lâng. Guá tui 1967 nî tsiū khai-sí in-uī thn̂g-jiō-pīⁿ ka-kī tsù-siā, āu-lâ khai-sí tsi̍t liân-tshuàn ê bān-sìng-pīⁿ, sim-tsōng pīⁿ, ko hiat-ap, koh lâi ū Parkinsons, kin-nî tsho͘ koh ū tsuè liap-hō͘-suàⁿ ê tshiú-su̍t, iā huān-tio̍h kip-sìng khì-tshuán-pīⁿ. Thian-hiong sī tuì i thuè-hiu ê tsîng nn̄g nî tsiū khai-sí ū būn-tuê, tuì 2,000 nî khí uân-tsuân ji̍p-khì i ko͘-to̍k ê sè-kài, sit-khì i só͘-ū ê kì-ik-li̍k, piáu-ta̍t-li̍k, āu-lâi mā huān-tio̍h thn̂g-jiō pīⁿ; tsuè-kūn koh in-uī jiō-tō huat-iām kap tsi̍t kuá pīng-huat-tsìng ji̍p-īⁿ sì lé-pài kú.

Tī tsit tiong-kan ū tit-tio̍h Sam-kiap Kàu-huē Lí Tsuân-gē bo̍k-su ti̍k-pia̍t ê tsiàu-kò͘ kap kuan-huâi-sió-tso͘ ê pang-tsān, guán tio̍h tshim-tshim kā in seh-siā .

Mā ū tsin tsuē hái-lāi-guā ê pîng-iú kò-pia̍t teh thuè guán kî-tó, á-sī lâi thàm guán; koh ū Tâi-gú Huan-i̍k Sió-tso͘ ê tâng-kang ta̍k lé-pài lâi thàm guán, thuè guán kî-tó, guá mā beh kā in kóng “to-siā”.

Guán mā ti̍k-pia̍t beh tuì guán tsì-tshin ê hiaⁿ-tī-tsí-bē piáu-sī siōng tshim ê kám-siā. Guá huān-tioh tsiah-ni̍h tsuē koh giâm-tiōng ê pīⁿ í-king tshiau-kè 50 nî-à, nā m̄-sī ū tuā-tsí ê tsiàu-kò͘ kap hia̍p-tiau hiaⁿ-tī tsí-bē ê pang-bâng, guá tsá tsiū bô tī tsia a. Guá tī nî-tsho͘ tshiú-su̍t ê sî, tuā-tsí mā tshin-sin lâu tī pīⁿ-īⁿ tsiàu-kò͘ guá kuí-nā-ji̍t. Guá hiān-tsāi in-uī Parkinsons hîng-tōng lóng bô hong-piān, i tsuè-thâu hia̍p-tiau tsuân-ke lâi pang-tsān guá: jī-tsí siông-siông kià lâng the̍h îng-ióng-phín hō͘ guá; sió-tī Î-tō sīm-tsí thuè guá tshut-kok pān tāi-tsì; sió-bē Sumih ka-kī tiōng-hu teh phuà-pīⁿ mā lâi pang-tsān guá kuí-nā-ge̍h-ji̍t kú; sun-á puè ū Îng-iāu i-su tsuan-bûn teh sàng guán khì kip-tsín, Siông-uán bo̍k-su put-sî to teh an-pâi guán khuàⁿ i-sing kap ji̍p-īⁿ ê sū, tíng. Beh tshē tio̍h tsiah-ni̍h hô-hó ha̍p-tsok ê ka-tîng si̍t-tsāi bô kán-tan. Tse lóng sī tuā-tsí ê kong-lô. Guán kám-siā Siōng-tè hō͘ guán ū tsiah-ni̍h gâu líng-tō kap tsiàu-kò͘ ka-tîng ê tuā-tsí, mā ài kám-siā Siōng-tè hō͘ i ū hó ê tiōng-hu kap uân-buán ê ka-tîng thang kā i hia̍p-tsō͘.

Tsuè-āu, tsóng-sī siōng tiōng-iàu ê, guá beh tuì guá “khah-hó-ê-tsi̍t-puàⁿ (my better-half) kóng, “Nino, tsin to-siā!” Tsit kù uē tsí-ū i thiaⁿ-ū. I mā-sī guá tsoh Sîn-ha̍k ê “tâng-phuāⁿ”. Guán nn̄g ê lóng í-king 77 hè à, saⁿ ge̍h-ji̍t tsîng mā tú-á khìng-tsiok guán kiat-hun muá 50 tsiu-nî. I it-sing lóng īng guá kap ka-tîng tsuè tiong-sim. Guá in-uī ū i tsiah ū khuì-la̍t tsuè guá só͘ tsuè ê it-tshè. Guán beh sàng hō͘ Gio̍k-Sîn ê tsheh tsin tsuē sī i só͘ tin-tsông ê. I ing-kai tio̍h hun-hióng tsi̍t-puàⁿ-khah-ke ê îng-ū!

Guān it-tshè ê îng-iāu lóng kui hō͘ Siōng-tè!