《賴永祥講書》

 | | | 轉寄

《教會史話》(2_144) 卓加弄家譜

作者 賴永祥 2010.04.11

卓其清（枝清）是拔馬（左鎮）上早期ê信徒；伊ê老父卓加弄（字天啟）厝前bat起拔馬第一所聚會ê所在。為tio̍h beh探討拔馬教會歷史kap平埔族人改信ê kuè-tîng，guá感覺應該the̍h卓家族譜。Hó͘加在郭宣仁牧師代勞，卓榮祥牧師提供卓伊萬裔「系統表」、家譜稿本內底ê「卓道生信主心路歷程」、卓道生履歷等資料，甚感。卓加弄tī 1898年死去，72歲（看《台灣府城教會報》165期）。

無tiāⁿ guá ài先記錄卓道生寫..ê卓家信主ê kuè-tîng……「始從兄（指其清，又作枝清）往木柵禮拜堂聽道。因為庄前事一佛名老王，2月前tiāⁿ-tiāⁿ作怪，採冒兄枝清，beh選做技徒。正月15佛ê聖誕真鬧熱，beh新技徒開葷，拋裘刺劍。無法度阻止，hó͘ ka在有親tsiâⁿ朋友（卓文杞？）元宵前uì木柵來厝nih有看tio̍h，tsio老父（按卓加弄）祈禱上帝，教a兄（指其清）讀詩。15日庄內ê人起佛壇，kuè火盆，鑼鼓喧鬧，a兄果然平安無事。隔轉工拜託六ê朋友tsio a兄元生去木柵拜堂禮拜，繼續招族親朋友二十guā人，tiāⁿ-tiāⁿ去木柵聽道。三koh月後馬醫生（指馬雅各）同高長先生來探視，順suah去敝家做禮拜所二年guā，tio̍h是tsit-má ê 四七零番地。tiāⁿ-tiāⁿ有崗仔林二十guā人奉道來禮拜。年guā，馬醫生、馬醫生娘、李庥牧師、牧師娘，lóng來行tah；後來馬醫生支出銀四十kho͘ hō͘老父kā陳買地，起tsit-má ê左鎮禮拜堂。所以gún-tau平安，庄民安駐，無koh suá去後台灣（指東部）也。感謝上主恩憐拯救施恩格外，hō͘ gún-tau有tsit-má ê順事。真感謝。卓道生筆」。

卓加弄，字天啟，tī「系統圖」內底是第四代。第一代卓伊萬（夫不詳）、第二代卓沙宜網（夫不詳）、第三代卓加禮（夫不詳），真明顯頂一代是女系譜。卓加弄，妻買兵涼，生四男二女，卓其清（妻標粉）排長，卓道生（妻蘭謹）排第三，其清、道生屬第五代。道生有一男二女，男卓良（妻莊豆鹽），長女卓美（適胡再享），次女卓甘（適郭孟揚），卓良之輩屬第六代。卓良生五男二女，卓榮祥是第四，是第七代。koh有第八代，包括卓榮祥子宗仁等，第四代起系譜已經是男系。

卓其清，bat做教會小學教員、傳道師，伊是府城kap旗後兩傳道養成所合併前ê受訓練者。卓道生列tī台南神學校（大學）開設以後學生名錄ê第一ê，tī 1876年入學。伊ê kiáⁿ卓良（koh叫做基良，1908年入學），孫榮祥（1949年入學），曾孫宗仁（1972年入學），四代lóng是台南神學院培養..出..來ê傳道者，真無簡單。

《台灣教會公報》 2038期 主後1991年3月24