《賴永祥講書》

 | | | 轉寄

《教會史話》(2_125) 樟腦糾紛ê解決

作者 賴永祥 2009.11.29

1868年（同治7年），台灣排外反教ê思潮kàu siōng-kuân，樟腦hō͘人扣押，教堂hō͘人損毀，教民hō͘人thâi，華洋相拍等等ê案件，前後lóng來發生：洋人認為地方官允準損害，無尊重「條約」規定ê權益，逐便lông會抗議。Kàu 7月英署領事古必勳（John Gibson）tsiūⁿ任，認為事情嚴重，通知香港請調兵船，前後有兵船3台分別停tī打狗安平，名義siōng是保護外人，實際siōng是威脅。總理各國事務衙門tik-tio̍h閩省督撫派員會同英領事迅速辦結各案。所以福建興泉永海防兵備道曾憲德受委派專責艦辦理。曾憲德tī 11月初8（舊日9月24）kàu台灣。11月25（舊日10月12）英兵官茄當（Lieut Gurdon））tī安平開砲，隔轉工hiông-hiông攻打安平協署，副將江國珍tī受傷後食毒死亡；後來mā向商民討兵費。

2月初1（舊日10月18），曾憲德吉必勳成立協議：（一）廢止樟官營，外國人kap請ê人自由買賣（訂立英商tī台灣採辦樟腦條款—Camphor Regulations 1869），（二）生理人因為商業、遊覽ia̍h是其他必要beh旅行台灣各地，道台應該發護照，（三）賠償怡記洋行（（Ellis & Co.）樟腦損失6000 kho͘，（四）賠償新教教會財產1167 kho͘，（五）賠償天主教堂財產2000 kho͘，（六）撤換道台（梁元桂）、鳳山知縣（凌樹荃）、鹿港海防同知（洪熙恬），處罰各地擾亂ê兇手（thâi死教民莊清風主犯周忠tī審理後斬頭賠命），（七）告示民眾禁止誹謗基督教，（八）承認傳教師tī台灣各地有傳教居住ê權益，nā是華洋ê糾紛應該hō͘中英2國作伙裁判。提議ê案件lóng面議，後來tsia̍h開清摺，送總理各國事務審查。

對吉必勳處理tsit-ê案件，總理衙門非常不滿，照會英政府講：「英人tī內地各所在傳教通商，有定條約，領事官tú tio̍h tāi-tsì應遵守照會，無tio̍h是地方官tāi-tsi，應該申請頂司，tsiah ē-tàng動用兵船，lī-tshiaⁿ台灣屬洋案，阮經派人來台灣查辦，koh經過委員當面議定，分冊單，hō͘ in看，hō͘領事吉必勳無話通講，koh khah免講何得復違反約定烏白來。雖然命令ài兵費洋銀，續..落來吉必勳ài全數交hâiⁿ，另外逼死副將大員，損傷兵勇，燒局庫等等ê事件，罪狀lóng khah重大…」。吉必勳總算hō͘英國政府開除。

1868年間，教會受tio̍h tsiaⁿ大ê災難，有hō͘人消滅ê可能，協議ê成立，成做關鍵—官方重新承認tī台灣傳教ê權益，台灣教會行向新ê階段！

《台灣教會公報》 2078期 主後1990年11月初4