《台語荒漠甘泉（漢羅版）》

 | | | 轉寄

天有不測風雲

作者 陳清俊 譯 林俊育 漢羅翻寫 2011.01.16

listen
正月十六(一月十六日)

「報頭(pò-thâu) 風(hong) 起(khí)。」(馬可(má-khó) 4:37)

人生(jîn-sing) ê 風颱(hong-thai) 忽然(hut-jiân) 臨到(lîm-kàu) 咱(lán)，親像(tshin-tshiūⁿ) 親人(tshin-lâng) 死失(sí-sit) ê 打擊(tá-kik)，痛苦(thòng-khó͘) ê 失望(sit-bōng)，傷心(siong-sim) ê 失敗(sit-pāi)。有時(ū-sî) 災難(tsai-lān) 是(sī) 慢慢(bān-bān) 來(lâi)，ná 來(lâi) ná 強(kiông)，強(kiông) kah teh tī 心頭(sim-thâu)，氣(khùi) lóng 喘(tshóan) buē 出來(tshut-lâi)。

Tsiah-ê 風颱(hong-thai) 災難(tsai-lān) 是(sī) 上帝(siōng-tè) 用(ēng) 來(lâi) 培養(pôe-ióng) 咱(lán) 來(lâi) 服事(ho̍k-sāi) 伊(i) ê 方法(hong-huat)。上帝(siōng-tè) 若(nā) 需要(su-iàu) 一(tsi̍t) 叢(tsâng) 強(kiông) koh 勇(ióng) ê 橡樹(siōng-tshiū)，就(tsiū) 會(ōe) 種(tsèng) tī 狂風(kông-hong) 暴雨(po̍k-ú) ê 所在(só͘-tsāi)，樹(tshiū) tī 風雨(hong-hō͘) 中(tiong) ê 奮鬥(hùn-tàu)，樹(tshiū) 身(sin) tsiah 會(ōe) 勇壯(ióng-tsòng)，成做(tsiâⁿ-tsòe) 上等(siōng-téng) ê 木材(bo̍k-tsâi)。

上帝(siōng-tè) 訓練(hùn-liān) 一個(tsi̍t-ê) 人(lâng) 出來(tshut-lâi) 事奉(sū-hōng) 伊(i)，也是(iā-sī) 經過(king-kòe) 滿滿(móa-móa) ê 奮鬥(hùn-tàu) kap 艱苦(kan-khó͘) ê 操練(tshau-liān)。Tī 狂風(kông-hong) 暴雨(po̍k-ú) 打擊(tá-kik) 中(tiong)，會曉(ōe-hiáu) 祈禱(kî-tó) 講(kóng)：「主(tsú) ah，我(góa) 全心(tsôan-sim) 歸(kui) 你(lí)，phah 我(góa)，槌(tûi) 我(góa)，nuá 我(góa)，再造(tsài-tsō) 我(góa)，成做(tsiâⁿ-tsòe) 你(lí) 完全(ôan-tsôan) thang 用(ēng) ê 材料(tsâi-liāu)。」

有(ū) 一(tsi̍t) 幅(pak) 圖(tô͘) 描寫(biâu-siá) 世界(sè-kài) 各種(kok-tsióng) ê 天才(thian-tsâi) 大(tōa) 人物(jîn-bu̍t)，有(ū) gâu 講話(kóng-ōe) ê 演說家(ián-suat-ka)，有(ū) 哲學家(tiat-ha̍k-ka)，有(ū) 殉道者(sûn-tō-tsiá)，每(múi) 一個(tsi̍t-ê) lóng 是(sī) tī 某(bó͘) 一(tsi̍t) 方面(hong-bīn) 有(ū) 非常(hui-siông) ê 成就(sêng-tsiū)，tsit 幅(pak) 圖(tô͘) ê 了不起(liáu-put-khí) ê 所在(só͘-tsāi)，就是(tsiū-sī) 每(múi) 一(tsi̍t) 人(lâng) lóng 是(sī) 經過(king-kòe) 極(ke̍k) 大(tōa) 苦難(khó͘-lān) ê 人(lâng)。有(ū) buē-thang 入去(ji̍p-khì) 所(só͘) 應允(èng-ún) 地(tōe) ê 摩西(Mô͘-se)，有(ū) 青瞑(tshiⁿ-mî) ê 詩人(si-jîn) Hô-má (荷馬(hô-má)，Homer)摸(bong) teh 行(kiâⁿ)。有(ū) 一個(tsi̍t-ê) 身材(sin-tsâi) 高大(kôan-tōa) ê 主(tsú) 耶穌(iâ-so͘)，伊(i) 特別(te̍k-pia̍t) ê 所在(só͘-tsāi)，就是(tsiū-sī) 伊(i) ê 面(bīn) 受(siū) 損傷(sún-siong) 比(pí) 別(pa̍t) ê 人(lâng) lóng khah 厲害(lī-hāi)。Tsit-ê 畫圖家(ōe-tô͘-ka) 可能(khó-lêng) kā 圖(tô͘) 號(hō) 做(tsòe)「暴風雨(pō-hong-ú)」。

