《生活e5台語，台語e5生活》

 | | | 轉寄

《歷史上ê主耶穌》推薦序

作者 Raphael Gamzoo /甘若飛台表 2019.11.24

真榮幸，本人ta̍k年tùi台北受邀請落南去到台南參加基督教會舉辦ê Poâⁿ過節暗頓禮拜á是到台南神學院舉辦以色列音樂家音樂會ê時，有機會認bat一位熱愛以色列ê杜英助牧師，而且tiāⁿ-tiāⁿ tùi伊聽tio̍h伊親自去以色列考察、研究聖經史地現場ê見識、經驗kah心得。同時分享伊ê巨著《聖地寶蹟精覽》圖書ê見證kah解說，非常欣慰。

事後，杜英助牧師koh kā伊多年來tiāⁿ-tiāⁿ去以色列實地hip ê真tsē彩色相片帶來台北我ê辦公室，歡喜開講伊旅遊以色列ê趣聞kah感想。本人tī觀賞杜英助牧師親手所hip ê以色列ê歷史圖片了後，大大tio̍h驚hiah-ê圖片是我看過ê圖片中siōng有專業攝影水準ê作品，非常值得推薦hō͘ ta̍k位一向關心熱愛以色列ê朋友，尤其是tī iáu未前往聖地參觀旅行ê基督徒，當做tī出發前應該事先瀏覽kah研究ê珍貴資料。Ǹg望杜英助牧師最近幾年來所編著ê《歷史上ê主耶穌》新冊，ē-tàng順利出版，提供hō͘ 大家參考kah分享。

本人確信：以色列國ê土地是耶和華上帝賜hō͘ 阮偤太人ê列祖亞伯拉罕、以撒kah雅各，以及伊ê kiáⁿ孫tī世上定居ê一塊「應允之美地」（申命記6：23），tú親像摩西所講：「Hit-ê súi ê地，hit-ê地有溪，有水泉，有深淵，tùi山谷kah山頂流出來。是出小麥、大麥、葡萄樹、無花果樹kah石榴樹ê地，mā是出橄欖樹kah蜜ê地。」（申命記8：7、8），直到tsit-má，以色列肥koh súi ê土地iáu是仝款盛產五穀、菜蔬、果籽、蜂蜜kah牛奶等等，充分證實上帝應允之地「he是流奶kah蜜之地」（申命記11：9），是偤太人有權利tòa ê樂土，mā是全世界基督徒心內ê信仰kah屬靈ê家鄉。

旅居國外ê偤太人siōng大ê心願，to̍h是ta̍k年lóng有一pái機會koh再tńg去到耶路撒冷，kah鄉親喜相逢。我衷心ǹg望台灣ê基督徒朋友，一生中間至少mā有一pái機會來到以色列，跟tòe主耶穌ê傳道行踪，行遍聖地，分享上帝ê賜福。耶路撒冷聖城，顧名思義to̍h是上帝賜「平安ê城」，凡來到耶路撒冷朝聖ê人，一定會體驗tio̍h「以色列ê上帝kā氣力kah權能賞賜hō͘祂ê子民。」（詩篇68：35）

人類信仰史蹟ê現場真相，「用耳聽講」不如「眼見為憑」重要，本人謹代表以色列國家誠心歡迎凡若心中想beh認bat「歷史上ê主耶穌」，而且渴慕來耶路撒冷「朝見上帝」ê所有台灣國內外ê朋友，美夢成真！願上帝tī基督裡tùi錫安賜福hō͘ 你健康、喜樂和平安！

ISEO駐台灣以色列經濟文化辦事處
甘若飛代表
Raphael Gamzoo
Representative