《生活e5台語，台語e5生活》

 | | | 轉寄

台灣各族語言ê共同危機：死！

作者 李南衡 2006.05.14

頂禮拜，「自由時報」真用心，連續三工刊登「客語教學危機及展望」系列文章，講國民學校客語班級大減，客語淪作新弱勢語言，客語ê人口每年流失5%，調查全台灣各縣市客語班級及客家人口ê比率做表分析，ē-tàng看出，國校客語班級無夠，像南投縣客家人口是17.6%，客語班級無夠1%。記者kā tsit-ê現象講做是：閩南語偏大，西瓜uá大旁，致使國校ê客語班不但無進，顚倒退步。記者除了提出師資無夠、學校無心、學生學習ê意願低、家長想講學英語khah贏過學客語等等以外，記者提出一點講：鄉土教學，tio̍h避免強ê愈強、弱ê愈弱。看起來，ná像真有心，其實是方向完全錯誤！

葉菊蘭女士擔任客家委員會主委ê時bat講：台灣原住民各族ê語言已經送入去加護病房，客語已經tī急診，Holo語mā已經teh掛號ah!意思真明，就是講台灣各族母語lóng已經tú-tio̍h「死亡」ê危機，分早死慢死而已，無toh一種母語是khah強抑是khah弱ê。Ná會變到án-ne?

戰後國民黨政府來霸佔台灣，一來就是beh建設國語社會，除了普及所謂ê「國語」以外，頭起先禁止日文日語ê冊、報紙、雜誌kap電影，續落去全面壓制台灣各族語言，除了學生tī學校講母語tio̍h受罰以外，1975年規定三台電視台ê節目，一工干單ē-sái播出一點鐘ê Hō-ló語（客語kap各族原住民語lóng總無）。立法委員穆超講：「方言，伊會自然消滅，m̄免煩惱，也m̄免可惜，方言是落後ê語言，用國語寫真好ê文字，是做一個中國人ê基本條件。」1985年beh制訂「語文法」，規定會議、公務、公開演講、公共場所、各級學校實施教育、大眾傳播等，lóng一定愛講「標準國語」，若無tio̍h受罰。佳哉hit陣ê民意大大反對，tsiah suah去！

今á日tī國民學校實施ê「母語教育」，一禮拜教四十分鐘，算做啥貸？Hit當時國民黨政府是用「重藥」硬beh kā台灣各族母語thāu hō͘死！今á日，民進黨政府若是有心，mā一定著用「重藥」台灣各族語言tsiah救會活。

今á日tī台灣，特別是tī大都市，無管你tī餐廳，公共汽車、捷運頂頭，你kā聽看bāi,學生、一般食頭路人，到「社會精英」，in講啥物話？甚至連七八十歲ê阿公阿媽kap in孫á mā講hit號足無標準ê「中國ê普通話」，咱講號做「國語」。可見，台灣tsit-tsūn ê強勢語言，只有「中國ê普通話」咱講ê「國語」一種niā-niā,台灣各族語言lóng mā是弱勢語言。若是無認清tsit點，猶tī各弱勢語中間計較toh一種語khah強khah弱，台灣各族語言一定會tú-tio̍h共同ê危機：死！