大自然(tāi-tsū-jiân) 經過(king-kòe) 風吹(hong-tshe) 雨淋(hō͘-lâm) 後(āu)，koh-khah 美麗(bí-lē)，大(tōa) 山(suaⁿ) ê suí 也是(iā-sī) 受(siū) 風雨(hong-hō͘) ê 致蔭(tì-ìm)。人生(jîn-sing) ta̍k 路(lō͘) 英雄(ing-hiông) 人物(jîn-bu̍t) kiám lóng m̄ 是(sī) 有(ū) 滿滿(móa-móa) 風浪(hong-lōng)、奮鬥(hùn-tàu) ê 痕跡(hûn-jiah) mah?

你(lí) 一定(it-tēng) 經歷(king-le̍k) 過(kè) 風雨(hong-hō͘) ê 打擊(tá-kik)，你(lí) 是(sī) m̄ 是(sī) 受傷(siū-siong)，困苦(khùn-khó͘) 倒(tó) 落去(lo̍h-khì)；á 是(sī) 風雨(hong-hō͘) 將(tsiong) 你(lí) 提升(thê-sing) 到(kàu) 滿(móa) 有(ū) 太陽(thài-iông) ê 山頂(suaⁿ-téng)，成做(tsiâⁿ-tsòe) 性命(sìⁿ-miā) khah 豐盛(hong-sēng)，khah 堅固(kian-kò͘)，信心(sìn-sim) khah 堅定(kian-tēng) ê 人(lâng) mah?經過(king-kòe) 風雨(hong-hō͘) 以後(í-āu)，是(sī) m̄ 是(sī) koh-khah 會(ōe) 同情(tông-tsêng) 受(siū) 風雨(hong-hō͘) 打擊(tá-kik)，傷跡(siong-jiah) 滿身(móa-sin) ê 人(lâng)？

樹頭(tshiū-thâu) khiā 有(ū) 在(tsāi)，m̄ 驚(kiaⁿ) 樹尾(tshiū-bé) 做(tsòe) 風颱(hong-thai)

上帝(siōng-tè) 所(só͘) 栽(tsai) ê 樹(tshiū)，
M̄ 驚(kiaⁿ) 狂風(kông-hong) 吹(tshe) koh giú，
Ǹg 東(tang) 剖(phòa)，ǹg 西(sai) khiú，
樹葉(tshiū-hio̍h) 搖(iô) 來(lâi) 搖(iô) 去(khì) hàiⁿ 韆鞦(tshian-tshiu)。
上帝(siōng-tè) 所(só͘) 栽(tsai) ê 樹(tshiū)，
根(kun) ná 深(tshim)，枝葉(ki-hio̍h) ná 上( tsiūⁿ )，
枝(ki) e ná 闊(khuah)，出(tshut) tī 上帝(siōng-tè) ê 手(tshiú)，
Lóng 是(sī) 樹(tshiū) á 所(só͘) 需求(su-kiû)。

上帝(siōng-tè) 所(só͘) 疼(thiàⁿ) ê 樹栽(tshiū-tsai)，
無(bô) 甚物(sím-mi̍h) 力(la̍t) 會(ōe) kā 傷害(siong-hāi)，
雷(lûi) kòng、sih-ná 電(tiān)、雨(hō͘) 沖( tshiâng)、風颱(hong-thai)，
過了(kè-liáu)，猶原(iû-gôan) 自在(tsū-tsāi)。
上帝(siōng-tè) 所(só͘) 疼(thiàⁿ) ê 樹栽(tshiū-tsai)，
每(múi) pái 風雨(hong-hō͘) 後(āu)，猶(iáu) khiā 在在(tsāi-tsāi)，
Tuì 頭日(thâu-ji̍t) 到(kàu) 末(bo̍at) 世界(sè-kài)，
時時(sî-sî) teh 長大(tióng-tāi)。


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org