《生活e5台語，台語e5生活》

 | | | 轉寄

台語文ê喜kap憂

作者 Tsuniok 2006.01.15

Tsit-tsuā tńg來台灣pue̍h墓，照常phah拚走tsông台語文運動。透過「紅皮聖經」ê上網，我開始認識信望愛網站(www.fhl.net)，弘堯兄kā我講是教會公報社內面ê陳小姐kā「紅皮聖經」做連結。我趁(thàn)三月16日khì拜訪教會公報社ê時，來kap hit位陳小姐見面。我問伊看ē-tàng安排hō͘我認識信望愛網站ê負責人。伊講負責人就是in ang--蔡先生。結果馬上安排hit暗in兩ang-á-bó͘來我tuà ê哥爸妻夫客棧。

我kā我電腦內所有ê台語文資料紹介hō͘ in知，Koh請教信望愛是m̄是ē-tàng增加台語部。哲民兄講in真ài有台語部但一直無人thang支援資訊。Tsiông án-ne阮「一拍即合」，伊將我ê外接硬碟帶tńg去研究。

蔡先生是電腦博士，現此時tī大學做教授。伊了解我ê漢羅翻寫作業程序，就講beh替我設計自動翻寫ê軟體。感謝主！這ē-tàng增加我ê翻寫速度，mā ē-tàng hō͘ khah ts ē 人來參與tsit-ê工作。因為教會公報社ài我拚速度來提供漢羅出版品。伊koh答應tńg去馬上寫程式。若順利完成beh khà電話kā我講。第二工早起，伊khà電話來講伊tńg去高雄探訪父母了後，暗時ē-tàng來kā我裝軟體。我歡喜kah馬上去辦旅館續tuà一暝ê手續。

Hit-ê軟體裝入去我ê電腦，原來我每工做夢所求ê就是這lah！我beh好好kā伊建立詞庫了後，tī信望愛網站公怖hō͘大家來使用，hō͘台語文運動進步koh-khah緊。感謝主...

我一直掛慮台日大辭典ê排序問題(EXCEL限制65,536列), 趁機會請蔡先生幫忙解決。伊答應beh寫程式透過信望愛網站來進行修改，隔工我到竹山向布袋戲劉進春大師學藝ê時，到旅館一上網就收tio̍h蔡先生hō͘我講「寫好lah」ê e-mail。我歡喜kah馬上kā看一遍，隨時kā測試結果報告蔡先生。伊馬上修改koh送e-mail hō͘我ê時講，我hiah緊腳手。我回e-mail講是我跟tuè伊ê緊腳手，tsit點阮兩人仝個性。

我33年前tī台中忠孝路教會舉行結婚典禮。透過陳浩德牧師ê安排，我去kap青少年及大專團契分享「台語文ê suí kap布袋戲宣教」。我上台講無兩句就tuì in ê 面容看出in對家己母語ê生疏kap冷淡。我緊換放阮蕃薯園布袋戲團tī 2004年美東夏令會演出ê「馬偕過台灣」布袋戲。放影完，電火phah開一看，tshun一半人。講是in台語聽無，溜suan去lah。我有分台語基本發音ê單張hō͘ in，請in tńg去kap in父母tàu-tīn學台語。一位少年應講：「無可能pah！」實在令人耽憂咱ê母語受華語迫害，淪陷kah hiah-nih嚴重！