《台語荒漠甘泉（漢羅版）》

 | | | 轉寄

讀《一枝草一點露──世間 ê suí 》有感

作者 Tsuniok 2005.08.21

Tsit-ê充滿罪惡ê世間kám有suí ? 答案否定ê人真tsē,因為in ê 靈魂無法度脫離罪惡 ê束縛，bē曉倚(uá)靠神 ê 氣力來行(kiâⁿ)永生 ê平安道路; 答案肯定 ê人 mā真 tsē,in tī神ê恩典內面tshuē tio̍h性命ê意義。

《一枝草一點露──世間ê suí 》ê作者紀福讚牧師是上有代表性ê人物，伊tī冊ê序言中講起伊ê虧歉：1991年七月，伊tī將近精神分裂ê狀態下犯了大錯，hō͘至親朋友喪失性命，hō͘伊ê家族傷心peh-pak,hō͘伊所盡忠ê上帝見笑，hō͘伊所疼ê教會gông-gia̍h,hō͘伊 ê bó͘-kiáⁿ無thang倚靠，hō͘ tsē-tsē疼惜伊 ê人連累受苦，也開始伊久長監獄ê省察生活。伊續落去koh講出伊 ê感激：bat抑是m̄-bat ê朋友親像上帝ê使者，陪伴伊行過死蔭ê山谷，hō͘ 伊ē-tàng等候上帝ê憐憫，見證上帝永遠bē變ê恩典。

紀牧師tī受關監ê苦難日子中，猶原盡心、盡性、盡意疼上帝，不斷追求性命ê意義。羅榮光牧師tī冊ê序中講：紀牧師用敏銳ê心眼來觀察世間萬象，大到世界、國家 ê 大事，細到個人ê小故事，用咱台灣人ê父母話寫出來，闡(tshián)明上帝ê憐憫kap疼痛，幫贊讀者來tshiâu-tshuē性命ê意義，hō͘咱koh khah「對上帝有信，對人民有疼，對土地有情」。

紀牧師用一般講道ê方式寫出143篇真感動人ê人生真理故事，每一篇 lóng有經文、主題故事、類似ê聖經內故事kap祈禱；我每暗beh睏前讀一篇，假若聽一篇真suí ê信息，成做每日ê靈性米糧。Tsit本冊親像一面明鏡，hō͘我會當清楚看出家己ê內心。當我軟弱ê時，hiah-ê信息hō͘我氣(khuì)力；tī 患難中得tio̍h大安慰，順勢 ê時知影tsún-tsat節制，學習順服上帝ê課程。這確實是一本台灣人自我靈修 ê好冊。

Tī「tsheⁿ-mê ê得著看」hit篇文中，伊舉1997年英國布萊爾首相任命tsheⁿ-mê人布朗克特做教育kap就業部長ê例，配合聖經中ê tsheⁿ-mê參孫比目光ê參孫hō͘非利士人koh khha頭疼」、「信心堅定ê tsheⁿ-mê人巴底買得tio̍h醫治」kap「tsheⁿ-mê ê掃羅比目光ê掃羅koh khah看透人生ê路」，來見證約翰福音第9章3節耶穌應講：「Tsit-ê人無犯罪，伊ê父母亦無，獨獨beh用伊來顯明上帝ê所做。」(台語漢字本聖經)。我從事視障關懷工作十guā年來，聽過真tsē有關盲人ê信息，tsit篇是上深入hō͘人感動ê。

Tī「簡樸知足」文中，提起1990年代所發起ê「自願簡樸運動」 (Voluntary Simplicity Movement)，就是「Thàn(賺) khah少錢，換 khah tsē(多)自由生活時間；買khah少物件，換khah tsē休息時間。伊舉例德蕾沙修女所創設ê「仁愛傳道會」ê修女干單有三領粗布衫，一塊粗碗，所食ê食物kap in所救濟散赤破病ê人食ê仝款，這是現代上簡樸ê傳道生活方式。Tī現此時資本主義ê過度消費社會中，這tsiah是咱追求「世間 ê suí」唯一 ê辦法。

讀完tsit本報咱「世間 ê suí」信息ê好冊，hō͘我koh再對人類有信心及ǹg望，有「信、望、愛」ê心來看這個世界，永遠to有「世間 ê suí」。

這本冊採用「台文通訊」、「台文Bòng報」kap《大學台語文選》所用ê文字，tī李勤岸教授ê指導了後，我lóng有讀tsia-ê月刊kap冊，所以讀起來lóng無語言ê落差，母語hō͘我ê感受koh khah深。親像鄭良偉教授tī伊ê序中所講ê,tī美國監獄內ê牧師用台語寫出「世間 ê suí」，對讀者有特別ê意義：「培養追求疼痛kap ǹg望 ê態度，增加跨時代、跨文化、跨階層ê知識，以及培養台文傳達情意ê技能。」

對台灣文學貢獻上大ê前衛出版社將tsit本好冊列做「台語文學叢書11」，親像鄭良偉教授所講：「世間人無分貴賤，無分國度，lóng有人類ê共性：疼痛kap希望會發現「世間ê súí」tsit-ê通則....凡是有意識beh追求台語講道kap聽道ê,tsit本冊提供真豐富ê靈性米糧kap語文典範。

現今台灣國際地位提升，哈佛大學已經tī 2001年開始開台語班，台灣mā開始推動九年一貫母語教學，真理大學也計畫開台語班。Tsit本冊ē-sái講是tsiok好ê台語文讀物，請讀者tio̍h緊買來讀，tam (嚐)一下母語ê滋味，這mā是一種「世間 ê suí」。(6/30/2002)