《生活e5台語，台語e5生活》

 | | | 轉寄

信心ē-tàng得救

作者 原文英語：Shirley Lîm, 翻譯：林宗良 2007.01.07

我想除夕是一個hō͘人歡喜koh hō͘人難過ê一工，咱用tsit-ê時間thang回頭看咱過去tsit一年辛苦ê成果，也thang向前展望咱未來新ê一年ê計劃。

新年是一個新ê開始，tsit-ê新ê開始hō͘咱真tsē新機會。頂禮拜咱tú過完了聖誕節，慶祝耶穌ê生日，mā koh一pái提醒咱耶穌ê來臨，改變了咱ê世界，像新年仝款hō͘咱新ê希望。

今á日ê福音是有關一個破病了十二年ê女子，當咱讀tio̍h tsit-ê女子所受ê痛苦，咱聯想tio̍h真tsē kap伊類似ê所在。當然，今á日咱無可能致tio̍h血漏病十二年lóng無醫治好，咱m̄免擔心社會因為咱破病而趕咱出去， 咱mā bē-sái去摸耶穌ê衫褲。但是，tī真tsē方面，咱真正ē-tàng了解tsit-ê女子ê痛苦。

第一，咱lóng有破病ê經驗，mā有看過別人破病，甚至有kuá人有經歷過慢性病ê pháiⁿ處理，所以咱知影破病ê痛苦，mā知影愛趕緊好ê祈求。

今á日如果咱破病，咱會去病院看醫生，無親像tsit-ê血漏病ê女人，不只所有ê物件lóng hō͘假醫生騙去，伊ê病koh-khah嚴重。但是，咱mā知影去病院mā是一個極bái ê經驗，tī病院咱常常無病看tio̍h有病。咱有juā-tsē-pái tú-tio̍h醫生到病房看咱，kap咱講話。但是m̄是真正teh kap咱講話neh? 有時tsūn咱真正會懷疑醫生知影咱ê名字mah? 知影咱是誰mah?

當然teh看電視裡面，所有ê醫生lóng會圍tī病人邊a，關心病人，但是，這kám是真實ê情形mah? Tī真實ê情況，醫生一般就kan-ta會問病人一kuá問題。看看病人ê情況， 醫生bē管到其他ê問題，當然唯一ê例外，就是醫生會問病人ê保險資料。一個tuà tī病院ê問題，就是咱會感覺咱kap以前無仝款，咱身上有病。

當我tī作一個tuà院牧師ê時，我常常聽tio̍h護士bueh指示病人ê時， 是用房間號碼(ná親像是1,2,3 ê病人) ，或是用病況(ná親像是心臟病ê病人) 。所以咱tī入病院了後，就無去姓名kap家己，完全hō͘人以咱ê病情來稱呼。Tī馬可福音ê tsit-ê女人mā只被叫作一個血漏病ê女人，伊無名字，只有病名。

咱想像醫生圍tī tsit-ê血漏病ê女人：中年年紀、低血壓、心跳緊、缺血kap缺鐵ê症狀，血漏病已經十幾年ā。當然，如果你破過病，你一定thang聯想tio̍h tsit-ê女人ê情形，但是，如果有人真好字運，從來m̄-bat破過病neh?

真tsē人相信tsit-ê女人ê病犯了tī利未記中ê法律，這mā hō͘真tsē人認為tsit-ê女子不只是破病，無清氣，而且伊一直不斷ê血漏病會感染伊tú-tio̍h ê任何物件kap人，mā因為伊hit時ê tsiah-ê社會風俗，伊就變成一個被社會驅逐ê人。

咱thang了解伊ê寂寞kap隔離，不只是hit種看bē-tio̍h ê感覺。我相信咱真tsē人mā有被排除在外ê感覺。可能是因為咱無法度融入一kuá地方， mā有可能咱無想bueh做別人teh做ê事。

當tsit位血漏病ê女人有錢tshuē醫生ê時tsūn，可能有人會照顧tsit-ê女人ê健康。但是現在伊已經一無所有à，連醫生mā無bueh管伊lah。伊是iáu活teh，但是伊已經無koh是tsit-ê社會或是tsit-ê世界ê一部分lah。　

咱tī教會中，非常了解tsit種感覺。咱mā感受tio̍h咱kap現代社會間ê無仝，tsit幾個月，咱教會中一直teh討論社會正義kap咱教會ê目標。咱教會tī tsit方面ê事工，lóng一直iáu teh摸索ê階段，因為無論咱如何做，咱總是無法度tī Framingham tsit地區拓展開來。不只是án-ne，無論咱是想beh服務無家可歸ê人或是捐贈食品，咱想beh為tsit地區ê服務kah-ná kap tsit地區ê需求有kuá格格不入，可能是因為咱ê無仝hō͘咱無法度幫助siuⁿ大。　

