《賴永祥講書》

 | | | 轉寄

《教會史話》修訂1_033 書序有名陳大鑼

作者 賴永祥 2019.10.06

Tī《廈門音新字典》，甘為霖牧師序講：得林錦生、陳大鑼兩位學生之協助。Tī《內外科看護學》，戴仁壽醫生序講：冊經本人口述，由陳大鑼先生用羅馬字寫完成。Tī《羅華改造統一書翰文》，劉青雲先生序講：本冊tī形成上kah印刷校正上，硯友陳君大鑼苦心協力。Tī tsiah-ê利用白話字名著幕後貢獻極大ê陳大鑼啥人？

陳大鑼，1893 年 3 月 1 日出世tī永康，父陳塗圓，母劉甜，七歲讀i永康義塾，九歲進永康教會小學，1907 年進台南長老教中學，1910 年 11 月畢業。因伊漢學基礎真好，to̍h是由甘為霖牧師約聘，協助伊ê廈門音字典編輯，共事三年。該字典tī 1913 年順利刊行。當時tī新樓醫館有戴仁壽醫生（G. Gushue-Taylor），計畫刊行《內外科看護學》（英文書名The Principles and Practices of Nursing ）約大鑼協助用羅馬字寫成ê，tsit本冊tī 1917 年刊行。然後就tī長老教中學附屬小學擔任教員六年。

1922 年劉青雲先生學成自日本tńg去台，就著手應用新式學術組織而且利用羅馬字編寫一本文牘，因有硯友之誼自 1923 年起大鑼受託協助。伊m̄-nā tī組織上有貢獻，tī監印kah校對尤辛苦從事。Hit本冊tī上海商務印書館付印。據劉家檔案，1924 年 10 月 15 日起廠方每禮拜三pái交來印樣，ta̍k pái 16 面，由大鑼細膩校對，繼續到 1925 年 2 月 10 日校完。Tsit本冊文 513 面，kah序、目錄、附錄等計550 面，由台南新樓書房發行。Hit中間大鑼之職位是三tsē商會書記。1926 年起， 改tī青雲父劉瑞山翁經營和源會社擔任書記，到 1945 年。

戰後伊擔任台灣省立台南農業職業學校教員，授國文課，共十年而退休。退休後伊iáu tsē協助學人。親像 1962 年荷蘭學者施博爾（Kristofer M. Stsipper）來台深入研究道教，1972 年美國穆海飛（Harvey Mol’e）來台擬編台英字典，lóng得tio̍h伊ê協助。晚年伊刊《昔ê時賢文》一書贈與親tsiâⁿ朋友，是羅馬拚音白話字kah漢文對照，有句讀、句解、註釋，共178 面； 有附二十四孝ê故事（語解）。

陳大鑼 20 歲ê時kah大灣張啟明三女順結婚，育有七男（肯堂、滿堂、耀堂、煥堂、祝堂、瑞堂、彩堂）三女（瓊花適王茂丁、瓊音適林來旺、瓊英適林日祥）。屬永康教會，任執事kah長老gōa年，擔任書記，濟世整濟。1935 年永康土墼厝禮拜堂倒落來，經伊kah長執推動購地新建堂。1983 年 7 月 17 日安息，永康教會以「教會葬」，告別。
──《台灣教會公報》1907 期 主後 1988 年 9 月 18 日

陳大鑼