《台文通訊精選》

 | | | 轉寄

大空

作者 徐來 2008.11.09

是九月初ê拜一，hit日m̄知按怎，特別無閑。Tsīng透早入辦公室，電話就tân無停，客戶mā m̄知是m̄是相招，不管有約無約，攏牽前tuè後tī hit日行腳到。

Hit日舞到2點半，tú-tú發落好，想beh行出去食飯ê時，一位少年人，突然間m̄知tuì tó位bùn--出-來，pháiⁿ勢pháiⁿ勢講：「真失禮，無kap你約，tú-tú經過tsia，順續kap你參詳這張支票beh按怎投資khah好。」替伊問好投資ê利率，一切辦好了後，我順續介紹公司ê電腦銀行作業ê服務。Kā伊解釋tse會tàng省juā tsē ê時間，伊thang一腳步無出大門，tō會tàng付所有ê siàu單。無拍算，伊輕鬆講，in tau無裝電腦，伊也無愛去摸電腦。若是伊是LKK ê老人，我可能會tàng了解。總--是，少年tang-tang，竟然講無摸電腦，我卻是頭一擺聽著。Hit時，我已經iau kah大腸告小腸，m̄-koh，我非常好奇，想beh知影背後到底有啥物原因，致使伊完全拒絕用電腦。伊看我ê表情，就笑笑á講，其實，五年前tuì台灣移民來加拿大進前，伊就bat tī財政部做過代誌。Ta̍k日十幾點鐘所面對ê就是電腦、報表，加班koh加班，也是電腦、報表。就按呢，幾nā年了後，伊ê目睭差一點á就報銷。「所以我決定以後絕對無摸電腦。」

「是講，敢會tàng tshuē別種kap電腦無關連ê工作--leh？政府機關是金飯碗，敢thang講放就放sak？」伊笑笑講：「我起初mā是有考慮，m̄-koh，hit時ê報表是hō͘人愈看愈起驚。國民黨政府ê財政實在真正lām-sám,愈深入研究就愈驚，也就是這個原因，我才會決心出國。」

「若按呢講，今á日台灣財經ê亂象就無完全是阿扁政府ê失錯--lo͘h！」

「唉，冰凍三尺非一日之寒」伊開始用中國話應我，「財經ê低落是世界性ê,阿扁--a去la̍p著這空是不止á大空，真正pháiⁿ做--lah。」