但是咱mā有咱ê問題，總講一句，咱教會mā有需要檢討ê，咱本身mā有咱血漏病ê傷口。但是咱有解藥，咱有耶穌，咱只要好好反省家己，咱thang醫好咱ê傷口，hō͘咱ê教會再次健康起來。

無論咱是因為什麼原因hō͘咱停止服務咱ê社區，咱應該lóng已經知影beh放棄是juā-ni̍h-á容易。咱thang真容易ê講：「Hō͘咱tiàm tī咱ê族群中pah，咱台灣人ê社會中mā有真tsē事ài作，咱beh繼續tī波士頓台灣人中服務，所以咱為什麼tio̍h幫助hiah-ê一點lóng bē感謝咱幫忙ê人neh？」

Tsit-ê無名字ê血漏病ê女人，大慨最後mā感覺無望ā，如果是咱，咱是m̄是mā會感覺無望neh？尤其是咱已經開盡咱所有ê錢tī醫生上，而且iáu是無法度治癒？koh-khah何況tsit-ê女子m̄-nā無好轉，顛倒病koh-khah嚴重neh。　

但是有一工，tsit-ê血漏病ê女子聽tio̍h一個人自稱是神ê kiáⁿ兒，伊來到tsit位女子tuà ê附近。有關tsit-ê神ê kiáⁿ兒ê tāi-tsì傳了真tsē，真tsē人稱伊是奇蹟ê人。　

Tsit-ê血漏病ê女子知影耶穌tú tú治好一個被魔鬼纏身ê人，hit時有真tsē人tī耶穌邊a，看tio̍h耶穌ê所作所為，lóng非常ê gōng-gia̍h。然後有一個地方官叫Jarius 就來求耶穌解救伊ê女兒，耶穌答應伊。然後所有ê人就跟tuè耶穌行到Jarius ê厝。

Tsit-ê血漏病ê女人當然無tsiah-ni̍h勇敢，伊m̄是當官ê，無真有錢，mā m̄是一個男人，koh-khah令伊擔心ê是驚有人注意tio̍h伊，然後kā伊指出來，或者伊無小心tú-tio̍h別人，kā人tshòng lah-sap到破病。

但是已經十二年ā，這有可能是tsit-ê血漏病ê女人beh康復ê最後希望。 絕望ê時，伊想對家己講：「如果我只摸伊ê衫褲，我就會被醫好。」所以tsit-ê血漏病ê女人就混入去人群中，tshuē-tio̍h機會，伸出手去摸耶穌ê外衫。續落來，伊感覺tio̍h有一股伊無法度解釋ê力量。另外，伊mā注意tio̍h伊ê血漏病已經停止lah，非常歡喜。伊向後退，想beh退入人群中，忽然伊聽tio̍h耶穌講話：「啥人摸tio̍h我ê衫褲?」

Tsit-ê醫好血漏病ê女人tī嚇(heⁿh)驚ê中間停落來，伊想tio̍h伊是lah-sap ê，是無純潔ê，耶穌tsit-má一定被感染loh。不管耶穌是m̄是神ê kiáⁿ兒，伊mā真有可能會tī社會hō͘人排除tī外口。 Tsit-ê醫好血漏病ê女人聽tio̍h耶穌ê學徒對耶穌講：「你看，tsiah-ni̍h-tsē人圍tī你身邊，你iáu問：啥人摸tio̍h我neh？」但是耶穌無tín動，耶穌四界看看leh，然後伊就看tsit-ê醫好血漏病ê女人，耶穌ê眼神金金金。

Tsit-ê醫好血漏病ê女人知影耶穌已經知影是啥人碰tio̍h耶穌ê衫褲。所以tsit-ê醫好血漏病ê女人就跪落來，kā耶穌講kui件tāi-tsì。雖然tsit-ê醫好血漏病ê女人真無想beh講，但是真奇怪，耶穌並無用責備ê眼神看tsit-ê醫好血漏病ê女人。耶穌ê眼神是充滿了憐憫kap關懷，耶穌有一個重要ê信息beh hō͘ tsit-ê醫好血漏病ê女人。

