《生活e5台語，台語e5生活》

 | | | 轉寄

安全帽ê奮鬥記事

作者 陳小小 2007.07.15


騎機車載gín-á出門，但姊弟兩人lóng無歡喜戴安全帽，因為真燒熱koh真重。特別是姊姊，常ài我kā伊綁兩條辮子，hit種翹得高高ê可愛造型，m̄是古早時代髮辮貼tiâu耳孔邊後面下垂ê閨秀型。梳tsit種頭ê時tsūn，伊koh-khah buài戴安全帽，因為會kā伊美麗ê髮型破壞掉。

Tú開始，我lóng是採用恐嚇法，「無戴，會hō͘警察掠去oh！」不過我心裡是真討厭tsit種講法。而且in發現tsia警察真少，甚至有時警察看tio̍h in無戴安全帽mā無掠in。

後來我想了另外一種講詞，kā-in講：「媽媽細漢ê時tsūn，安全帽ē-sái講是奢侈品，有錢人tsiah ē-tàng戴。（當時連o-to-bái lóng真少看tio̍h，多數人是行路或騎腳踏車，mā無容易買tio̍h安全帽。）

外公是工程師，常常tio̍h騎o-to-bái到真遠ê工地監工。伊無安全帽thang戴，只ē-tàng戴hit種防止落石擊頭ê工程帽，但有帽á戴已經是真了不起loh。媽媽kap a舅細漢ê時tsūn lóng看卡通《科學小飛俠》，安全帽ná親像科學小飛俠ê頭盔。有時sńg遊戲，會偷the̍h外公ê帽á來戴。Lín戴安全帽，就會kap科學小飛俠仝款帥oh！」

不過，án-ne講mā無用，現在ê gín-á真聰明，in bē感覺戴了安全帽會變成科學小飛俠。特別是in現在無流行科學小飛俠。姊弟兩人iáu是無歡喜戴安全帽。革命iáu未成功，我這做媽ê iáu tio̍h繼續努力。

有一工我想tio̍h家己ê車禍經驗，kā in講：「Lín tio̍h感謝安全帽oh，有一pái安全帽保護媽媽。若無安全帽，lín今á日就無一個suí ê媽咪，只ē-tàng有一個面bái ê媽媽。」tsiah-ni̍h驚人ê話題，姊弟兩人就有興趣loh，豎(khiā)直耳孔專心teh聽。

「媽媽大學畢業工作，thàn了錢買一台o-to-bái，koh開了一千guā kho͘買一頂全罩式安全帽。Hit時別人lóng羨慕我有o-to-bái，但lóng感覺我真戇、koh浪費，根本無需要買全罩式安全帽。但事後證明我tsiah是聰明ê。

因為，有一pái我kap爸爸騎o-to-bái去郊遊，突然hō͘汽車撞tio̍h後pîng邊a。爸爸因為手掠tiâu車頭，所以跟tuè一歪，連人帶車摔到路邊田裡；媽媽坐tī後座，kui-ê人像超人án-ne縱身向前飛出去，頭、胸坎先落地，並滑行一小段距離。

媽媽當時胸坎á痛kah仆tī地上bē振動，爸爸行過來，認為我死去ah，竟然kā我翻身過來，抱tio̍h huah我ê名，我痛kah大叫「mài動我lah。」hit台汽車就趁tsit-ê làng縫溜suan去。

後來，我kap爸爸身軀lóng是輕傷，但車毀了，安全帽磨損嚴重。兩人不約而同lóng感覺好佳哉有戴全罩式安全帽，若無下頦骨頭一定碎裂，嘴齒m̄知bueh落幾齒。」 （註：根據統計，騎士ê下頦區域有高達35% ê機率會遭遇tio̍h衝撞）

姊弟兩人聽了kah-ná有曉悟，每pái騎o-to-bái出門就自動乖乖á戴安全帽，lóng m̄免我提醒。但是人類僥倖、省事態度kap唯美心理，實在遠超過人身安全意識。若是騎真短距離，in有時mā會懶得戴安全帽。想講橫直tsiah一下á，bē發生什麼意外pah？tú應驗聖經所講ê無m̄-tio̍h，每一個人內底有嚴重ê自我毀滅趨勢。

