《賴永祥講書》

 | | | 轉寄

《教會史話》修訂1_042 祖籍新港ê李順義

作者 賴永祥 2019.12.08

崗á林李順義是故台灣教會公報社主筆李嘉嵩牧師（1914 ～ 1978）ê 阿祖。李嘉嵩《100 年來》（1979 年人光出版社）第一章「先祖先」講：旗後有正式禮拜ê時，佈道所裡lóng ē-tàng看tio̍h我ê 阿祖一家人。Tùi台南縣山地崎嶇崗á林到高雄旗後，以今á日ê汽車、火車、加上步lián，來回尚且需要 10 个點鐘。

Tī 100 年前，阿祖beh率領一家人去旗後看馬醫生，而且聽道作禮拜，就一定tio̍h tī禮拜六天光前，帶火把出發，一直ǹg南行足足一工一瞑ê路程，tī禮拜日早起時才能去到旗後。Hit中間路途勞頓三頓不定，iáu tiāⁿ-tiāⁿ有土匪出入，過路人m̄-nā財務tiāⁿ-tiāⁿ有hông搶劫ê危險，to̍h是性命mā tiāⁿ-tiāⁿ有難保之虞。阿祖帶厝裡ê人去旗後做禮拜ê時，in一陣人一定tio̍h帶ê物件有糧食、武器槍械kah粉鳥等三樣物件。糧食做án怎用途，當然免講mā知；武器槍械tsiah是用來防禦途中突來打擊搶劫ê匪徒，講tio̍h粉鳥，to̍h是等到一陣人安抵旗後，tī禮拜日早起kā牠放出hō͘牠飛tńg來崗á林， 太媽kah家咱人看tio̍h便thang放心，知影in已平安去到旗後。（是gōa-ni̍h-á感動ê故事！）……1867 年阿祖就奉獻地皮kah建築物，tsit-má教會會址iáu tī當時仝一个地點……。

M̄-koh《100 年來》起頭講：聽講阿祖李義順，自從馬醫生tī臺南開設佈道所兼診所ê時（tsit本冊註 1865 年 6 月 15 日，m̄-koh 16 開設tsiah tio̍h），就bat偕同故鄉崗á林同村ê病友到台南馬醫生處求醫……。Tsit段是「聽講」，非歷史事實。親像你讀必麒麟tio̍h Pioneering in Formosa （中譯：老台灣）就知影馬醫生kah崗á林人士頭一pái接觸是 1865 年 11 月，馬醫生已受逼退出台南而tī旗後。

Koh《100 年來》卷頭有崗á林李家簡譜；記祖先源流講：祖先相傅來自江蘇省新港府，乘漁船過海漂流現高雄白沙崙地方，轉台南府居欉á林，後轉

新港to̍h是tsit-má新市鄉，而擴到山頂鄉，到文貴公（按順義之阿祖）始入崗林（通稱崗á林）開拓到taⁿ……。其實，江蘇省而且無設置新港府。「滿車功五品銜順義李公佳墓」是同治甲戌（13 年）臘月所立者；有刻祖籍「新港」，伊ê所應該是平埔四大社之一新港社。Koh再讀必麒麟冊，就知必麒麟先訪新港，得鄉長紹介，偕馬雅各醫生往訪有同族人ê番社，第一khiā崗á林，見頭目，該員向清政府負責社務。此頭目thang推斷是李順義，而伊是新港社ê同族人。李順義傳五子二女，長女涼娘、大kiáⁿ登旺、第二kiáⁿ登發、第三kiáⁿ登富（過三房）、四子登炎，五子登科、末女發金。（登發是嘉嵩ê阿公。）

《100 年來》是一本台灣教界難得ê傳教者自傳，自先阿公們講起，包括一生回顧kah展望。聽講接替徐謙信牧師tī台灣神學院授「台灣教會史」ê吳文雄牧師特別要求學生tī第一禮拜閱讀tsit本冊云。


──《台灣教會公報》1917 期 主後 1988 年 11 月 27 日