「女兒ah，你ê信心已經醫治好你ê病loh，tsit-má平平安安tńg去pah。 你m̄免koh再為你ê病痛苦loh。」

耶穌m̄-nā無責備tsit-ê醫好血漏病ê女人，耶穌顛倒原諒伊，並且hō͘伊脫離病ê苦惱。耶穌kā tsit-ê醫好血漏病ê女人當眾叫出來，是beh hō͘大家知影tsit-ê女人並m̄是大家認為ê hit種人。 Tsit-ê醫好血漏病ê女人是健康ê，是忠實ê，是有愛心ê，神ê kiáⁿ兒認同tsit-ê醫好血漏病ê女人，tsit-ê sàn-tshiah、無清氣、受病害ê女人是耶穌家庭中ê一員，耶穌án-ne做mā只有一個原因：因為tsit-ê醫好血漏病ê女人有信心。

Tsit-ê醫好血漏病ê女人已經m̄是一個無名字ê人，伊mā m̄是一個血漏病ê女人à。伊tsit-má是神ê女兒loh。如果咱詳細kā伊看，tsit-ê醫好血漏病ê女人是tī整部馬可福音書中，唯一被耶穌稱做女兒ê人。

耶穌m̄-nā接受了tsit-ê醫好血漏病ê女人，mā歡迎所有信耶穌ê人進入耶穌ê家庭。好消息就是耶穌mā會án-ne對咱，透過咱ê信心，咱也ē-tàng被醫好，thang m̄免受tio̍h痛苦；透過咱ê信心，咱thang加入耶穌基督ê家庭。

今á日咱教會整體，無koh再親像以前hit種內部血漏病lah，咱已經kā咱ê病穩定落來，而且咱iáu teh成長。Tī神ê祝福中，今á日咱是一個勇壯成長，崇拜神ê教會。

咱已經醫好了咱內部ê苦惱，但是咱iáu無kap外面ê人講，咱ná親像hit-ê醫好血漏病ê女人仝款，有信心來摸耶穌ê衫褲，咱相信he簡單ê摸一下，就ē-tàng醫好咱，因為咱大家無其他ê選擇，只有耶穌ē-tàng醫好咱。

今á日，咱有困難踏入咱周圍ê社會，有時想看bāi，這是thang理解ê。 有時tsūn咱ná親像是被社會驅逐出來ê人，因為咱無完全是美國人，咱習慣講咱ê語言，咱深深關心台灣ê狀況，咱並無贊同美國ê功利主義文化。

但是咱thang感受tio̍h beh服事咱周圍ê人。Tsit兩個裡想thang講是對咱教會ê挑戰，尤其是像過去án-ne，當咱有內部問題ê時，tuì tsit禮拜ê福音，因為咱ê信心，咱tio̍h相信耶穌有醫治咱ê能力。 咱ē-tàng非常容易講咱tio̍h服事咱ê社會，但是beh kā達成社會正義當做一種生活習慣無容易，但是因為咱強大ê信心，咱有非常好ê鼓勵。實際上， 咱已經開始teh做真tsē事，但是，咱一定tio̍h繼續反省，並且繼續實踐咱ê責任。大家互相鼓勵，踏入咱周圍ê社會，tshuē出咱ê角色。

頂禮拜日，去唱聖誕節詩歌ê時，養老院非常歡迎咱。咱只需要用幾小時ê時間，就ē-tàng帶hō͘咱周圍ê人真tsē歡樂，這是真正ê佳節祝福。

Koh再十幾點鐘，咱又ài進入新ê一年loh，咱koh有一個新ê開始ê機會。當耶穌hō͘ hit-ê血漏病ê女人摸伊ê時，耶穌也tio̍h求hit-ê血漏病ê女人宣佈伊ê信心，然後耶穌醫好hit-ê血漏病ê女人，hō͘伊ē-tàng重新tńg去社會，並且進入耶穌ê家庭，我認為這是一個koh-khah好ê地位。

現在hit-ê血漏病ê女人已經被醫好lah，伊有機會koh再kap hiah-ê人，厝裡ê人作伙，伊thang koh再hō͘人愛，thang結婚，thang有家己ê家庭，thangkoh再為社會服務。

咱也thang tī新年有一個新ê開始，咱thang開始一個新生活。 kā大家講咱是耶穌ê kiáⁿ兒，hō͘咱繼續互相鼓勵，一步一步來。先tuì一個理念開始，然後一個計畫，hō͘大家無論老幼，lóng thang加入。跟tuè神ê祝福， 發揮咱ê信心。像耶穌teh講：「你ê信心已經醫治好你ê病loh，tsit-má平平安安tńg去pah。你m̄免koh再為你ê病痛苦loh。」