《生活e5台語，台語e5生活》

 | | | 轉寄

願為義光人──黃昭堂懺悔錄(三)

作者 黃昭堂 2007.05.06

久長以來，我總是認為萬能ê上帝siu°過份嚴酷，對信仰動搖ê人群，處罰siu°過份。自人類誕生到現今ê世界，人類bē-tàng和平共處，分成真tsē民族、國家互相鬥爭，這mā是上帝hō͘人類ê一種教示而安排ê。上帝何必做到tsit種程度neh?Koh來，假使我夫妻信主而得救，無信主ê父母、祖先kap阮分別tī另外一個世界，he mā是一個大問題。只有阮得救，未免太自私lah。

研讀聖經是非常重要ê,我認為讀白話字聖經tsiah是正統，但是速度慢，koh理解ê程度無kuân。漢字聖經to̍h是密密麻麻，真頭殼痛。Iáu是日文聖經比較容易接近，不過無論tó一種語文ê聖經，人名、地名對我來講lóng是麻煩ê,語文無仝，字眼、發音lóng有所無仝。我必須告白，我傾向tī讀聖經故事，ē-sái講是siōng基本ê修練非常不足。

我躊躇m̄敢受洗ê理由siuⁿ-tsē lah,但是時間無beh等我。2004年頭，koh-khah正確來講，2003年年底我就墜入非常繁忙ê時期，蓮治ê氣管擴張症無看tio̍h起色，引起肺病而無自覺，我koh無時間照顧伊，hō͘伊破病koh缺乏照顧。我koh犯大罪。

2004年9月3日上午7點半，蓮治昏迷，心臟停止，送到榮民總院急救成功，回復呼吸、心跳。下晡，醫師kā我講，無康復ê可能性。我一方面電召tī日本ê三個男孩歸國，正澄、正憲、正嘉當夜趕到。另外一方面請李勝雄長老連絡義光教會許承道牧師。許牧師出國，tú好吾友林宗正牧師tī魏瑞明兄陪同下趕到榮總。我問林宗正牧師是m̄是ē赴。伊講ē赴。感謝主！9月3日下晡6點25分，由林宗正牧師kā伊施洗。

有關我ê部分，則擇期等待我夫妻受照顧良深ê張清庚牧師回台之時，tī義光教會由許承道牧師施洗。

9月6日蓮治臨終，陳宇全牧師祈禱後，下晡6時11分蒙主恩召。我則tī 12月5日tī眾朋友kap會友見証下，tī義光教會，由許承道牧師施洗。感謝主！其實我ê試煉tuì tsia tsiah beh開始。我ê一生可以講是流浪ê人生，去教會ê動機mā有bē少不純ê部分，話講khah重一點á,mā可以講我竟然利用教會，這由我tsit份懺悔錄ē-tàng看kah非常清楚。求主憐憫，求主赥免，賜我活力，親近聖經、聖詩，慇勤祈禱，早日成做真正ê僕人。(摘自義光教會設教25週年紀念特刊)