《賴永祥講書》

 | | | 轉寄

《教會史話》(1_ 028) 詩冊kap早期信徒ê入信

作者 賴永祥 2007.11.05

「真主上帝造天地，能光能暗誰仔會，冥轉為日日轉冥，生成萬物功勞圓；上帝慈心著敬服，保庇眾人賜服祿，食穿及用皆妥當，萬物齊備伊親創；各樣菩薩總無真， 不如上帝是至神，世間假佛人所刻，須知服事真無益；救世功勞無可比，世間人人不敢擬，天下四海大及細，誠心敬拜獨上帝。」

Tsit首詩tī咸豐4年（1854）季春鑴「養心神詩新編」，是十三首中ê第三首。註án-ne講：Tsit首是teh講上帝有大權，ē-tàng hō͘日轉夜夜轉日，koh ē-tàng hō͘人衣食費用lóng充足，hō͘人siōng好是獨拜上帝，bē-tàng服事偶像，作無利益來害tio̍h有益。

南部設教以後，第一位聽道改信ê是高長（1840∼1912）。 高金聲牧師bat用白話字寫「高長伯傳記」（見「南台教會史」附錄），略講：高長伯二十八歲來台尋姊謀職……（某日）因sing-lí虧本beh去卜卦問王爺，預備牲禮去燒香，途中遇tio̍h民眾圍聚，知影有人teh傳「番á教」。伊聽tio̍h ê信息就是：上帝是真正，人siōng好是拜伊；佛是假ê，拜佛會tîng-tâⁿ。長伯聽了後，就捨去求佛ê念頭。早期 tī台灣佈道ê信息是簡單koh節要，唱吟一、二首「養心神詩」來幫助，高長伯tsit工所聽ê詩定tio̍h是「養心神詩」第三首無m̄-tio̍h。

「養心神詩」第一首是講造化之主ē-tàng創萬物tuì天kap地無一個無齊全。林赤馬tī 1883年3月，年紀已經二十六歲，訪問朋友郭省，beh邀伊去隔壁庄觀戲。Tī伊ê桌頂有khǹg一本「養心神詩」，開卷to̍h看tio̍h其中記載：上帝創造天與地，生成萬物各項能，功勞極大又極濶，一世稱呼永無息……上帝的恩講不盡，差遣耶穌救萬民……。讀suah沉思吟味，自言講：我讀經多部，m̄-bat記載天地萬物啥人創造，心有淡薄á起疑訝。林赤馬就是後日ê名牧林學恭。 梅監霧牧師( Gampbell N. Moody)，tī 1907有出刊《異邦人ê心》一書( “The Heathen Heart ：An accoont of the reception of the Gospel among Tsinese of Formosa”。其第五章約略講：主ê恩惠臨到異邦人，平常第一ê徵候就是伊想購買一本漢字詩冊。伊或者bē曉讀，但伊會記落來冊中一kuá符號，伊會請一位信徒或傳道者，唸一句來暗唸一句，並請伊指點冊中ê記載。一句koh再一句，一首koh再一首……伊ē-tàng記憶juā-tsē首詩？對無學問ê求道者，thang用這來測驗伊信仰ê程度。詩冊（如《養心神詩》）雖然bē-uē代替聖經，但對早期信徒進入信仰生活影響之大，tuì tsia ē-tàng看出。
(華語原載：《台灣教會公報》1902期主後1988年8月14日)