我最後只好kā好朋友王醫師搬出來。我對姊弟兩人講：「Lín知m̄知影，是誰推動『騎機車tio̍h戴安全帽』ê法律？lín mā認識伊oh！」姊弟兩人lóng真好奇，「是誰ah？」我回答講：「就是王醫師in發現：當發生o-to-bái交通事故ê時，因為速度慣性，頭部往往首當其衝或tāi先墜地。」

並講kah有聲有影，「lín去過病院急診室loh！m̄是有真tsē少年人全身鮮血被送入來？hiah-ê真tsē是車禍肇事。王醫師in做醫生ê，tī急診室裡看siuⁿ-tsē了tsiah-ê悲劇lah。所以in努力推動『騎機車tio̍h戴安全帽』ê法律通過。」

續落來對姊弟兩人講：「Ē-sái講是大家lóng像lín仝款，感覺王醫師in真無聊，國家tshòng啥bueh立tsit種法？安全帽戴起來真燒熱koh真重。警察koh-khah是討厭，四界掠無戴安全帽ê人。被掠tio̍h iáu-beh罰錢。

Ē-sái講是lín知影mah？因為tsit條法律通過，所以全國車禍死亡率大幅降低。真tsē家庭ê爸爸因為有戴安全帽無死，所以iáu ē-tàng繼續thàn錢飼一家人；真tsē家庭ê媽媽因為有戴安全帽無死，所以iáu ē-tàng繼續做家事。根據統計，一個人死去，平均會有六個人難過傷心。Lín想看，若爸爸媽媽無戴安全帽車禍死去，kám bē真傷心neh？

王醫師in雖然hō͘真tsē人罵，但實際上卻拯救了真tsē家庭bē致使破碎neh！卻無人知影，beh向in道謝。Lín戴安全帽ê時，也tio̍h紀念王醫師in ê努力oh。」

講到tsia，禁bē-tiâu想tio̍h上帝ê律法，mā是án-ne。咱lóng是感覺真麻煩，真無方便。Ná親像十誡裡ê「bē-tàng作假見證」，就是bē-tàng講白賊。Bē少基督徒可能tú信主ê時，會努力遵守。但是久了就頑皮。因應時勢、考慮大局，小講一個白賊或是做一個假見證有什麼關係，上帝何必凡事lóng hiah-ni̍h認真？

這就kap戴安全帽有點á類似，當伊成了習慣，無戴就會感覺怪怪ê。但是戴安全帽iáu無成做習慣tsìn前，表面看起來是每pái騎車tsìn前，不斷來做選擇「戴？或是m̄戴？」實際上，心裡每pái ê念頭lóng是「m̄戴」，卻是靠各種理性思辯或罰款壓力來幫助家己戴起lih。

仝款ê，「bē-tàng作假見證」若無變成咱ê生命習慣tsìn前，事實上心裡每pái ê念頭lóng是「講白賊比較khah方便」，卻是靠各種理性思辯或白賊被拆破ê壓力來幫助家己mài講白賊。

遵守上帝ê律法看起來kah-ná麻煩或愚戇，事實上透過遵守律法，thang幫助咱將tsiah-ê行為規範化成生命內涵，成做習慣，mā就是所謂ê「脫去舊我」，一步一步提升成做配得耶穌十架代贖所hō͘咱「新造ê人」身份，享受真自由。

Thang悲哀ê是，上帝所設ê律法kap王醫師in努力推動ê『騎機車tio̍h戴安全帽』ê法律仝款，雖然救人無數、會帶hō͘ hiah-ê人幸福，但是卻被無知ê hiah-ê人咒罵「無聊，真是teh tshuē麻煩」，hiah-ê人khah大面看bē-tio̍h律法ê設立，原是帶有無限ê愛kap恩典tī背後。

姊弟兩人自從瞭解『騎機車tio̍h戴安全帽』ê法律形成原因，現在即使只有一分鐘ê o-to-bái車程，in mā主動戴安全帽。雖然我m̄知影王醫師tsit張牌ē-tàng用juā久，畢竟我koh-khah深知人類內底僥倖、省事態度ê趨勢是thang驚ê強大，但是至少我hō͘ in看見律法kap恩典是常常同時存在ê。