《賴永祥講書》

 | | | 轉寄

《教會史話》(1_033) 冊序有名陳大鑼

作者 賴永祥 2008.01.27

Tī「廈門音新字典」，甘為霖牧師ê序講：得林錦生、陳大鑼兩位學生ê協助。Tī「內外科看護學」，戴仁壽醫生ê序講：冊經本人口述，由陳大鑼先生用羅馬字寫成。Tī「羅華改造統一書翰文」，劉青雲先生ê序講：本冊tī形成上kap印刷校正上，硯友陳君大鑼苦心協力。Tī tsiah-ê利用白話字名著幕後貢獻極大ê陳大鑼啥人ah？

陳大鑼，1993年3月1日tī永康出世，父陳塗圓，母劉甜，七歲就讀tī永康義塾，九歲進永康教會小學，1907年進台南長老教中學，1910年11月畢業。 因伊漢學基礎良好，to̍h是由甘為霖牧師約聘，協助其廈門音字典ê編輯，共事三年。該字典tī 1913年順利刊行。當時tī新樓醫館有戴仁壽醫生（G. Gushue-Taylor），計畫刊行「內外科看護學」（英文冊名 “The Principles and Practices of Nursing”）約大鑼協助用羅馬字寫成，tsit本冊tī 1917年刊行。其後就tī長老教中學附屬小學擔任教員六年。

1922年劉青雲先生學成自日本tńg去台，就著手應用新式學術組織並利用羅馬字編寫一本文牘，因為有硯友之誼，自1923年起大鑼受託協助。伊m̄-nā tī組織上有所貢獻，tī監印kap校對尤其辛苦從事。該冊tī上海商務印冊館付印。根據劉家ê檔案，1924年10月15日起廠方每週三pái交來印刷樣本，每pái十六面，由大鑼細膩校對，繼續到1925年2月10日校完。Tsit本冊文513面，連同序、目錄、附錄等計550面，由台南新樓冊房發行。其間大鑼ê職位是三多商會書記。1926年起，改tī青雲ê老父劉瑞山翁經營和源會社擔任書記，到1945年。 戰後伊擔任台灣省立台南農業職業學校教員，教授國文課，共十年tsiah退休。退休後伊iáu協助學人真tsē。譬如1962年荷蘭學者施博爾（Kristofer M. Stsipper）來台鑽研道教，1972年美國穆海飛（Harvey Mol’e）來台擬編台英字典，lóng得tio̍h伊ê協助。晚年伊出刊《昔時賢文》一書贈與親朋，是羅馬拼音白話字kap漢文對照，有句讀、句解、註釋，共178面；附有二十四孝ê故事（語解）。

陳大鑼二十歲ê時kap大灣張啟明三女順結婚，育有七男（肯堂、滿堂、耀堂、煥堂、祝堂、瑞堂、彩堂）三女（瓊花適王茂丁、瓊音適林來旺、瓊英適林日祥）。屬永康教會，任執事kap長老多年，擔任書記，濟世真tsē。1935年永康土墼厝禮拜堂倒塌，經伊kap長執推動購地新建堂。1983年7月17日安息，永康教會以「教會葬」舉行告別式。
(華語原載：《台灣教會公報》1907期主後1988年9月18日)